郭富城珠海換車牌 遭爆相爆簽名
廣告
郭富城(城城)日前現身珠海車輛管理所辦理證件事宜，全程笑笑口任粉絲集郵，表現勁親民，但卻被二手車商「抽水」做宣傳，聲稱城城向其購買咗架二手七人車，另有地產商指城城專程到珠海買樓，又有代辦「中港牌」嘅中介公司，指城城現身係為咗申請穿梭港珠澳大橋嘅「中港牌」，但原來事實係城城只係去換領內地車牌，對於城城嘅證件相同文件上嘅簽名被曝光，城城嘅經理人小美怒斥：「絕對係侵犯私隱！」
撰文：東方新地｜圖片：網上圖片、郭富城IG
郭富城 被瘋狂抽水
一次換車牌事件，引來珠海市各方人馬瘋狂「抽水」老作，其實「珠海交警」官方微博早在上月28日已發文表示郭富城當日現身車管所，只係為咗「換領內地駕駛證」，並指佢喺審核資料後，就到咗審驗教育學習室參加安全教育學習課程，學習交通法規等知識，並進行宣誓，全程花約40分鐘。
事後卻有網友爆出城城換領車牌時嘅證件相同文件簽名，雖然粉絲都大讚佢52歲依然保養得宜，更有眼利網民指出城城原來有兩個簽名模式，一個係同粉絲簽名時嘅專屬，一個就係私人用途。
但城城嘅經理人小美就非常不滿，表示：「有關城城的證件照及其他資料被胡亂刊登，當然很不快及不滿，絕對是侵犯其私隱！我只能說，城城日前只是去處理一些駕駛執照上的事宜，至於網上胡亂的報道，全是一些渾水摸魚之徒缺德的創作，不想回應！」
關鍵詞
郭富城
