朱晨麗

朱晨麗憶初來港住劏房:我冇用屋企錢!

朱晨麗(Rebecca)身為2011年度港姐冠軍、無綫萬千星輝頒獎典禮「最佳女配角」得主,原來佢初來港時都經歷過唔少辛酸,為咗堅持獨立唔使屋企錢,佢曾經住過劏房,又為咗慳多少少,要一早起身搭電車、唔食lunch等食下午茶,實行慳得一蚊得一蚊!

撰文:東方新地|圖片:新傳媒圖片庫、朱晨麗IG

朱晨麗 想搣甩「翻版陳法拉」

訪問中談及朱晨麗自細跳舞,係專業舞者,問佢跳開咩類型嘅舞?朱晨麗表示:「我跳拉丁舞、中國舞,最尾十歲先學芭蕾舞,一路變成一個專業嘅舞蹈員。其實跳舞好辛苦,會覺得係用汗水換嚟開心。Enjoy嘅係觀眾。譬如我有傷,都要捱痛,始終觀眾係畀錢買票,我都要對得住佢哋。」

朱晨麗
《棟仁的時光》中朱晨麗演鋼管舞蹈員,大跳鋼管舞,專業舞者身段成網民熱議焦點。

放棄舞蹈 投身演藝

點解唔繼續舞蹈發展,轉而投身演藝?朱晨麗憶述:「嗰時我突然有一日問自己,點解跳咗咁耐舞依然喺度,諗會唔會做吓其他嘢,然後見到電視有港姐選美嘅promo,我就諗不如試吓,乜都試吓,橫豎都想試吓其他嘢,就遞咗表格,我喺香港冇乜親戚朋友,聽人講選美界可能需要有啲background或者有啲好勁嘅人提名,先可以入選,點知打電話嚟叫我面試,我仲諗係咪詐騙電話?我都唔知TVB喺邊,將軍澳?上網search,嘩,好遠喎!究竟係咪假㗎?去到,原來真係嘅!」

朱晨麗

講到朱晨麗參選時係大熱門,佢笑言:「好彩、幸運,都要多謝啲傳媒幫我寫得幾好,我仲記得嗰時寫我係翻版蔡依林,又話我係跳舞界嘅尖子,都寫得好正面,以前睇好多八卦新聞,都有負面嘅新聞,點知對我都幾好喎,公司又覺得我都有潛質,就咁一路行落去。」但講得最多,當然話佢係「翻版陳法拉」,問朱晨麗見過陳法拉未?佢答:「有見過,我記得我選完,仲戴住個后冠,佢同佢媽咪入嚟後台,佢媽咪好熱情、好開心話:『哎吔,你哋兩個話好似樣,快啲一齊影張相!』之後到我哋喺《衝上雲霄II》合作,佢做機師,我做空姐,其實好少一齊嘅場口,但係啲工作人員就話:『翻版陳法拉呀,你有替身嘞!』我同法拉就望一望,我覺得我哋一啲都唔似囉,可能自己唔會覺得自己似另外一個人,但有呢個朵都幾好嘅,更加可以令人哋認識,但我都希望盡快可以搣甩佢,快啲有『翻版朱晨麗』啦!」

朱晨麗
選港姐前,朱晨麗是香港芭蕾舞蹈團的專業舞者:「我諗觀眾都enjoy,因為每次演出,場場都爆晒!」

朱晨麗

住過劏房

朱晨麗2011年選完港姐,2012年已經頂替受傷嘅法拉拍《名媛望族》,問佢覺得自己入行以來,發展成點?朱晨麗回憶:「嗰時啱啱選完入行,真係乜都唔識,唔好話演戲,對於娛樂圈、廣東話、做人處事,乜嘢都唔識,人都唔識,去到試鏡,有劇本畀我,都請埋資深嘅演員同我配戲,試戲嗰陣,一嚟就要我喊,我真係喊唔出,導演拉埋我一邊、講咗個秘訣畀我聽,佢話:『你諗吓屋企人,諗吓有啲咩比較傷心嘅事。』我即刻喊到收唔到,嗰次真係第一次釋放,第一次唔係因為某啲事而喊,之後就選咗我拍,話咁快有得拍劇,鏡頭同燈喺邊都唔識,so far公司一路畀好多機會我,今年又畀咗個獎我,好開心、感恩!」

朱晨麗
選港姐時朱晨麗因樣貌似陳法拉,而被封為「翻版陳法拉」,更因此在當選翌年代替受傷的陳法拉接拍重頭劇《名媛望族》,擔任第三女主角。

朱晨麗

朱晨麗又坦言中間都有捱過嘅階段:「我相信每個演員都有呢個階段。我選完之後,好多人認識,當去到演員嘅階段就需要轉變、點去磨練自己,因為以前跳芭蕾舞係唔需要同人相處嘅,日日都係見呢班人,去到一個新環境,點樣可以去融合佢哋、點樣可以去更加投入演戲?到依家都係磨練緊,廣東話都係。」

朱晨麗
不說不知朱晨麗原來是慳妹一名,初來港時為慳錢慳招盡出,有時食個包都可當一餐。
陳法拉 朱晨麗
正版陳法拉,到底同朱晨麗有幾似?

至於經濟上,朱晨麗直言自己其實好獨立:「我喺美國讀書時攞獎學金,每年都有攞,我嚟香港其實同爹哋嗌咗交,佢唔希望我去到咁遠,佢覺得點解要去到咁遠,跳芭蕾舞去上海咪得囉,去北京都得呀!我好倔強執著,一定要嚟香港,嚟到我無用屋企錢,自己試吓獨立,租劏房,學校畀我啲獎學金我就儲埋,我每日都會攞本簿計住搭咩車,我知道搭巴士貴過搭電車,就搭電車,早少少起身囉,可以慳番好多錢㗎!食下午茶平過lunch,等到下午茶嗰陣先食囉!但我一路都無話畀屋企人知住過劏房,如果佢哋知道會心痛囉,肯定唔畀我繼續落去。」

朱晨麗
講到依家苦盡甘來,係港姐冠軍,又攞埋「最佳女配角」,朱晨麗直言好開心:「由一個無人識嘅平民,到依家去親街都有人叫我二小姐(《超時空男臣》內角色),咁多人識我,同我講:『朱晨麗,可唔可以影相?』都開心嘅!」

朱晨麗