胡杏兒

挑機參賽 估唔到胡杏兒唱Adele都掂

娛聞

廣告

愈來愈多港星鍾意北上搵人仔,早前離巢TVB的胡杏兒,自從簽俾蕭定一後密密拍內地劇,又上《全員加速中》等綜藝節目谷人氣,日前更撈多瓣,參加北京衛視的歌唱比賽節目《跨界歌王》,同來自中港兩地的當紅演員鬥唱功!《跨界歌王》有秦海璐、《瑯琊榜》女主角劉濤、白百河、王祖藍、陳松伶等參加,每集節目最高得票者直接晉級準決賽,而下一集就會加入一位新參賽者補上繼續比賽。

延伸閱讀︰

全力反小三 娛圈正印站起來!

小花殺手黃子恆 媾李佳芯 吳若希撻Q

杏兒係第四集的補位參賽者,出場前懶神秘,有三個黑超西裝男守住房門口,又出動雞髀打人牙骹軟攻勢,送港式甜品俾其他參賽者。

正式上台表演前,杏兒先要對住三個評判試唱30秒,過關先可以升上舞台正式比賽。對住三個嚴肅到爆的評判,杏兒緊張到硬晒呔,對手仲不斷震,好在最後都過到關咋!

估唔到杏兒藝高人膽大,竟然揀咗Adele隻〈Someone like you〉。一開聲,另外幾個參賽者當場呆晒,去到chorus最高音最難唱嘅位,杏兒完全冇問題,一粒音都冇走!杏兒仲非常投入,唱到眼濕濕添!唔會係諗起黃宗澤啩?

唔講唔知,讀書時已經唱choir的杏兒,曾經參加過新秀,可惜連名次都冇,後來簽俾Neway Star後出過兩隻唱片,但廣大市民始終唔識欣賞。今次杏兒連Adele嘅歌都唱得到,分分鐘好快會有唱片公司賞識再出碟喎!