陳潔玲揭電視城渣男 坤哥最大嫌疑

失驚無神,又好人當渣男辦!坤哥吳業坤口中「躺著也中槍」咪就係呢啲囉!合拍過無綫劇《迷》同《愛‧回家》,落選港姐陳潔玲近日為宣傳離巢後首部電影兼三級片《私人會所》,在商台節目《公子會》中大爆曾經被無綫渣男扮慘情小白兔苦追,話到明「幾靚仔」,不過就因為一句「個底好花」,個個都先入為主入緋聞無數嘅坤哥數。坤哥當然例牌否認啦,邊有人會認自己係渣男先?

落選港姐揭電視城渣男 坤哥 最大嫌疑

參選過12年港姐、仲有「翻版陳妍希」之稱,現年29歲的陳潔玲一度係當年冠軍大熱,可惜最後三甲不入、落選後發展亦遠遠不如同屆佳麗朱千雪、湯洛雯同黃心穎等,捱足四年半行行企企閒角,今年中把心一橫約滿無綫後離巢,還話到明「冇底線」,電影處女作就在三級片《私人會所》內床戲連場扮媽媽生。

{"IPTC-DATA":"NMG","data":{"photoID":1540578}}
年參選港姐時,陳潔玲以純情外形加上一對可愛酒窩成為當年大熱人選,一度被形容為翻版陳妍希,可惜三甲不入!

 

現年29歲的陳潔玲係12年落選港姐,今年中約滿離巢後大解放,接拍三級片《私人會所》,還經常在個人社交網站晒導彈身材。

 

選完港姐後,劇集演出一直只限做閒角,近年開始以水著look出席活動拍攝旅遊節目,才漸漸賺到知名度。

 

網民鎖定坤哥

近日為了電影宣傳頻頻接受訪問,不過床戲再激都唔夠陳潔玲接受森美等主持嘅電台節目《公子會》訪問咁爆,佢自爆在電視城渣男之奇遇,依家人人競猜「誰是渣男」。有關電視城渣男,陳潔玲咁形容:「追完一個又一個,對個個都用同一招,話自己好專一、追求愛情,會主動講自己慘情童年、屋企經歷,話到自己係受傷小白兔,唔敢再愛,見到你至勇敢追求真愛喎……」而同佢合作過的吳業坤、張振朗、何廣沛成最大嫌疑,但佢哋一致否認是陳潔玲所講的「渣男」

雖然話到明該渣男「靚仔」,不過一話個底好花,網民一面倒個個估係坤哥。

吳業坤:躺著也中槍!

陳潔玲訪問一出,坤哥回應:「好有躺著也中槍感覺!好彩佢話個渣男『幾靚仔』,我超級靚仔,即係唔係講我啦。其實事後我都有WhatsApp陳潔玲,問清楚佢係唔係講我、希望有咩誤會大家講出嚟,佢都話唔係講我。老實講,話我慘都冇人信啦,我覺得自己係幸運嘅 ,又有歌又有劇,同埋我講咗好多次,希望拍拖係兩個人自己走埋一齊,唔係靠單方面追求。」

張振朗:唔搞呢啲是非!

張振朗:「淨係話嫌疑人幾靚仔呢下,已經好肯定唔係講緊坤哥喇啩?唔好推個波埋我度,我哋成班《愛‧回家》演員係好朋友,會一齊玩,我嚟演戲,唔搞呢啲是非,都係等陳潔玲自己回應番。我同佢完全冇可能!(因為名草有主?)梗係啦呢樣嘢!」

何廣沛:呢招可以參考

何廣沛:「唔關我事!聽到呢單嘢得啖笑。我同陳潔玲都係26期訓練班畢業、又一齊拍過《激優一族》,不過都係一個星期錄一次影,唔算太熟,早排拍嘢都喺南生圍撞過佢,又冇向佢求證過呢樣嘢。其實呢個渣男我都想知係邊個,呢招扮可憐媾女我都係第一次聽,算唔算係高手中嘅高手呢?我就未用過喇,不過可以參考吓喎!」

緋聞多 坤哥成最大嫌疑

陳潔玲話到明嫌疑人「幾靚仔」已經等於幫坤哥避嫌,不過一句「個底好花」,網民留言十個有九個半都話渣男一定係佢。其實又唔怪得班網民敏感,入行七年,坤哥由參加《超級巨星2》參賽對手林欣彤開始,緋聞對象橫跨歌影視以及網紅四界從未間斷,最高紀錄包括吳若希、龔嘉欣、SuperGirls成員Aka及Heidi、譚淇淇、周秀娜、王卓淇甚至許廷鏗易服助手「阿小」都做過其「背後女人」,個底花到咁、難怪坤哥都話要檢討吓。

繼Aka、Heidi、吳若希、譚淇淇、周秀娜等緋聞對象後,坤哥參演《愛‧回家》再被指搭上龔嘉欣, 結果搞到疑似正印王卓淇鬧爆有人做小三。

 

27歲坤哥其貌不揚,首本名曲又首首道盡做兵淒涼,不過實情出道至今緋聞史厚過電話簿,最出名就係同SuperGirls隊長Aka發展半年地下情後,又轉軚追隊友Heidi。

坤哥除了〈原來她不夠愛我〉外,最出名當然係「食好西」!其貌不揚但身邊靚女多籮籮,仲不時有近距離親密接觸!AV女神波多野結衣、網絡娘娘杜小喬,仲有眾多TVB姐仔,實在難怪一眾男士大叫葡萄!

全文完