延禧攻略

【延禧攻略】清朝妃嬪化妝服飾神還原!于正:這不是咬唇妝

最新娛聞

廣告

由佘詩曼主演嘅內地宮鬥劇《延禧攻略》昨晚8:30在無綫開播,劇中除咗有港人熟悉嘅佘詩曼飾演大奸角嫻妃,仲會有女主角魏瓔珞 (吳謹言飾) 以及富察皇后 (秦嵐飾)、高貴妃 (譚卓飾) 等一眾妃嬪在後宮爭妍鬥麗,自劇集在內地率先播出後,佢哋一絲不苟嘅艷麗妝容、髮型同服裝引爆熱議,唔少觀眾都以為佢哋化嘅係幾年前韓國好流行嘅咬唇妝,但原來真相係⋯⋯

撰文:東方新地|圖片:新傳媒圖片庫、電視劇照及截圖、于正微博佘詩曼微博張嘉倪微博

《延禧攻略》妃嬪化妝三大特點

細心睇就會留意到,《延禧攻略》中一眾妃嬪嘅妝容都有三大特點,就係每隻耳上都有三隻耳環、柳葉眉,同疑似「咬唇妝」嘅唇妝。

一耳三鉗

原來根據滿族嘅習俗,女兒自出生後就要喺每邊耳朵要穿三個耳孔,並戴上三隻耳環,為「一耳三鉗」,即兩隻耳合共有六個耳洞。

出身富貴嘅女子會用金、銀、翠、玉為耳環,或在每個耳環串兩顆珍珠,而窮家女則只會用銅圈替代。

幼細柳葉眉

一眾妃嬪清一色嘅幼細柳葉眉,則是清代女性嘅傳統妝容,凸顯出女性嘅優雅美態。

而佢哋嘅唇妝雖然望落好似韓國幾年前流行嘅「咬唇妝」,但清朝時原來係叫「絳唇妝」!

製造「櫻桃小嘴」

「絳唇妝」喺清朝非常流行,重點係上唇幾乎唔上色,或只塗內側唇色,下唇亦只畫上一半色調,令雙唇睇落更加小巧,似足「櫻桃小嘴」。

而韓國數年前流行嘅「咬唇妝」,則是由中間漸次暈開,上色面積較大。

參考清朝宮廷畫

連劇集嘅金牌監製于正都特別聲明:「這不是咬唇妝,是歷史啊~」並指佢哋嘅妝容都係考究咗清朝宮廷畫師繪畫嘅《玫貴妃春貴人行樂圖》後所定。

不過女主角魏瓔珞 (吳謹言飾) 初出場時唇妝塗滿唇,並非「絳唇妝」,原來係因為佢當時只係入宮做宮女,冇必要化當時嘅流行妝爭寵!

及後升為「令妃」,身份高貴咗,妝容亦有所升級。

另外一般清朝宮廷劇有嘅「大拉翅」髮型,原來係到咗慈禧年代先會出現,所以喺《延禧攻略》中,各妃嬪都只係梳盤髻。

 

而服裝方面,于正亦考究過歷史資料,並採用咗大量非物質文化遺產,包括絨花、緙絲、點翠等各種傳統工藝面料,都係劇組前往蘇州、揚州等各地採購,使用喺妃嬪嘅服裝同扇面上。

佘詩曼成為皇后後嘅服飾同妝容,更加係神還原!

《延禧攻略》眾妃爭寵 邊個先係皇上最愛?

佘詩曼劇中飾演嫻妃,同富察皇后 (秦嵐飾)、高貴妃 (譚卓飾) 及女主角魏瓔珞 (吳謹言飾) 等在後宮鬥個你死我活,但原來佢哋通通都唔係皇上嘅最愛!

原來乾隆皇帝最寵愛嘅妃子係以歷史上嘅「容妃」為原形嘅順妃 (張嘉倪飾),在野史上佢被稱為「香妃」,亦即金庸筆下《書劍恩仇錄》中嘅「香香公主」!

容妃和卓氏出身回族,係新疆維吾爾貴族和卓木家,為宮中唯一回族妃子,初入宮約25歲即被封為貴人,三年後奉皇太后旨被封為容嬪,六年後再被封為容妃。

據指容妃身上所散發嘅香氣並非小說所指嘅花香,而是由於香妃自幼飲羊奶,所以身上帶有奶羶味。

容妃深得乾隆寵愛,多次跟隨乾隆南巡,由於容妃信奉「伊斯蘭教」,當其它隨駕妃嬪獲賜食野豬肉時,容妃則獲另賜一盤「狍肉」(鹿肉)。平日佢喺宮中嘅飲食,亦由專門嘅回族廚師烹煮。

容妃一生未有介入后妃之爭,在55歲時病逝,被葬於清東陵,1979年墓穴被發掘,發現容妃疑因宗教信仰,棺木有槨無棺,上書有「以真主名義」等阿拉伯文字,表明墓主信奉伊斯蘭教。

《延禧攻略》以「容妃」為原形所作嘅「順妃」由內地女星張嘉倪飾演,劇中佢先為「順嬪」,後獲封為「順妃」,受家族指使與眾妃相鬥,心腸狠毒。

現實中31歲嘅張嘉倪出身四川,畢業自北京電影學院表演系,07年透過選角贏得由瓊瑤小說改編嘅電視劇《又見一簾幽夢》女主角出道,當時劇中男主角為方中信,女二正是今次飾演皇后嘅秦嵐。

《延禧攻略》講咩?

《延禧攻略》進入主題前的劇情,與無綫劇《宮心計》大致相約,女主角魏瓔珞為自己姐姐之死困惑不已,為了尋求真相而決定入宮成為宮女。

其後於宮中靠著自己的勇敢態度和聰明,最終成為乾隆皇帝的皇后。

網友評造型 好壞摻半

早前,佘詩曼於劇中的正面照首度曝光,一身淡雅素服被網友指她不似一位妃子,反而更似一位姑姑,而且顯老不少,對她的一身造型頗有不滿。

但另一邊廂,亦有網友認為冇所謂,皆因她一直是以演技取勝,而非造型,未知大家又點睇呢?

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!