黎耀祥

黎耀祥同老婆恩愛廿幾年:我哋價值觀幾一致!

三屆視帝黎耀祥同老婆梁耀蓮(Julia)結婚近21年,一直咁恩愛,在訪問中佢就大方分享佢同太太、囝囝之間嘅相處點滴。

撰文:東方新地|圖片:新傳媒圖片庫、黎耀祥IG

黎耀祥談夫妻相處之道:大原則要好相同

問黎耀祥結咗婚幾耐?夫妻相處之道係點?佢話:「二十幾年㗎嘞。我哋相處係OK嘅、舒服嘅。學習啦,我成日覺得做人都係不斷嘅學習,做老公、老婆、仔女都好,因為無經驗,大家都係嚟到呢一世先識嘅啫,上一世點做我又唔記得咗,所以教仔嘅方法、同老婆相處嘅方法,其實每日都學緊。係咪好恩愛?其實我哋都有衝突㗎,一樣嗌交、一樣有唔開心嘅時候,我同我太太好明白,兩夫婦點樣走埋人生嘅路,最緊要大原則要好相同,譬如對錢銀、人生嘅步伐要同步或者近似,好彩我哋喺價值觀上都幾一致,又唔係太過緊張、又唔係太過hea,兩個都係積極做好自己嘅嘢,知足、努力,變咗兩個人行一條路,比較容易行。其實大家都知婚姻去到尾真係一個伴,個伴要啱,先至係一個伴,如果唔係盞搞,搵個人嚟喺身邊嗌交,咁不如自己一個好過啦!哈哈哈!」

黎耀祥
身在橫店拍國內劇三個月,入住劇組安排的服務式住宅,太太同行陪開工,黎耀祥謂:「OK㗎、冇咁悶吖嘛!」黎太則笑言,「除非我死咗嘅啫!我呢啲辛苦命。」恩愛羨煞旁人。
黎耀祥
講到同老婆結婚21年仍然好恩愛,黎耀祥笑言:「OK啦,恩愛嘅嘢冇準則嘅!」

有break就返屋企食飯

講到黎耀祥夫妻將親子關係做得好好,同囝囝都好close,黎耀祥直言:「OK㗎,其實我好著重,因為我成日覺得,好多人成日話為家庭做好多嘢,但到最尾忘記咗家庭,我分好多時間畀屋企,好彩我個人冇乜應酬,我唔係好鍾意應酬,又冇乜朋友,以前我收工就返屋企,有個break就返屋企食個飯,變咗我同個仔相處嘅時間好多,到佢大個,就會同我哋close好多。」

黎耀祥
黎耀祥向來將兒子帶在身邊,拖手逛街、甚至同往片場開工,「我個仔成日跟住我哋,有好多藝人唔肯帶小朋友,我覺得做咩啫,又唔係做賊!係公眾人物就係公眾人物,你唔可以話『冇人識我哋嘅!』點可能啫?正正當當,畀佢行一條正常嘅路。」

黎耀祥

自細培養囝囝思考

提到傳媒將囝囝post跑車相上網做話題,黎耀祥表示:「咁我哋做得呢行,食得鹹魚抵得渴,我哋嘅某啲生活,大家都有興趣嘅,佢放嗰啲跑車都係我嘅,唔通佢買咩?我亦都唔會買畀佢,咁佢揸我車,我又唔會抗拒,因為一家人嘛。我又唔覺得因為我嘅知名度要限制佢好多嘢,我成日都同佢講你係我個仔就係我個仔,有好多人對你好好,因為我,亦都有人會挑剔你,亦都係因為我,呢個一定係均等嘅,我覺得咪做好你自己,咪去建立自己嘅價值觀,唔好因為人哋嘅批評或者讚賞而去改變咗自己嘅原則。呢個係我同佢一向溝通嘅大前提。佢OK嘅、佢都接受,同埋自細我就培養佢思考,我覺得人思考好緊要,我覺得我留幾錢畀你,冇用,總會使晒,唯一你能夠得到嘅,就係你識得諗嘢。因為思想係無限大,可以不斷發展落去。」

黎耀祥
問到佢囝囝主修咩科?畢業之後想做咩?黎耀祥答:「佢想讀business,不過美國有啲讀business嘅學院難入,可能讀經濟,總之類似嘅科目。因為佢鍾意做生意,佢鍾意搵錢。佢依家廿歲,仲有兩年畢業,等佢自己揀,我又覺得無所謂,佢鍾意做咩咪做咩。」

黎耀祥

買衫扮靚靠囝囝

問黎耀祥買咩衫、買咩鞋,係咪都要經過形象指導、即係佢囝囝?黎耀祥笑言:「我個仔要求好高㗎,大家都知我以前著衫好求其,其實相輔相成,自己都明白,當你受注目或者有好多地方要去,衫要多啲、靚啲,去咩場合著咩衫,呢個係基本禮貌嚟。我個仔好得意,美學上我覺得佢OK,佢影相、睇衫每個角度都係唔錯,好多牌子都係佢介紹畀我,『今年呢個得,呢季出呢啲唔得』佢有呢啲角度,點解我都信佢,因為佢又唔係完全崇尚名牌,平嘅佢都會買,佢有時擺啲車嘅相唔係想咩,因為佢鍾意車又鍾意影相,佢影相幾靚,佢13歲已經攞住長鏡頭影相,不過我都會提佢做人低調啲。」

黎耀祥
黎耀祥衣著比前型格不少,背後功臣原來是寶貝兒子。
黎耀祥
談到兒子的興趣係做生意時,黎耀祥笑指:「好乞人憎,細細個就鍾意搵錢,做人一啲理想都冇嘅,哈哈!」說時一臉慈愛,可見父子情深厚。