周潤發獨家回應講抗疫!發哥狠批防疫政策 心繫醫護勞動階層

娛聞

廣告

發哥周潤發出名親民貼地,疫情之下香港人人自危,發哥亦受影響要停工,但他仍風雨不改,日前《東方新地》記者獨家捕獲發哥,為避人潮凌晨5時許出門的他,非常之醒神,不過講到香港政府的防疫政策,發哥就眉頭緊皺,對於早前的「全日禁堂食」措施,他心痛一班勞動階層,狠批措施不當⋯⋯

撰文、圖片:東方新地

捕獲周潤發!凌晨5點出門跑山 狠批防疫政策

政府話市民的生活要有社交距離,發哥周潤發都好聽話,日前凌晨5點幾就出門口,天未光條街都未有人,他揸車由九龍塘去太子接一名女友人,到達北潭涌郊野公園後泊好車,再轉新界的士去東壩,已65歲的發哥花了約一個多小時,由東壩跑回北潭涌,全程十公里,見他戴住口罩依然面不改容,並協助女友人跑後鬆筋。

這日無打風,發哥凌晨5點幾就出門口,天未光條街都未有人,他先驅車會合山友,到達北潭涌郊野公園後泊好車,再轉新界的士去東壩。
這日無打風,發哥凌晨5點幾就出門口,天未光條街都未有人,他先驅車會合山友,到達北潭涌郊野公園後泊好車,再轉新界的士去東壩。

一星期跑足七日 享受運動抗疫

這日發哥心情甚佳,笑笑口對本刊記者說:「我日日都做運動,朝朝都去,不過跑完就返屋企唔再出街,間中跑完都會買啲嘢返屋企食,盡量少出去囉!依家疫情咁,盡量戴口罩呀!勤洗手同注意衞生,返到屋企所有消毒程序都要做足晒。呢個疾病主要襲擊我哋心肺,最緊要係做多啲帶氧活動,喺屋企都要慢慢跑吓,我日日都要跑,比之前再fit啲係要嘅,到其時冇好嘅身體點去拍戲呀?不過唔好畀自己太大壓力,我喺東壩出嚟都係行吓跑吓,好好享受做運動。」發哥表示一星期跑足七日,每晚9點就上床休息,生活非常有規律。

發哥活力十足,鬼馬地示範留家抗疫時要keep住慢跑同做拉筋運動。
發哥活力十足,鬼馬地示範留家抗疫時要keep住慢跑同做拉筋運動。

回應張建宗:「我買個飯盒跑完喺郊野公園食埋先走囉!」

發哥在疫情下只能堅持跑山,至於出街食飯同買餸都受到影響,他說:「食肆得兩個人可以一齊坐都唔係多啦,好多嘢都避無可避,咁你困喺屋企都會抑鬱㗎啦!盡量去啲人少嘅地方囉!去郊野地方囉!咁張建宗都叫我哋食嘢要去郊野公園食㗎嘛!我買個飯盒跑完喺郊野公園食埋先走囉!」

對於香港人受疫情影響搞到民不聊生,發哥雖高度關注,但愛莫能助。
對於香港人受疫情影響搞到民不聊生,發哥雖高度關注,但愛莫能助。
這日凌晨5時許天都未光,發哥由九龍塘寓所出車,前往太子接了一名女友人。
這日凌晨5時許天都未光,發哥由九龍塘寓所出車,前往太子接了一名女友人。
去到西貢北潭涌郊野公園停車場,發哥泊好車去完洗手間,準備好輕裝去跑山。
去到西貢北潭涌郊野公園停車場,發哥泊好車去完洗手間,準備好輕裝去跑山。

體諒醫護工作艱辛自嘲蟻民無權提出意見

看來發哥對政府的防疫措施甚有意見,對於早前曾實施全日禁堂食,他反應更大:「梗係慘啦!你睇嗰兩日所有勞動階層喺街度好似乞兒咁,政府話唔好意思,但諗時有冇諗過市民?過咗就算喇!疫情始終會過,大家都係要見步行步,小心為上,有傳等到11月就有疫苗嘛!我好期待呀!頂埋呢個幾月啦!(記者追問發哥點睇醫療床位唔夠,之前發生掉亂測試樣本?)掉亂都係一單啫!班醫護都好辛苦啦大佬,醫療中心崩潰咁滯,日日百幾宗呀!」深知民間疾苦,無時無刻發放正能量的發哥,不愧為我們心中的民間特首。

泊低架車,發哥與女友人轉乘新界的士前往位於西貢萬宜水庫的東壩,車程約25分鐘。
泊低架車,發哥與女友人轉乘新界的士前往位於西貢萬宜水庫的東壩,車程約25分鐘。
個多小時後,發哥與女友人終於跑完山歸來,雖然戴住口罩,但發哥完全冇喘氣。
個多小時後,發哥與女友人終於跑完山歸來,雖然戴住口罩,但發哥完全冇喘氣。
親和力十足的發哥,連外籍媽咪同小孩見到佢都要集郵,發哥仲同佢哋傾咗一輪先自拍。
親和力十足的發哥,連外籍媽咪同小孩見到佢都要集郵,發哥仲同佢哋傾咗一輪先自拍。
跑完山的發哥見到本刊記者友善打招呼
跑完山的發哥見到本刊記者友善打招呼
之後在涼亭內為同行跑友鬆筋,見他似模似樣好專業,睇嚟發哥唔止想轉行做行山教練,仲可以做埋鬆筋教練。
之後在涼亭內為同行跑友鬆筋,見他似模似樣好專業,睇嚟發哥唔止想轉行做行山教練,仲可以做埋鬆筋教練。

「仲慘過大蕭條」、慨嘆香港「一鑊清晒袋」

發哥雖然已是荷李活巨星級,但他心繫香港,對於香港遇到史無前例的經濟及生活困境,他表現得極之心痛:「唔好講我哋呢行受到咩影響,最前線做餐飲業嗰啲已經死晒,全香港都死晒,仲慘過大蕭條,80年代經濟起飛儲埋儲埋嗰啲都一鑊清晒袋。我哋一定要打贏佢,唔怕!香港係福地嚟嘅!一定會過到個疫情,大家畀啲心機,畀啲忍耐。樂觀啲,咬實牙關,見步行步啦!怨天怨人都冇用,人係要靠自己,總之盡量做好自己,一定要做多啲運動,要有強健身體頂住呀!最緊要個個都身體健康。」雖然對防疫政策有微言,但發哥未有提出任何建議,他說:「呢啲政策嘅嘢等政府自己諗喇!我哋只係一般蟻民,做到啲咩啫?我都係聽指令咋嘛!佢叫我做咩我咪做咩囉!」發哥不慍不火的回應卻是言之有物。

身家超過十億的發哥,一直與民同行,他完全感受到市民因疫情帶來的影響與困苦,可惜愛莫能助,只能發放大量的正能量去勉勵大家,如發哥所講,大家都要鍛鍊好身體,香港人自求多福,頂住呀!

下一頁:65歲發哥停工一年樂觀面對 演藝事業式微密謀轉行