林奕匡

09年入行 走過高山低谷 林奕匡 靠家人匯錢接濟

現年33歲的唱作歌手林奕匡(Phil)在09年入行,直至2014年才憑歌曲〈高山低谷〉走紅,在事業上他亦曾經歷過高山低谷,他接受本刊訪問時,就大方分享入行後經歷過的事業低潮、經濟上的壓力,以及家人的支持⋯⋯

撰文:東方新地|圖片:新傳媒圖片庫、林奕匡IG

林奕匡 07年參加新秀

林奕匡在加拿大出生、長大,問係咩驅使佢想嚟香港發展?林奕匡回答:「主要係睇香港電視劇同廣東歌,香港好似我好熟悉嘅地方,但同樣地好陌生,因為未嚟過。第一次嚟香港係05年,都幾鍾意,07年參加新秀,令我決定真係要試吓,當年逗留唔係好長時間,留咗個零月,已經有唱片公司想簽我,當時我爭半年讀完書,我話等我讀埋書先,加埋籌備吓,對方都話好,半年後我返香港諗住大展拳腳,但對方話:『唔好意思,我哋有新嘅計劃,祝你好運!』既然佢咁講,我再造Demo再試,無反應呀,再學多啲嘢,我嚟到香港先正式學琴,買電腦學作曲、編曲,用好多時間鑽研,個零月後,有次寄Demo畀幾間唱片公司,Sony聯絡我,就約出嚟傾。」

林奕匡

第一間想簽林奕匡嘅公司今時今日有冇覺得跌眼鏡?林奕匡笑言:「嗰間公司已經唔存在嘞,證明有啲嘢係整定,嗰刻我其實未ready,而如果佢哋係睇長線,無理由隔咗六個月就會覺得呢個人唔掂,或者無咗talent,唔會㗎嘛,我只會更成熟,同期間我係有準備㗎嘛,所以都睇得出佢哋唔係好長遠,唔似我依家嘅唱片公司。」

林奕匡

諗過放棄

而講到第一、二隻碟無預期之中咁爆,林奕匡直言:「可能呢啲就叫高山低谷啩!出嘅時候你梗係好有信心,如果唔係,我都唔由加拿大嚟啦!有呢個信心,先有勇氣放低嗰邊嘅生活、一切,而當好期待,終於出碟嘞,點知『嘩,咁嘅?點解咁㗎?』原來嗰時啱啱版稅糾紛,無得上主要嘅電視平台,我嘅歌又無得喺卡拉OK出現,作為一個新人,係極之唔理想嘅出道時間。我好幸運有第三次機會,我都知道第三次機會應該係最後一次,12年嘅時候計劃緊,嗰時版稅糾紛開始解決,自己又成熟咗,自己不停去寫歌,歌手好被動,但我至少可以寫歌,可以寫畀自己、寫畀人,有時間㗎嘛,我喺屋企日日都無嘢做嘅,就寫寫寫。」

林奕匡

林奕匡續說:「有次交咗啲Demo畀我依家嘅唱片監製,佢話:『真係成熟咗,多咗一種態度,好,我幫你做隻碟,信我,一定成功嘅!』好多人話:『林奕匡無放棄過呀!係好好嘅榜樣!』但其實我點會無諗過放棄吖,但喺咩情況放棄我覺得係重要嘅,如果試勻晒、做晒所有嘢都唔得嘅話,係要識得放手,因為夢唔可以發一世,嗰時我都三十歲啦,嗰隻碟我覺得係可以輸嘅,所以我有咩都放晒落去,做到最好,唔得咪走囉,好幸運地,有首歌大家係欣賞,令到我可以留得低!」

林奕匡

係天時、地利、人和,加埋個人成熟咗,知道點去玩娛樂圈嘅遊戲?林奕匡表示:「唔好話知道點玩,起碼懂得多啲。我記得啱啱嚟香港,公司同事同我講:『你好似天上面跌落嚟嘅綿羊,嚟到香港呢個複雜之地,好容易畀人食咗!』哈!都係,我喺加拿大出世、長大,我住嘅係小鎮,得嗰七千人,無地鐵、巴士一個鐘頭先有一班、得一條線,無戲院,想買一隻張學友嘅專輯,要搭兩個鐘巴士,再搭兩個鐘船,再搭一個鐘巴士落唐人街,買完,又要五個鐘先返到去。哈哈!一嚟到香港,嘩,地鐵三分鐘一班,可以真係去睇演唱會,唔係睇播碟,到處都有公開活動、見到明星,係唔同!」

