陳豪

陳豪拒學森美讓女兒早戀:男朋友係魔鬼!

46歲的陳豪四年抱三,家有兩仔一女,44歲的森美則育有一對分別14歲和12歲的兒女,兩人一見面,三句話不離老婆仔女。
講到仔女,森美口硬心軟,話要仔女吃吓苦,但一見女兒哭早把吃苦耐勞那一套丟到九霄雲外;而陳豪則前言不對後語,嗰頭話要畀兒女絕對自由,呢頭希望女兒工作以後才拍拖,方法是由細到大喺佢耳邊灌輸:「男朋友係魔鬼嚟㗎!」

撰文:東方新地|圖片:新傳媒圖片庫、陳豪IG

陳豪 考慮為小朋友搬屋

陳豪、森美繼《誇世代》後再為動畫《比得兔》配音,森美話佢哋兩個次次見到都好好傾:「會講keep fit、會講咖啡,又會講吓仔女經。」陳豪笑言:「一講到仔女就真係講唔停,由平時育兒到搵學校,大仔Aiden依家每程要成個鐘由屋企去對面海返學,我同Aimee都仲選擇緊,最希望三個小朋友讀同一間學校,搵啱,真係唔排除會為咗小朋友搬屋。」

陳豪 森美
入行24年,《比得兔》是陳豪第一次參與卡通片配音:「不過我標高1.5度高音配賓仔,仔女入場肯定認唔出爸爸把聲。」
森美 陳豪
自從做了爸爸,森美說為了能讓兒女入戲院聽自己把聲,就算減片酬都要接多些動畫配音。

陳豪

森美就分享佢嘅經驗:「我買樓時都有諗過地點應該就我定係就仔女,結果我哋住廣播道,佢哋要過香港仔返學。小朋友要畀佢哋吃吓苦,係就係遠啲,但有車坐,又唔使佢哋行!我以前住葵盛邨,學就喺赤柱返,夠遠喇啩?但其實香港遠極都有個譜。我最近先發現原來自己縱壞咗個女……我哋屋企每年新年因為假期就得啱,一家人都會去旅行滑雪。今年諗住玩啲唔同啦,留港拜吓年咁,個女竟然喊喎!我嬲到呢!」問佢嬲起上嚟會點做?森美話:「嬲到⋯⋯咪出年帶佢再去囉!」陳豪:「哈哈哈⋯⋯(恥笑mode)」

陳豪 森美
首次在電視劇合作,陳豪與森美這一「對」幕前出奇討好,幕後亦因為啱嘴形一見如故。

森美 陳豪

森美 陳豪

森美:女大女世界

森美又狂呻:「我出嚟做嘢之前,都係搭過一次飛機、跟阿爸阿媽跟團去泰國咋⋯⋯不過當然,我講係咁講嘅⋯⋯」陳豪取笑:「嗰頭即刻check定機票⋯⋯」森美直認:「係嘅!哈哈哈⋯⋯其實個女都生性。好似嚟緊個暑假,佢要求去英國讀summer course,但又有另一個活動要走兩個禮拜。我都唔想個暑假有成個月見唔到個女,但係女大女世界,小學六年班佢已經好有自己想法,話去英國想讀好啲英文喎,我仲有得反對咩?」

森美 陳豪
森美講過希望個女早啲拍拖、早啲學到嘢,但陳豪就希望女兒等到讀完書、出嚟做嘢先拍拖:「我會喺側邊不停灌輸佢:『男朋友係魔鬼嚟!』」
陳豪
13年結婚後,陳豪與陳茵媺四年抱三連生三個,陳豪說在家裡湊仔湊女盡量都是兩公婆親力親為,所以四年來未試過瞓足一覺。

講到口硬心軟,爸爸陳豪實好有體會?陳豪答:「係啦,不過我份人比較『腍』,唔係淨係對個女,係對個個都咁『腍』。雖然我哋生佢哋出嚟,但我相信為人父母要教導佢哋、幫佢哋成長,但係選擇就要留畀佢哋自己去揀。」而提到森美希望個女早啲拍拖、早啲受傷,就會早啲學到嘢,陳豪就表示:「我相信呢啲嘢佢講就講得兇狠啫!我比較注重學業,尤其係女仔,話就話畀佢自由,但我諗我會喺側邊不停灌輸佢,男朋友係魔鬼嚟!拍拖等到讀完書、出嚟做嘢先啦!」

森美 陳豪
森美去年全家出動 送14歲長子Lancelot去英 國升學:「眨吓眼森美小儀都廿周年紀念,見到個仔大,就體會到自己老咗好多、時間過得好快。」

識多咗卡通人物

問陳豪同森美做咗爸爸以後,係唔係睇多咗好多卡通片?森美話:「唔止睇多咗,配音仲多咗好多。」陳豪亦認同:「我都係,識多咗好多卡通人物,其實揀啲適合嘅陪佢哋睇,都教識小朋友好多人生道理,好似《比得兔》咁,講嘅係情。」森美補充:「冇錯,兄弟之間嘅情,仲有父母雖然唔喺度,對你嘅期待又有冇做到呢?我成日問小朋友,知唔知點解爸爸要鬧佢,個仔話,我想佢變得好⋯⋯我話唔係,爸爸鬧你係因為驚!驚有一日爸爸唔喺度,你哋做唔到,或者做得唔啱時,身邊唔會再有人提點。」

森美 陳豪

最後講到對於兒女的期待,森美說:「我一路做一路錯,一路由錯誤中學習,都希望將我嘅經歷話畀仔女知,希望佢哋可以錯少啲。有時見到啲好有意義嘅talk或者quote,都會即刻轉發畀仔女睇吓⋯⋯唉,仔大女大,佢哋當正長輩圖一樣咁收,擺到明從來都冇睇過囉!」而陳豪就話:「我希望仔女大個可以似我,心態健康、勇敢嘗試、視野要廣闊,同埋唔好怕失敗,識得喺失敗中學習。」

陳豪

關鍵詞
陳豪森美