鄭秀文

鄭秀文生日宴 許志安避同杜Sir同場而冇影

娛聞

廣告

安心偷食」已經過咗三個幾月,咬緊牙關捱過人生低谷的Sammi鄭秀文,日前順利完成十三場個唱,獲得高度評價,辛苦完終於可以放長假休息,已經原諒老公的她,上周四(8月 1日)下午同老公許志安結伴飛英國,夫妻感情雨過天晴 ;不過,得Sammi大方原諒的安仔,始終還未敢面對Sammi恩師,曾經話過若他對唔住 Sammi,會斬他××十碌的杜琪峯,連續兩晚出席8月壽星Sammi生日宴,有杜Sir就冇安仔,睇嚟安仔要再獲得Sammi好友及大眾信任,唔係單講一句反省「重新面對自己」咁簡單,還要用時間和行動徹底證明,真係要好自為之!



撰文:東方新地 圖片:IG、新傳媒圖片

鄭秀文生日宴 安仔冇影

Show前遇上老公偷食,鄭秀文選擇原諒壞咗嘅老公許志安,忘記傷痛積極排練個唱,風雨飄搖成功完成十三場演唱會,終於放下心頭大石開始她的悠長假期,日前,Sammi就跟已獲她原諒的許志安,一同飛英國旅行,藉出埠散心修補夫妻裂痕,同行還有好友張衞健夫婦,不過兩對夫婦就分開入閘,以掩人耳目。據知情者透露:「安仔出事之後,Dicky(張衞健)畀咗好多鼓勵去支持兄弟,本身佢同Sammi又熟,大家又係教徒,佢都有用聖經金句開解Sammi ,好似今次英國旅行,都係Dicky提議,佢好想Sammi同安仔,可以趁浪漫旅程重拾以前嘅甜蜜!」

 

 

 

 

見 Sammi朋友尷尬

似乎今次旅程相當漫長,Sammi預計趕唔切本月19號回港過生日,出發前便先跟恩師兼好友杜琪峯和古天樂提早慶生,不過兩晚生日宴,老公安仔都冇影!今年4月偷食出事後,背叛老婆Sammi的許志安,除咗遭Sammi粉絲離棄,連帶是Sammi 恩師的杜Sir,亦曾公開鬧爆他,直言「如果佢揼咗Sammi,我就斬佢××十碌」,言猶在耳,許志安要再面對杜Sir當然要三思。據知情者透露:「杜Sir好錫Sammi,安仔偷食件事佢嬲到火遮眼,安仔到依家都唔敢面對杜Sir,怕對方氣憤難平發火,所以杜Sir幫Sammi慶生,都唔敢出現。」

 

 

 

 

除咗唔敢見杜Sir,去到Sammi個唱後台,安仔一樣唔敢高調。據知情人說:「雖然老婆原諒咗佢,但偷食咁唔光彩嘅事,對再見Sammi啲朋友佢都怕尷尬,最初都唔知點面對大家,喺後台大部分時間都喺Sammi 化妝間坐埋一邊,好少行出嚟見人,多數由Wallace(經理人郭啟華)同相熟嘅同事陪實,就算見到Sammi啲朋友,佢都係點頭打招呼,唔似得以前咁風騷滿場飛。」一子錯滿盤皆落索,做錯事咎由自取的安仔,相對「安心偷食」另一主角黃心穎要著草避走美國,獲神老婆特赦可以極速重生,點講都已經三生有幸!

 

 

 

 

紋身自勉 po相放生

忽然身上多咗幾處紋身,除咗左手紋有紅繩,兩邊腰側亦有紋身,其中左邊腰側更紋上英文句子 「It’s time to start something new,and trust the magic beginning」 自勉,但Sammi就指紋身是因早前膝蓋受傷要鼓勵自己。

Sammi力撐老公,po相還刻意畀留守後台的安仔曝光。為免受到騷擾,Sammi開騷期間搬住都會海逸酒店,而每晚完騷後,老公許志安則獨自坐車返回淺水灣寓所。