歐鎧淳

歐鎧淳唔急諗退役 讚運動員係筍工

泳界女神、去年半隻腳踏入娛樂圈嘅歐鎧淳,在訪問中大談佢嘅運動員生涯,以及退役後嘅打算。

撰文:東方新地|圖片:新傳媒圖片庫、歐鎧淳IG

歐鎧淳 靠朋友頂住

講到最初點解學游水?歐鎧淳表示:「因為爹哋話如果媽咪同我跌落水,佢唔會救我,所以我要學游水!細個同一班朋友仔一齊,覺得開心、好玩,到依家都係,因為有一班朋友,所以我先會繼續頂住。如果唔係好悶㗎、好容易會放棄!」

歐鎧淳
問到自小學加入泳隊,有冇影響學業?歐鎧淳話:「冇,學校要我哋有中等嘅讀書水平,先會畀你做其他嘅課外活動。」

問歐鎧淳如果淨係游水,冇做娛樂圈工作,夠唔夠維生?佢坦言:「我唔知係大家對運動員嘅接受程度高咗好多,令到運動員可以變成全職嘅生活,我哋做運動員可以搵到食,我覺得係相輔相成,某程度我哋都要有商業嘅活動可以支撐,始終大家都知道運動員本身嘅收入唔多,又唔係好長久,所以係要兩邊一齊做,但要搵到個平衡。」

歐鎧淳
要兼顧游水同娛樂圈嘅工作,歐鎧淳話一開始真係唔知點算:「可能做另外一邊嘅嘢太多,會覺得好攰,運動嗰邊嘅嘢又做得唔好。」

再唔開心都要游水

講到六年前歐鎧淳去美國柏克萊大學升學同參加泳隊,聽聞個教練好惡,問佢當時有冇遇到挫折?佢憶述:「個教練係好惡,日日都鬧我哋,嗰時覺得好唔開心,但冇諗過放棄,一路堅持練水,就算咩都唔想做、連學都唔返,都知道要去練水,好彩運動員嘅精神紮咗根,再唔開心都知道要去游水,最後終於游到好成績。」

歐鎧淳
歐鎧淳為香港十三項香港游泳紀錄保持者,並已參與三屆奧運。

問佢依家一個禮拜練幾耐水?歐鎧淳透露:「體院規定全職運動員要練二十五個鐘頭,包括練水、做Gym,其實係一日四至五個鐘頭,分兩節,每節大概兩個鐘多啲,所以我成日話做運動員係筍工,哈哈哈!」講到方力申指做游泳運動員頭髮會斷、皮膚會差,歐鎧淳就話:「呢啲係會有,我哋身上面係冇乜毛,因為已經浸到冇晒,眉毛都冇晒、皮膚會乾、頭髮會差。所以就要有護膚品廣告,哈哈哈!」

歐鎧淳
歐鎧淳透露最近忙於練習,準備亞運嘅選拔賽。

唔太鍾意做幕前

對於退役後嘅安排,歐鎧淳笑言:「我都當我依家參與娛樂圈、演藝事業睇吓會唔會係一個後路,至少我試過,自己知道鍾唔鍾意做、鍾意做啲乜嘢,就算喺呢個圈裡面,都有好多唔同嘅範疇可以做得到,但我自己覺得我唔係太過鍾意做幕前,我鍾意做安排嘅嘢,我覺得做P.R.或者Production好玩、好開心。」

歐鎧淳
歐鎧淳透露閒時愛好打麻雀:「游水嘅人嘅消遣好無聊,我覺得打麻雀好舒服。」

歐鎧淳直言有諗過退役後做教練:「都會想嘅,好得意,我做運動員,但完全冇教過水,因為教練話會畀人覺得運動員嘅形象唔專業,但我自己覺得教人可能更加了解自己游緊啲咩,有時都想因為咁試吓教,但我真係好忙,都要抽時間休息。」

歐鎧淳
講到被封為香港女神,歐鎧淳笑言:「我唔覺得係囉!我記得一開始係有呢個名,但係依家少咗講,都好開心大家記得我個名,我覺得都已經夠㗎嘞。」

歐鎧淳又指自己暫時仲未有認真諗過退役之後嘅打算:「因為至少8月、9月都仲有亞運,又數過奧運達標已經係下年嘅4月,要做嘅話都可以繼續試吓先,同埋依家社會嘅風氣變得咁快、對運動員嘅睇法又咁唔同,我未需要太焦急第時嘅去路,可以一步一步行出嚟。」

歐鎧淳
提到收入上開心咗好多,歐鎧淳表示:「的確有,因為始終我都要幫補家計,因為我係獨女,我覺得係要努力嘅,我都想爹哋媽咪可以舒舒服服退休!」

延伸閱讀:

林子善補擺喜酒 眼濕濕講愛的宣言

關鍵詞
歐鎧淳