北京舉行盛大記招 宣布回歸樂壇 謝霆鋒 想搞美食音樂會
撰文：東方新地
謝霆鋒 宣布2018回歸樂壇
霆鋒到北京競圓藝術園區為全新國語歌《異想天開》(粵語版《有火》)舉行《謝霆鋒2018異想天開音樂計劃發佈會》，宣佈喺2018年回到個人事業爆發原點︰音樂，重拾嗰團像威化般乾脆嘅火！而去到主場館，發佈會亦正式開始，出席嘉賓除了主角謝霆鋒，還有騰訊音樂娛樂集團副總裁Andy吳偉林先生，英皇娛樂(香港)有限公司行政總裁Shirley許佩斯女士 ，英皇(北京)文化發展有限公司行政總裁兼英皇娛樂(香港)有限公司營運總裁Mani霍汶希女士。
會場耗資過百萬
為隆重其事，記者會耗資過百萬人民幣，架起一個大型會場，喺進入主場館前嘅一個序廳入面，大家會睇到唔同時期霆鋒嘅經典造型及MV，呢個設計相當有心思，就好似入到時光隧道快速一覽其音樂之路，喚起大家嘅回憶。
未知會否出專輯
發佈會上，霆鋒帶來今年第一首主打歌《異想天開》，大會司儀問到歌名《異想天開》的意思，霆鋒說：「呢首歌係先錄粵語《有火》 ，之後再啟發我創作國語版《異想天開》，到依家為止我錄好幾首作 品，還未創作完，靈感係大到……可能我哋要去外國唔同地 方錄音呀，就係為特地去錄結他聲呀、弦樂呀等等。」 主持人問今年有冇計劃出專輯，霆鋒就話：「我唔敢話係專輯， 但我確實響音樂上面有好多想法，如果有新的好意念帶到畀大家， 有更好的創作的話，都會有出product的可能。」
好友拍片祝賀
而霆鋒一眾圈中好友包括容祖兒、陳偉霆、Twins、關智斌、陳奕迅、范冰冰、小S、孫楠、陶喆、阮經天、李榮浩、林宥嘉、林俊傑、高圓圓、楊冪、周筆暢等都拍片祝賀。李榮浩話︰「其實我非常非常熟你的歌，以前還會去練一些他的歌裡面結他Solo。」就連前輩級陶喆也講到明︰「非常期待Nicholas要飆一下結他！」
當中Twins同關智斌更自爆每次去唱K，都會點霆鋒嘅歌，Kenny唱《玉蝴蝶》，而Twins仲即場邊唱邊跳《活著VIVA》！
陳奕迅 壓軸撐場
不過最搞笑都係小S（徐熙娣）︰「謝霆鋒，我希望可以看到你跟＿＿＿（被滅聲）一起合唱，然後一起拍一隻MV，然後在裡面親嘴。」雖然聽唔到小S講另一主角是誰，但已經令到全場嘉賓大笑。而壓軸仲有好友陳奕迅撐場，片中Eason一臉正經地介紹霆鋒新歌，但中途就殺出「神秘嘉賓」霆鋒做彩蛋，原來拍攝短片時霆鋒咁岩約咗Eason、馮德倫及舒淇夫婦等好友食飯，同場馮德倫仲幫手拍攝，舒淇就負責打燈！之後大會播出《異想天開》MV，作為全球首播，除了參與發佈會的嘉賓觀眾，網民仲可通過QQ音樂、酷狗音樂、酷狗直播、全民K歌睇直播。
霆鋒 搞美食音樂節
除外Mani亦都喺記者會上代粉絲跪求霆鋒開演唱會，同時帶來一張附上不少刀刀叉叉的唱片，Mani搞笑說︰「我呢份禮物係想講，如果霆鋒肯開演唱會，佢用上面嘅刀刀叉叉掟我都得！」然後仲叫台下粉絲起哄大喊「演唱會、演唱會」。而霆鋒嘅回應就係：「我覺得現今大眾聽音樂同時追求一種體驗，所以我地未來嘅方向，可能搞一個美食音樂節，入場人士都可以品嘗到我為大家喺世界各地挑選嘅美食，亦會有我創作嘅全新菜式，當然每晚嘅重頭戲就係音樂會，不過要揾到適合嘅場地係目前最困難嘅！」
騰訊音樂娛樂集團副總裁Andy吳偉林，送上一支採用3D打印、外形仿照霆鋒第一次紅館個唱時所用款式結他，寄語霆鋒用它將音樂帶到異想天開嘅世界。霆鋒直呼: 「好有親切感！」而英皇娛樂(香港)有限公司行政總裁Shirley許佩斯女士，為霆鋒送上一個發光的地球儀，寓意霆鋒的音樂和美食，可以帶到全世界，在每一個角落發光發亮，真係好有意思！
推出全新廣東歌《有火》
同一日，霆鋒全新廣東歌《有火》MV也在香港上架，霆鋒在網上平台節目接受森美訪問，談到鮮有推出廣東歌時，佢話佢一直有收Demo，《有火》很貼近自己和港人「想做就去做」的心態，目前已有三、四首歌同期進行灌錄工作。霆鋒話：不論係年輕定係年老，都應該有火，睇點用團火去對待件事，隨着年紀漸長，對歌唱事業心態也有改變，《活着Viva》年代嘅我可能係紅色的火，依家我係藍色的火，比以往高溫得多，但唔似過去的瘋狂，或者再過20年，將會係白熱的火。」佢透露依家積極構思一個集結美食和音樂為主的嘉年華。「你唔使鍾意我，你嚟玩、你嚟食美食；或者你唔使食美食，就只嚟玩同聽音樂。」
一個MV 三個故事
在節奏急速的大城市生活，來自社會、家庭、朋友及生活的壓力，都輕易地把夢想壓碎，甚至好讓你舉手投降，而《有火》嘅MV就找來三位年輕人，拍下三個要佢哋放棄夢想的理由。霆鋒化身駭客，暗中為來自上海、香港及台灣三地的年輕人打打氣！
