天價官司纏身 江若琳冧掂「生煎皇」科水
廣告
入行十周年的 江若琳 回流返香港，呢頭計劃出碟拍紀念寫真，嗰頭即自爆戀上前音樂組合Bliss成員Oscar (蕭潤邦) ！愛得咁突然，就被指與前老闆林小明打足三年官司耗盡過百萬，眼見人稱「生煎皇」的Oscar搖身一變成飲食業才俊手揸七間食店，江若琳一於搲水泡，冧掂男友科水！最離奇係Oscar去年已買定鑽戒準備向拍拖多年的空姐女友求婚，不過突然殺出江若琳，難免被覺得有人暗撬生煎皇！不過Oscar日前對本刊記者強調江若琳並非第三者，樂意幫女友解財困。其實啱啱先開始冇耐，有幾愛呀？
江若琳 高調晒戀情
江若琳近月高調宣佈重返香港樂壇，還罕有地自爆戀情，與男友Oscar在IG齊齊開心分享：「找到愛我的人！」二人07年一同入行成為樂壇新人，十年來一直保持聯絡，突然認愛令身邊好友都非常愕然！
江若琳與前老闆林小明於14年因合約糾紛而對簿公堂，今年初江若琳表示每月要賺六位數字才夠生活費和律師費，雙方曾進行調解，有傳林小明一方要求一億天價作賠償。面對龐大的賠償金額，江若琳只好硬住頭皮打落去，今年10月底再繼續進行聆訊。
Oscar 歌手變「生煎皇」
至於Oscar，曾經係音樂組合Bliss成員，不過出道後發展平平，早年去上海拜師學做正宗生煎包，返港後與友人在旺角合資開店，生意愈做愈有。除生煎包店外，另外仲有中菜及西餐等，旗下已擁有七間食店，更表示計劃今年在港開多兩間。現時Oscar可謂愛情事業兩得意！
Oscar 接受本刊訪問
早前Oscar在其大埔生煎包新店接受本刊記者訪問，被問到點解今次高調公開拍拖，Oscar表示大家都咁大個，無謂再咁婉轉。兩人都已經相識十年，大家經歷相似，都走過谷底，將來亦會面對好多困難。又話唔好誤會佢哋要放閃或者公開用嚟消費宣傳！咁其實一齊咗幾耐？Oscar就話：「啱啱一齊囉！」
強調江若琳非第三者
另外有指Oscar去年年尾已經買定戒指向前女友求婚，咁唔通江若琳係第三者？Oscar即為現任女友平反：「呢個冇可能！」佢表示自己唔會理人點睇，總之兩人係好自然、好順利，其實每個人都有過去，最緊要都係自己開心。
Oscar 愛的宣言
提到江若琳與前公司的官司尚未完結，Oscar隨即發表愛的宣言，話無論對方遇到咩經濟上、定係任何困難都會撐佢：「兩個人一齊撐到盡，我冇底線，就係愛佢囉！」另外又稱：「大家互相扶持，有時我逗起吓佢，有時佢又逗吓我，咁幾好，一齊唔止為快樂，遇上困難大家都一齊先係長遠而實在。」Oscar愛得義無反顧，睇嚟江若琳真係找到對的人！
全文完
