郭晉安

郭晉安與歐倩怡結婚近12年:要迫老婆拍拖

入行33年、攞過三屆視帝嘅郭晉安,06年迎娶拍拖7年、細佢15歲嘅歐倩怡,婚後誕下一子一女,講到婚姻相處之道,郭晉安話最緊要係溝通:「每個禮拜都要抽一啲時間大家去傾偈,去番拍拖時去過嘅地方!」

撰文:東方新地|圖片:新傳媒圖片庫、郭晉安微博歐倩怡IG

郭晉安 同子女關係似朋友

問到演藝上、生意上仲有咩想做?現年53歲嘅郭晉安三句不離家庭:「我唔諗㗎嘞,譬如我盤生意都有我家姐睇住,我係做代言人,生意上嘅嘢我唔需要去諗,將來下一步要做啲咩呢,我會希望睇到我啲小朋友成長、讀大學,佢哋依家仲係小學,眨吓眼十嘞,我個仔啱啱過咗十歲生日。有好多嘢都要自己珍惜嘅,珍惜當下呢刻,我先至希望一步一步咁去做。」

郭晉安
訪問當天,郭晉安剛送完囝囝返學,並抽時間打了場網球:「keep住做唔同運動,打波或者做gym。」

問佢係咩類型嘅爸爸?惡定唔惡?同仔女關係係咪好close?郭晉安答:「依然都係一個好朋友嘅關係,我唔嚴厲嘅,有商有量,當然如果佢哋控制唔到自己情緒嘅時候,我有方法令佢哋calm down,但係都唔嚴厲嘅,唔會令佢哋覺得好驚,大家係有傾有講、商量嘅。但某啲情況, 佢哋係冇得決定,譬如旅行plan去邊,係由我去決定,呢個鍾意去睇公仔,嗰個想行玩具店,如果唔係就好混亂㗎嘞,呢啲嘢我會話畀佢哋聽,佢哋無得去揀。」

郭晉安
郭晉安說到娛樂圈中時有傳出有女星主動進擊:「有家室、有小朋友,要好好去規限住自己。」

仔女讀完書可入行

睇唔睇到仔女有演藝潛質?如果佢哋話入行,會唔會支持?郭晉安直言:「點都要讀完書先啦,阿女好啲嘅,阿女真係好鍾意跳舞,到依家都無放棄過,同埋好鍾意唱歌,但係我哋盡量喺屋企都好少表演,譬如我要登台,我等佢返咗學,我先練歌,佢原來從來都唔知我識唱歌。我登台啲歌佢無聽過,最近唯一同佢玩過一次,同佢合唱一首我即將登台唱嘅歌,佢好有興趣,發現佢係好鍾意表演。阿仔就好鍾意睇我拍戲,之前復活節嘅活動,就係帶佢睇我拍戲,佢好鍾意食我個飯盒,佢話個飯盒好好食,哈哈!佢好鍾意喺現場睇到一班人集中去做一樣嘢,可能引發佢第日鍾意做幕後囉!或者幕前都得?唔知呀,我好自由嘅,我唔會刻意唔畀佢哋入行,但我嘅原則係要佢哋完成學業先。」

郭晉安
曾因太專注小朋友,險跟太太出現婚姻危機,問到是否不涉第三者,郭晉安竟鬼馬笑言:「無嘅,唔知㗎,我以為㗎咋!」

有冇畀仔女睇自己啲作品?郭晉安笑言:「無呀,睇過一集咁多,嗰套係我做清裝,因為我想佢哋了解吓有清朝呢個朝代。佢哋讀嗰啲國際學校無呢方面嘅知識。佢啲同學反而有睇我嘅劇,同佢哋講:『你爸爸最近做衰人呀!你爸爸會殺人㗎!』哈哈!佢哋都係大個咗慢慢先分析到。同埋佢哋最近都會有啲要求嘅,譬如話『我髮型上應該要改變一下,唔想影到我嗰張相畀啲同學笑我個髮型。』開始有自我嘅形象。」

