藐同性做咪霸 劉佩玥 麥明詩直播開火

近月 劉佩玥 歌手上身,頻頻孖住翟威廉為big big channel直播自彈自唱,明明話成立的「Happy Live」係合唱團,但大部分時間都係 劉佩玥 做咪霸solo出風頭。 劉佩玥 非常享受畀成班仔圍當佢娘娘聽佢唱歌,不過遇上有其他女藝人一齊做直播,就即時自我捍衛起晒槓!早前麥明詩參加「Happy Live」直播, 劉佩玥 以女主人身份主持大局,尾聲時麥明詩彈錯key唱歌又入唔到音, 劉佩玥 即眼啤啤好不滿,麥明詩亦不甘示弱,堅持要走唔肯encore。啲歌畀 劉佩玥 唱晒,仔又畀佢媾晒,邊個夠佢玩?

劉佩玥騎劫直播

翟威廉(William)早前成立「Happy Live」,負責做統籌及召集人,仲出錢在旺角砵蘭街租了個單位做工作室,堅持每星期在big big channel及自己FB中開Live兩次,不過估唔到每次直播都畀劉佩玥騎劫,成為對方個人表演大好機會。較早前「Happy Live」新女上場,邀請去年落選港姐葉蒨文(Sophie)去唱live,不過唱唱吓劉佩玥趕到,黑住面做直播。

延伸閱讀:

芒實陳展鵬 單文柔向胡定欣示威

幾年內閃電轉女 王宗堯專食廿歲女

 

唱得兩嘴的Sophie為人熱情打扮性感,班仔明顯受落。呢日劉佩玥未現身,Sophie暫時做住女神先。

 

唱咗無耐劉佩玥又出現,為收復失地不停撩仔玩。

 

 

之後Moon仲爭番個中間位坐,不過全晚面口都唔多好。

 

 

年初未有「Happy Live」,劉佩玥靠黐住細寶張彥博玩情侶合照,依家做直播做到變網紅,張彥博用完即棄。

 

坐正領功搶獎金

早前《群星拱照big big channel》中,「Happy live」壓軸獲得5萬元勤工獎金,翟威廉、 劉佩玥 、周志康、莊思明同林司傑jam住歌出場, 劉佩玥 坐正中間領晒功,見到張大支票搶都搶唔切。

 

 

 

 

 

Sophie唱過翻尋味 Moon醋意大發

據知情者透露:「Moon好霸道,佢覺得自己係『Happy Live』嘅創立人之一,其他成員要請人上去唱歌都要問過佢先,遇上係女藝人佢反應就好大,仲話最好有佢喺度先好做live,好似冇咗佢唔得咁。鬼叫周志文同William都係佢啲兵咩!好多時都就晒佢。嗰個去年落選嘅港姐葉蒨文(Sophie)上過去兩次,咁啱兩次Moon都未放工唔喺度,老實講Sophie樣靚身材她又唱得唔差,班仔都幾冧佢,Moon聞到味即時放工仆返去,點都要爭番個主角位。二打六都算,Louisa(麥明詩)同佢咁高咁大,佢一樣唔like風頭被搶,因為上次Louisa做嘉賓有成1.7萬次瀏覽成為『點擊天后』,William再請佢上去,點知Moon就嫌人彈琴甩漏,唱歌又入唔到key,當場畀面色同說話人睇,Louisa梗係feel到啦!」

16年落選港姐葉蒨文(Sophie)睇得唱得彈得,難怪被Moon視為勁敵!

 

 

做咁多次直播都冇劉佩玥班姊妹份,點解呢?咪就係有人唔想畀靚過佢或者唱得好過佢嘅姊妹搶風頭囉!

麥明詩彈錯唱錯 Moon眼厲厲

上周一直播中,麥明詩全程好認真,自小習琴的她不時為 劉佩玥 伴奏,其中一次尾段彈錯, 劉佩玥 即轉身對翟威廉及周志康講:「吓!乜個尾咁樣就完!」其後麥明詩彈〈明知故犯〉唱錯key又彈錯, 劉佩玥 又眼厲厲好唔順超,既然女主人唔歡迎有其他同性共享直播,翟威廉問麥明詩係唔係會好快再來玩時,麥明詩諗都唔諗就答:「唔係呀!」之後還拒絕encore表示要離開。其實直播唱live都係娛人娛己啫!搞到好似人哋搶你飯碗咁,何必呢?

劉佩玥坐正中間即歌后上身自彈自唱,麥明詩悶到眼瓊瓊陪坐。

 

 

麥明詩彈到唔啱key又唱唔到,劉佩玥即眼厲厲。

 

 

明明麥明詩負責伴奏,劉佩玥係要加對手上去彈,麥明詩即時木無表情。

粉絲潑火

直播有火藥味都未夠,更有 劉佩玥 粉絲留言潑行火,狂讚 劉佩玥 歌精琴好,狂踩麥明詩彈得差唱得渣,又有人話麥明詩對 劉佩玥 眼超超。

 

全文完