姚樂怡拍劇遭老前輩抽水！重溫娛樂圈九大「鹹豬手」事件
姚樂怡 自爆拍劇遭老前輩「鹹豬手」
「七魔女」在節目閒談間，講到有否被男藝人「抽水」，眾魔女坦言有類似經歷，其中姚樂怡更分享她擊退「鹹豬手」的招數，她說：「舊時拍劇有個老前輩傾偈嗰時，會有意無意咁摸身摸勢，我咪笑住同佢講：『唔好Body Check我啦老爺！』之後有場戲見到佢，佢又想摸我，我就再講：『你又Body Check啊？』佢呢次就知我話緊佢，以後唔敢亂嚟。」之不過佢冇開名講係邊個老前輩，真相不得而知！
姚樂怡 走性感路線
現年45歲的姚樂怡出道時憑34C豐滿上圍而出位，98年加入TVB後不久被安排與梁雪湄、汪曉文（現名汪琳）、雷穎怡（現名雷晴雯）、梁佩盈、任港秀、翟佩雲和李慧萍（現名李思蓓）組成電波少女，之後姚樂怡都拍過不少劇集，但都係做配角居多。
重溫娛圈九大鹹豬手事件！
傳魏焌皓疑鹹豬嘴麥明詩被TVB解約
今年28歲的藝人魏焌皓，於2009年在無綫藝人訓練班畢業，其後亦參演過不少劇集，直至12年的《On Call 36小時》中飾演馬國明的細佬「張一康」一角後，漸漸為人認識。之後佢喺《不懂撒嬌的女人》和《使徒行者2》亦有不俗演出。
《使徒行者2》中，魏焌皓扮演由忠變奸的黑警朱志彬，劇中更槍殺心愛的戀人麥明詩，形象因而更為入屋。
魏焌皓疑鹹豬嘴女星…
魏焌皓靚仔又大隻，在《使徒行者2》中扮演黑警朱志彬入型入格，外界都以為佢可以逐漸上位，但去年4月突然離開TVB，有傳係魏焌皓被指拍攝《使2》期間對同劇麥明詩犯了不當行為，疑似在劇外「強吻」女方，魏焌皓對事件堅稱「一定冇！」，並表示對指控「一頭霧水」。當事人麥明詩回傳媒時，表示要等魏焌皓回應後，自己先會回應… 呢個回應令事件更耐人尋味。
魏焌皓本來有份演出同樣有麥明詩的《是咁的，法官閣下》，但現時其角色已被抽起，最後還被TVB解約…
TVB魔術男咸豬手事件
08年底，苑瓊丹喺港台節目《瘋SHOW快活人》大爆TVB有男藝員借變魔術為名揩油。當時苑瓊丹列出線索：高過黃宗澤(即是180cm)、斯文靚仔、識煮幾味、常拍旅遊節目、鍾意玩魔術、曾同女藝人秘密拍拖，而傳媒同網民猜測最大嫌疑人係蔡子健。由於事件愈鬧愈大，無綫電視其後更安排苑瓊丹接受《東張西望》訪問，苑瓊丹承認曾與樂易玲小姐見面，並就此事向公眾交待清楚。
對於連日來被追問誰是「魔術鹹豬手」，苑瓊丹就話：「我絕對唔會講人名，花邊新聞的原則是開心、唔講名，以降低殺傷力。當日我在節目中提到嘅特徵，有真有假，我唔會回應哪些是真、哪些是假，希望對當事人有警剔作用，我已盡量幫忙。」佢又重申沒有講過「魔術鹹豬手」是無綫藝人，她只是形容對方是「不活躍的男藝人」，「我做電台節目只想給聽眾娛樂增值，唔想掀起風波」。有指「魔術鹹豬手」事件令多位身高逾180cm的男藝人受牽連，苑瓊丹笑說：「他們錯在生得高大、靚仔、威猛又太出名。表現看事件是壞事，但也證明他們有市場價值，無論如何，要是因為事件而添煩擾，我向他們Say Sorry，以後見到我也不要掉頭走。」……最後事件不了了之。
