黎瑞恩

黎瑞恩 離婚有傷㾗 擇偶要錫子女

小恩子黎瑞恩將於4月舉行《感恩有你》演唱會,她在訪問中剖白自己失婚的感受,以及跟子女之間的相處⋯⋯

撰文:東方新地

圖片:新傳媒圖片庫、黎瑞恩FB

黎瑞恩:寶麗金冇是非

當年寶麗金七小花有黎瑞恩、湯寶如、王馨平、周慧敏、劉小慧、關淑怡、陳慧嫻,咁多女仔,其實有冇不和是非、爭歌唱?黎瑞恩笑言:「真係冇喎!因為歌全部都係監製畀,同埋我嗰時都冇乜所謂,佢覺得好聽咪畀我唱,個個都唔同style,冇理由話我鍾意佢嗰啲歌,我最多聽到覺得鍾意,問可唔可以寫隻好似咁嘅畀我,但爭真係冇,因為公司真係分配得好好,大家都唔同style。」講到當年都算一出即紅,中間有冇捱過?「真係都幾感恩,我算係好幸運嘅一個人,一出有一隻〈 發誓 〉,一路都好順風順水,仲有一隻屬於自己嘅歌〈 一人有一個夢想 〉,我諗我做咗七年度就冇做,墮入咗愛河之後就冇做。」

黎瑞恩
前陣子感染流感,令工作進度被迫煞停,但黎瑞恩選擇樂觀面對,並視為休息的機會。

自認惡媽媽

離婚後要好耐時間先復原?「咁正常嘅人都係㗎啦,冇理由離咗婚之後勁開心㗎嘛,都有啲傷痕㗎嘛,會諗番一啲過去開心嘅日子,但係時間係會沖淡一切嘅,好快就過去咗,我好快冇事,不過都需要時間囉,一、兩年都少不免嘅!我依家都未搵到第二春,有冇好介紹?哈哈!」黎瑞恩指當初離婚時,有話畀仔女聽發生咩事:「雖然佢哋好細個,但都會好明。」又指自己係超惡嘅媽媽:「例如我好唔鍾意啲細路仔食飯,攤成粒鐘都唔食,我會有時限,總之半個鐘頭之內要食晒,唔食晒我就拎走,冇得食㗎嘞,我覺得教係要咁教!」

黎瑞恩
黎瑞恩教仔女見到男仔就叫哥哥,女仔就叫姐姐:「要學識做人,所以冇人叫我Aunt,通常叫我小恩姐,我會話唔好加個姐字。」

擇偶要錫子女

問黎瑞恩身為單親媽媽,壓力係咪會更加大?佢話:「咁又冇喎,其實一個人有冇壓力係你自己畀嘅啫,冇話單親唔單親嘅。我以前都會居安思危,會諗依家生活好好,如果有一日生活唔好咁點呢?我都會教啲小朋友自己煮飯、學洗衫、摺被⋯⋯當有一日,冇晒啲工人,你點呢?生活唔到呀?唔會㗎嘛!我如果有咩事,我有咩辦法可以能夠養活到自己呢?我會唱歌㗎嘛,唱歌、做吓騷都應該OK嘅!」講到有傳攞咗好大筆贍養費,黎瑞恩笑問:「幾時攞㗎?冇囉,哈!但我前夫對我哋都好好,都好照顧我哋,都好多謝佢。我同前夫依家關係良好,最緊要大家開心。」

黎瑞恩
女兒在澳洲留學,黎瑞恩表示:「冇話捨唔捨得,始終小朋友會變大人㗎嘛!大個咗佢都會離開你,有自己嘅生活㗎嘛!同埋去讀書,快啲學識獨立。」

黎瑞恩直言如果佢要拍拖嘅話,男朋友一定要好錫佢啲仔女,又笑指:「唔知佢哋畀唔畀呀,佢哋會話:『最好唔好啦,最好我霸晒你啦,你都唔夠時間畀我哋,仲拍乜嘢拖吖!』」而問到黎瑞恩仔女有冇演藝潛質?如果佢哋話做呢行畀唔畀?黎瑞恩話:「有㗎,我唔會話唔畀囉,最緊要讀晒要讀嘅書先,到時你自己選擇,我畀佢自己選擇。」

黎瑞恩
有報道指黎瑞恩擁有十六間房的豪宅,佢話:「租番嚟咋喎,都要畀租㗎!」

感情狀況空白

黎瑞恩自言依家感情狀況空白,對於報道寫嘅緋聞男友鄭應南,佢大笑話:「報紙寫嗰啲你都信!哈哈哈哈哈!鄭應南係我嘅朋友。至於有冇發展機會,我唔知喎,真係好難講㗎喎,朋友嘅嘢點知啫。我真係唔知依家有冇人追,我點會知?但我真係好多男性嘅朋友,個個禮拜都有人約我食飯,係一班男人,所以我真係唔知。」

黎瑞恩
黎瑞恩指自己一對仔女都係開心人:「尤其係我個女比我更加之樂觀,同埋更加之明事理,哈!我個仔都仲係一個小朋友,男仔係咁㗎啦,冇女仔咁成熟嘅,但係兩個心地都非常之好。」

問黎瑞恩仲相唔相信婚姻?佢話:「喺我呢個時間,我唔覺得有需要再結婚,如果有一個啱嘅人,一齊開心咪得囉!」仲可以追多兩個?「嘩!唔追啦,唔好玩啦,哈哈!好嘥神㗎,仲要教佢呢,我成日覺得湊一個細路唔係有錢就得,要有人幫你湊啦,唔係淨係湊咁簡單,要用心機教。」

黎瑞恩
說到為她的感情事著急,黎瑞恩即笑言:「唔使咁緊張,我都未緊張。」