張智霖袁詠儀甜蜜重拾二人世界 魔童13歲大個仔有自己生活

娛聞

廣告

張智霖Chilam同袁詠儀(靚靚)結婚十八 年,寶貝仔張慕童轉眼亦13 歲,老夫老妻日對夜對,婚姻唔經營分分鐘淡如水,不過靚靚同Chilam的愛情仲未變感情,近年夫妻檔北上做真人騷,鏡頭前恩愛到痹,私底下原來亦識得重拾拍拖樂趣,做騷都做唔到。

撰文、圖片:東方新地

張智霖袁詠儀偶有風浪 惡妻形象外剛內柔

夫婦關係一凹一凸最完美,袁詠儀與Chilam結婚十八年並非無風無浪,不過靚靚識得軟硬兼施,馴服Chilam零難度。隨著13歲的兒子魔童(張慕童)漸漸長大,踏入青春期有自己的社交生活,不再做裙腳仔跟出跟入,靚靚終於把時間與精神放回Chilam身上,近年夫妻檔北上做真人騷,有錢搵之餘,更讓夫婦二人重拾拍拖感覺,鏡頭前的Chilam,對老婆靚靚非常溫柔,而靚靚原來亦非常著緊 Chilam,一次單獨去旅行更在鏡頭前聲淚俱下,說沒有Chilam很不習慣,可見平時一副惡妻形象的靚靚,其實是外剛內柔。

留港過二人世界 當街抹嘴甜到漏

近年靚靚忙於北上搵銀,難得最近稍為得閒,而Chilam亦只有賀歲劇《非凡三俠》在身,夫婦二人趁空檔留港,日前到大坑搵食, 靚靚食飽飽悠閒歎番杯咖啡,而Chilam就大細路上身食雪糕,各取所需。現場所見,靚靚與Chilam雖然冇拖手冇親密的身體接觸,但一切盡在不言中,二人甚有默契邊行邊食,期間靚靚突然撒嬌要老公餵食雪糕,見Chilam食到一嘴都係,便出手幫他抹嘴,這些甜到漏的場面在真人騷都睇唔到。

夫妻檔北上搵真銀保守估計身家過億

Chilam與靚靚15年開始合體北上做真人騷吸金,頻頻以夫妻檔亮相內地綜藝節目,收入豬籠入水,有指他們參與《一路上有你》第二季、《一年級畢業季》共收入約六千萬人民幣;拍攝電視劇《求婚大作戰》收八百萬,再加上拍食品、護膚品與寢具等廣告,又收三千五百 萬,保守估計至今已搵過億人仔。17年他們以首次置業身份以近億元購入大坑豪宅作自住單位,靚靚亦透露日後會再睇樓買樓。