姜皓文

姜皓文男人身女人心 結婚18年易服上癮

最新娛聞

廣告

姜皓文(黑仔)捱足32年,由亞視年代扮鬼扮馬到殺入電影圈做綠葉,默默由二打六做到男主角,今年更憑電影《拆彈專家》及《大樂師.為愛配樂》兩片叫兩飛,終於首奪金像獎「最佳男配角」。被叫足多年的黑仔不再黑仔,現在紅到發紫的他表面形象粗獷Man到爆,不過去年擔正以變性人做主題的電影《翠絲》,黑仔投入角色扮女人,姣塗甲油又剃毛著褻衣,竟然易服上晒癮難以自拔。黑仔愈變愈貪靚,食素狂操肌唔畀自己發福,又勤做美容,老公男人身女人心,結婚18年的太太殷寧(原名金慧英)不知幾冧,去年10月仲兩公婆一齊反串慶生。套戲未上黑仔已經入晒戲,想明年衝擊影帝寶座?

撰文:東方新地|圖片:新傳媒圖片庫、姜皓文IG

姜皓文 拖老婆行紅地氈

金像獎出爐「最佳男配角」51歲的姜皓文被指守得雲開,實至名歸,努力多年演技終於被認同,上台領獎時他激動說:「我冇乜運氣,啲運氣唔知去晒邊度,但呢幾年遇到好多錫我嘅人,我嘅運氣返晒嚟,驚好運太多會好快死!老婆⋯⋯攞咗喇!多謝導演邱禮濤,多謝編劇李敏同我傾角色,令我更得心應手。我加入咗間好公司,多謝老闆古天樂先生,亦多謝我嘅舊老闆林家棟先生,多謝我嘅一班好朋友、多謝我嘅細佬妹,大佬攞咗喇!以後我會繼續享受每一個角色,因為我愛香港電影。」

豁出去演變性人

入行32年來,黑仔從不計較角色輕重,多年來參與眾多港產片,即使是二打六,他都盡力去演,近年演出的角色佔大部分都是比較粗獷,如紀律部隊或黑社會大佬,去年他接受挑戰在電影《翠絲》中演變性人,雖然易服打扮仍然掩飾不了他周身毛髮與肌肉之軀,但一舉手一投足他都極盡嫵媚,對於演戲多年的專業演員來說,惟有百分百投入才可以成功。

知情者透露:「黑仔開拍前已經睇咗好多有關變性人嘅資料,佢亦親身接觸過一啲變性人,佢好想了解佢哋嘅心態。雖然佢扮極個樣都仲係好男人,皮膚又黑毛孔又大,但係佢好投入,形態同 表情都似一個女人,因為戲中要著褻衣唔可以毛茸茸令人見到反胃,所以佢要剃晒啲體毛,男人剃完好快就會生,所以要keep住剃,仲要每日都塗手甲同腳甲。黑仔完全係上晒癮,佢話剃完毛皮膚滑好多,有時見佢好似投入得滯,講嘢開始乸乸哋。」

其實16年黑仔在網劇《無間道》中演社團太子爺已經畫晒黑眼線塗甲油,對於這類角色早已駕輕就熟。

老婆大讚靚仔

拍完《翠絲》,黑仔愈來愈貪靚,閒時要求老婆殷寧為她用美容機做Facial,又習慣了修甲,姿整得像個女人,可能演過變性人,他亦開始了解女人心,從前性格火爆老粗一名的他,對老婆亦變得溫柔。結婚18年,殷寧早前在電台公開分享與老公姜皓文夫妻相處之道,她表示大家都要遷就容忍,但黑仔近年性格明顯有改變,變得如另一個人:「依家出街佢會幫我拎手袋,我嘅事佢會好緊張,食蝦都剝埋蝦殼。」對於近年黑仔開始愛打扮,她謂唔驚老公多艷遇:「初相識覺得佢黑到似阿差,估唔到依家發現嫁咗個靚仔老公,唔怕嘅,女人都係自強增值會好啲。」

易服開派對

黑仔與殷寧都在10月生日,去年二人為慶生兼結婚18周年,在馬來西亞檳城度假搞派對,邀請了林建明及寶珮如等圈中好友一齊狂歡,黑仔要求大 搞反串化妝舞會,當日他戴上白色長假髮扮美少女戰士,而老婆就反串扮日本武士,身為公眾人物,拍戲做變性人的機會可遇不可求,開派對易服就可以盡情過足癮,兩公婆不知玩得幾開心投入,一班朋友為黑仔與殷寧送驚喜,先為黑仔編排專屬的生日歌與舞蹈,令姜氏夫婦在旅程中又笑又喊,還影了不少合照留念。

甘做老婆出氣袋

早年黑仔半紅不黑,有傳他脾氣極臭經常當老婆殷寧是出氣袋,但近年事業開始順景,才頻頻見他拖實老婆出席公開活動晒恩愛,這些年來殷寧一直在她身邊默默扶持,二人曾共患難步過低潮期,黑仔現為圈中炙手可熱的男演員,發財立品的他對老婆愈來愈好。周日晚(15日)黑仔在金像獎頒獎禮台上忘記了答謝老婆,在慶功宴上被問會否再買樓給老婆作獎勵,他笑說未知,大呻搵食艱難:「我成日都獎勵佢。其實我好想做番佢嘅出氣袋,佢好多嘢遷就我,知我火爆,收埋好多嘢唔講,我好唔好意思,想同佢講我以後唔會點火爆,可以放心傾。佢冇嬲我冇多謝佢,佢話應該講多啲幫過我嘅人,佢真係好到不得了,仲叫我唔好成日提住佢。」

黑仔事業家庭兩得意,電影長拍長有,又簽了古天樂投資的天下一藝人管理有限公司,身價十級跳,日前本刊記者見他與殷寧現身中環IFC逛名店,最初見黑仔單拖掃完貨趕去與老婆會合,紅咗都唔囂的他見記者亦大方打招呼,臨走仲扮鬼臉,看來唔止有女人心,仲有無限童心。

第41屆《金像獎》即將於幾時舉行?

第41屆《香港電影金像獎》於2月9日在尖沙咀文化中心舉行記者會,宣布今年19個獎項的提名名單,而頒獎典禮即將於⋯⋯詳情請看

MIRROR那三位成員入圍金像獎2023?

今屆金像獎一共有19套電影入圍,而當中包括MIRROR成員主演的《阿媽有咗第二個》、《過時·過節》,以及《闔家辣》,欲知各成員有份爭奪那些獎項,按此看完整入圍名單