郭晉安
太太不時都有做娛樂圈工作,問郭晉安支唔支持?佢話:「我好隨心,無所謂,佢間唔中都有唱歌或者做活動。」

迫老婆拍拖

而講到夫妻相處之道,之前有報道指佢同太太出現過婚姻危機,問佢點發現?點解決?郭晉安透露:「我成日都聽到外面啲人會有一啲婚姻嘅危機,我自己都會審視吓自己。大家會覺得郭晉安同歐倩怡喺娛樂圈係一對模範夫妻,好似好穩定,有仔有女,好幸福家庭,其實呢個係外殼,裡面其實真係引申到好多問題,而呢啲問題係需要溝通,係嚟自生活、各自諗方法、為小朋友諗嘅嘢,我點樣睇佢、佢點樣睇我、我以為佢係咁、佢以為我係咁,當如果無溝通,久而久之,慢慢累積,有一日發現原來我對佢嘅諗法好陌生, 當我哋大家搵張紙寫以為對方點嘅時候,發現原來唔係咁,譬如我以為佢鍾意啲咩,佢鍾意嘅唔係咁。開始覺得每個禮拜要抽一啲時間,大家去傾偈,去番拍拖時曾經去過嘅地方。」

郭晉安
太太歐倩怡照顧家庭之餘,仍在供讀營養學,據知原因之一是為給子女作身教榜樣。

依家雨過天青,同太太點維繫感情?平時會做咩?郭晉安笑言:「都係繼續keep住去溝通、去傾、坦白。會唔會放低小朋友去拍拖?會呀,不過媽媽唔係咁主動嘅,媽媽始終個心係喺小朋友度,有陣時我要夾硬迫佢,話畀佢聽小朋友大㗎嘞,唔好再當佢好似細路仔咁,可以擺低佢哋畀工人湊住就得㗎嘞。」

CindyAuSinYi 歐倩怡(@cindyauau)分享的貼文 張貼

全家食得好健康

講番仔仔好鍾意食郭晉安開工個飯盒,係咪因為喺屋企食得好健康?郭晉安坦言:「其實我哋真係好健康,我哋健康到有時唔係幾好意思請人嚟我哋屋企食飯,因為我哋食到好淡,好怕人哋話『你畀啲咩我食呀!』我哋會食啲好新鮮嘅嘢,我哋食當日喺街市買嘅嘢,好簡單,以蔬菜為主,菜我哋唔落鹽又唔落油,真係劈嚿薑落去,烚熟就食。細路仔又唔會扁晒嘴嘅,佢哋都習慣咗。習慣到有陣時唔鍾意出街食,因為覺得好鹹,要搵水再沖,出去食佢哋會鍾意食西餐,食沙律、比較清啲嘅嘢,佢哋會接受啲。」

郭晉安
全家也習慣吃清淡食物,儘管外出用膳也選食材新鮮、講求原味的餐廳,郭晉安笑言:「我哋食嚟食去都係嗰幾間餐廳。」

郭晉安又透露太太間唔中都會親自下廚:「好間唔中,因為佢最近讀營養都好忙,有時都係交畀工人煮,但係如果佢煮,同一樣嘅嘢,佢煮嘅味道真係好出色!由佢唔識,開頭煮碟雞出嚟又鹹又苦,到依家煮得好好、好好食。」太太仲讀緊營養?郭晉安心疼說:「佢一星期有幾晚要上課程,又要去港大嘅lab做研究,讀咗好多年,依家最後衝刺,我見佢都幾辛苦。如果佢pass嘅話,可以執業做營養師,我覺得佢好有讀書嘅天份,但可能丟低咗太耐,依家要pick up番,我見到佢都幾辛苦。」

郭晉安
言語間,郭晉安充份體恤太太既要照顧家庭,又要堅持學業的辛酸:「又要返學,又要實習,做功課、考試,同佢一齊讀嗰啲同學先至廿幾歲!」

CindyAuSinYi 歐倩怡(@cindyauau)分享的貼文 張貼

CindyAuSinYi 歐倩怡(@cindyauau)分享的貼文 張貼