林奕匡

家人匯錢接濟

〈高山低谷〉呢首歌之前,有冇經濟上嘅低谷要捱?抑或你家庭環境都OK、幫到手?林奕匡憶述:「頭嗰四、五年係OK嘅,因為屋企人開餐館,我六、七歲已經幫手,十歲開始畀零用錢我,我儲儲儲⋯⋯我嚟香港前,筆錢都有四十幾、五十萬港紙。夠搣到四、五年啦,初頭容易嘅,最初我住得遠啲,嗰時使費都平,買個印尼炒飯廿八蚊,依家六十幾蚊。入咗行使費多好多,唔通唔學唱歌咩?學琴、結他全部都係錢,去到第五年,真係坐食山崩,唔敢去睇銀行剩低幾錢,我係好怕去面對負面嘅嘢,到去提款機撳唔到出嚟,咪知少過一百蚊囉!」

林奕匡多得父母精神及經濟上的支持才可以繼續追尋夢想。

林奕匡續言:「係幾難受嘅,唔想問屋企人攞錢,更加唔會要女朋友養我,佢已經等我咁多年,我照顧唔到佢,已經有罪惡感,嗰時知道仲有一次機會,試埋佢囉!打電話同屋企人講:『我好唔開心令你哋咁擔心我⋯⋯』我媽咪話:『仔,我哋唔係擔心你,係痛心。我哋咁辛苦都係希望你同哥哥讀到書,做想做嘅嘢,唔使好似我哋咁辛苦。』」

如果沒有選擇做歌手,林奕匡應該同哥哥一樣做科學家研究基因。

「我腦海即刻諗起佢哋喺餐館做嘢,佢哋一個禮拜做超過一百個鐘、一日十五、六個鐘,我即刻諗弊嘞,我係咪揀錯路?係咪做咗exactly佢哋唔想我做嘅事呢?又辛苦、又無經濟回報、又浪費咗咁多時間⋯⋯佢哋知我有多次機會,話:『去埋佢啦!』匯咗錢畀我度過難關。後來我阿哥同我講爸爸媽媽好慳,逐仙逐仙計、所有嘢計得好盡,就係驚我喺香港無錢用,諗住留畀我用。」

Phil Lam 林奕匡(@saxyphil)分享的貼文 張貼

母親節快樂! 😘😘😘 謝謝你讓我這樣任性 💙💙💙愛你!(爸爸我都愛你) #母親節 #mothersday
Phil Lam 林奕匡(@saxyphil)分享的貼文 於 張貼

冇嘢做多嘢諗

問林奕匡當時心知係佢最後機會,有冇緊張到瞓唔著?佢否認:「無緊張到瞓唔著,反而之前就真係瞓唔著嘞,人哋話『太多嘢做好攰』,我調轉,無嘢做,瞓唔到覺,因為好多嘢諗,凌晨四、五、六點都瞓唔到,去廚房飲杯奶,踎喺度諗,夜瞓攰第朝又晏起身,惡性循環。到畀我再造歌,我將所有嘢擺晒落去,至少知道盡咗力,問心無愧,嗰時就瞓得好好。」

林奕匡

而問到佢覺得〈高山低谷〉成功元素喺邊?林奕匡就表示:「份詞寫得好好,個故事講到好多香港人心聲,講咗香港人嘅拼勁、努力,但都同想去到嘅目標有好大距離,當然世界好多地方都有咁嘅情況,但香港似乎特別多,可能因為咁中咗大家個心。」