官恩娜爆有男藝人借醉行兇
09年初，官恩娜被傳媒問到有冇聽聞過「魔術咸豬手」一事，結果ELLA忽然自爆出埠拍TVB劇時，有女藝人同佢訴苦，話有同行男藝員飯後借醉上下其手。
事件曝光後，曾與官恩娜合拍電視劇《酒店風雲》的藝員當中包括馬德鐘、郭政鴻、郭可盈、吳卓羲、姚子羚等紛紛被列為嫌疑及受害人物，搞到人心惶惶。同時有網民猜測係拍劇集《酒店風雲》期間，而嫌疑人為郭政鴻，受害者係周家怡，但周家怡否認有其事，而郭政鴻嬲爆話要出律師信…
TVB高層對此事大為震怒，召見官恩娜，無綫製作資源部總監樂易玲命令官恩娜封口，最後結局係，官恩娜為事件道歉及認錯，於2009年2月10日她透過無綫向各大傳媒發放聲明，坦誠向受影響的藝人道歉，並多謝無綫的體諒及支持！
李志剛、AOA雪炫
港台DJ李志剛在「第六屆香港亞洲流行音樂節」喺台上無厘頭向表演嘉賓韓國女團AOA成員雪炫擁抱，又無端端伸腳疑似觸碰雪炫下體，李志剛回應時話喺台上透過翻譯問過雪炫，而對方都曾經點頭，故並非強行抽水。李志剛又話「希望fans唔好唔開心」，同時又話「我自己就好開心」。
馬德鐘、陳浩民、陳嘉恆
19歲陳嘉桓（Rose）在內地橫店拍攝王晶電影《笑功震武林》期間，本刊拍得同洪天明、馬德鐘、陳浩民一眾台前幕後宵夜期間，陳浩民對陳嘉桓強吻及施龍爪手，之後到馬德鐘就攬住陳嘉桓。
事後陳嘉桓素顏開記招兼報警，陳浩民初時自稱「好客」，後來陳浩民在大肚妻蔣麗莎陪同下開記招，陳浩民流淚道歉。而馬德鐘就指自己當時係安慰陳嘉桓並不是抽水，但亦被各界指責佢當時對陳浩民的行為竟視若無睹，未有施以緩手。
尹天照、王秀琳
04年，亞視劇集《我和殭屍有個約會3永恆國度》，有份參演嘅尹天照、陳寶轅、王秀琳等演員在8月飯聚，而王秀琳9月開記招指當日飯局後坐尹天照車返屋企，被尹天照拖手、強吻兼伸手入衫，報警求助。尹天照堅稱無辜，並且不介意同佢對質，最終亦無畀警方起訴，事件不了了之。
海俊傑、劉綽琪、吳亭欣
06年，海俊傑拍亞視劇《義無反顧》期間，被劉綽琪指喺片場播四仔，又被劉綽琪及吳亭欣指強姦戲太逼真，留下心理陰影。海俊傑就質疑劉綽琪點解唔報警，暗串對方博宣傳。
楊思琦 慘被熊抱
06年楊思琦在金鐘擔任模特兒行騷，穿上低胸透視裝並露黑 bra，品牌的國際副總裁Steve Holt在台上對思琦虎視眈眈，更當眾又攬又錫，為保飯碗的思琦只能尷尬苦笑，完全沒有反抗餘地，超慘！
李子奇、劉錦玲 抽水疑雲
拍劇出事嘅仲有呢單，02年劉錦玲拍《絕世好爸》一場分手戲，講佢要畀李子奇掟落梳化，有傳當時劉錦玲問李子奇係咪錯手掂到佢個胸，但對方可能覺得被屈博懵非禮，鬧喊劉錦玲。不過李子奇喺09年話5年後劉錦玲已幫佢平反，而劉錦玲早已轉職做咗保險。
將來還有什麼演唱會值得留意？
有不少歌手宣布舉辦演唱會，小編為你整合了2023香港演唱會+搶飛攻略一覽，包含各演唱會優先購票日期、公開售票日期、門票價錢、座位表等，想搶飛粉絲必定要留意！