Phil Lam 林奕匡(@saxyphil)分享的貼文 張貼

見盡跟紅頂白

呢首歌之後,有冇原本當佢透明嘅人,對佢四萬咁口?林奕匡直言:「一定有啦,雖然任何人支持,我都覺得開心,但自己都會知邊啲係朋友,邊啲唔係。有啲人五年都無傾過一句偈,突然間好多嘢講,話:『喂,我哋嗰時都幾好,聯絡番吖!』」

Phil Lam 林奕匡(@saxyphil)分享的貼文 張貼

講到走紅之後,林奕匡條路好順,收入都好順,佢笑言:「點都順過之前,但都有其他嘅挑戰,作為觀眾,我都會貪新鮮啦、都會聽唔同嘅嘢。有啲人最鍾意林奕匡:『佢唔開心、佢低谷呀!」但我無可能永遠作歌都向呢個方向,但我變咗,有啲人又唔鍾意,好矛盾。我唯一可以做,就係每次造歌,個message係有意義。我都相信大家對我要求係高咗,所以要不斷去鞭策自己。」

DSE放榜,就是明天!我和考生們一樣很緊張,因為今天的#失敗之道分享會 第4集,主角是我。 很多人都覺得我是一個很正面的人,但你知不知道,我也有過想放棄的時候? 現在,就來聽聽我的失敗經歷,我的失敗之道。 #林奕匡 #失敗之道分享會 #DSE #放榜 #高山低谷

Phil Lam 林奕匡(@saxyphil)分享的貼文 於 張貼

近年被指曲風同唱法似陳百強,林奕匡表示:「我細個沖涼有唱佢啲歌㗎,當時媽咪話我聽佢死咗,我都好唔開心。佢都係會作曲、唱歌嘅鋼琴王子,同佢相比無得比,但大家咁講,都係好榮幸嘅事。」

Phil Lam 林奕匡(@saxyphil)分享的貼文 張貼

依家個餅細咗

而提及依家做歌手唔係講賣碟,係講點擊,係難咗定易咗?林奕匡回答:「我覺得一定難咗嘅,因為機會少咗、計算多咗,個餅係細咗。以前係電台播歌推介你聽,依家係自己揀選音樂,英文、韓文歌⋯⋯以前做唱片有side track,你無預計會紅嘅歌,紅咗,因為無咁多計算,但依家每隻歌,無論隻歌背後要有故事,MV再有個故事,度晒好多嘅元素,但其實做音樂有時唔使咁複雜嘅。我反而覺得最free、最自然嘅嘢係最直接感動到人。作為一個聽眾,陳奕迅二千年代嘅歌全部都好聽,下世紀都依然好聽,點解要聽新歌?咁嘅情況新歌係難啲滲到去市場。」

Phil Lam 林奕匡(@saxyphil)分享的貼文 張貼

點解淨係做歌手?有冇諗過拍戲、拍劇?林奕匡表示:「有諗過嘅,但係始終音樂係我入行嘅一點,大家畀機會我留喺香港,係音樂上大家對我嘅信任,我會做好佢先!」而問到幾時開個人紅館演唱會?佢話:「我成日覺得紅館係樂壇一個最頂嘅位,我要準備得好好、好有經驗,喺台上好自在嘅時候,先襯得起件事。我對自己有信心,我覺得長遠有一日會去到嘅,我仲有好多空間進步,我覺得行穩步啲係OK嘅。」

Phil Lam 林奕匡(@saxyphil)分享的貼文 張貼

原名林漢輝,藝名林奕匡是公司找專人為他改,笑言:「我好鍾意,陳奕迅嘅奕、倪匡嘅匡,希望唱好似陳奕迅咁好,作詞好似倪匡咁就好啦!」

Phil Lam 林奕匡(@saxyphil)分享的貼文 張貼

接連得到主要頒獎禮「最佳創作歌手金獎」、「唱作人金獎」,林奕匡雖身處小高峰,但不敢自滿鬆懈,直言:「我相信大家對我要求係高咗,要不斷去鞭策自己。」

林奕匡

林奕匡說低谷期時,「試過出商場騷,叫埋朋友嚟,都係得十零廿人睇。」出了兩張唱片反應卻未如預期,「計劃出第三張碟,但唔知幾時去行,因為行錯咗就係最後一步。」

林奕匡