張曦雯:「我值得捧！」 懶理外間指被捧做新花旦
宅男女神張曦雯 (Kelly)，28歲、樣靚身材惹火，入得廚房仲要打得機，被網民譽為Package「正到犯晒規」，難怪無綫出動多套劇力捧，今次她大談神秘身世、上位之路以及擇偶要求！
撰文：東方新地｜圖片：東方新地、張曦雯微博
張曦雯工作量大增
張曦雯因劇集《跳躍新生命線》爆紅而為更為人熟識，最近名利雙收，「以前大家見我，淨係覺得我係明珠台，可能噏唔出我個名，但依家大家見到我係好開心，同我講好掛住我個角色，所以係好開心！」，Kelly坦言自己亦好滿足現況。
同時，Kelly亦指自己工作量比以往更多，現在正忙於拍攝邵氏出品的新劇《 飛虎2 》，「第一次唔係拍 TVB 嘅劇。我嘅角色係一個女特工，同黃宗澤有感情線，無乜太多打鬥場面」，未知若然Kelly變做打女大家又會點睇呢？
問到會否擔心與黃宗澤傳緋聞，Kelly就說：「拍之前我哋都識嘅，因為我哋之前係同一個經理人。我哋啱啱喺英國外景返嚟，都 OK，無乜嘢呀!」，直指雙方冇過電！
懶理外間指被捧做新花旦
對於獲公司力捧，Kelly即言：「我做得好點解唔捧我?咁都要我自己努力嘅，我覺得公司如果睇到有潛質嘅，唔會唔捧㗎嘛!我都相信我接每一套我都有進步嘅，相信公司係睇到嘅，每次公司畀咩角色，我都做到最好，咁就為我帶到下一個機會。」
唔想簽TVB？
Kelly說：「好細個志願係做香港小姐，細個我攞條毛巾披住，戴頂帽當係后冠，但大個咗之後，我中學嗰段時間，變咗好男仔頭，嗰時我想去學廚，因為芝加哥有藍帶學校。」，小時候的志願好像往往與現實有距離。
Kelly雖然被稱為宅男女神，但原來實際她也是位享受留於家中的女生，「仲拍緊《港生活·港享受》嗰時就好update，但依家我完全脫節，同埋出到去 我又大壓力，我唔係好顧形象，講嘢動作好大，所以我寧願約朋友返屋 企，或者去人哋屋企，可以自由自在。」，女神也有不為人知的一面，平日與平常人無異。
煮中餐、西餐都得的Kelly直指「嚟咗香港之後，得自己一個人，就開始煮中餐，都係家常便飯，番茄煮蛋、西芹雞柳嗰啲。整甜品，曲奇、蛋糕、批，對我嚟講，好專注整一樣嘢，會唔記得晒啲煩惱，但最憎就係要洗碗。」，整食物能令她暫忘所有煩惱。
入行因由
提到為何當初會去選美，Kelly表示：「嗰時做緊model做咗兩年，諗住攞個名銜，攞到個名，就可以做名人界別嘅模特兒，點知贏咗要返嚟選中華小姐，選中華小姐要同模特兒公司解約，初時我都唔想，但係媽咪話試吓啦，所以最後選咗。」
Kelly續說：「之後做電視主持，對我嚟講係好難嘅工作，嗰時中文唔係講得咁好，又唔識講嘢，每次做完主持，做得唔好，返到屋企我就會喊，好大壓力。我覺得最好嘅訓練就係喺電視見到做得幾樣衰、幾唔好，跟住就會好想改，就會進步得好快。」，想改進而帶來進步。
訪問中，Kelly自爆自覺自己適合做模特兒，「為我化一個唔同嘅妝，可以係另外一個人，我嗰時拍銀行廣告，我係可以同時間幾間銀行嘅廣告全部都係我嚟，仲係無人認到。我又可以行騷，又可以影硬照，所以都多嘢做」。
Kelly直指：「做主持工作雖然唔係好出名，但出面做主持、司儀幫我賺到好多錢，一路生活都舒服嘅。但同時亦好渴望拍劇，因為我成日覺得自己做主持唔叻，一要公開講嘢我就好驚，但拍劇係做另一個角色，我就會覺得好舒服，所以都好想拍劇，但自己經驗又唔夠。」，似乎Kelly的擔心是多餘的。
提到想要合作的演員，她坦言:「我覺得佘詩曼好正，我聽高Ling(高海寧)講佢好 nice、好照顧新人，如果可以跟佢學吓嘢就好嘞!」
因打機被睇中
網民封Kelly做「 打機女神 」，她反而笑言：「因為我有個細我五年嘅細佬，我哋一路長大都係打機，所以我好男仔頭，但無諗過會有咁多 attention，大家一般覺得我好斯文、好靜，就係打機呢樣嘢令到監製見到原來佢係咁㗎，就有多啲機會！」，
中學時期係Rock妹！
樣貌偏向鬼妹仔的Kelly指：「我太爺個樣係好鬼佬，係比我更加mix，我睇番相，成家人得我一個似我太爺。中學嗰陣好男仔頭，夾 band、彈結他，我成班朋友都係男仔，成日去搖滾騷。我啲頭髮一半金色、一半黑色，又戴脷環，嗰陣好癲，同依家完全兩回事。」，真的意想不到！
對於多不多男生追求，她則指：「又唔係好多，我追男仔囉!」，另外，她又透露自己對於著比堅尼的style有變，「因為香港個 standard 有少少唔同，所以都唔可以咁隨意，之前我會隨意啲嘅，我覺得都係正常啫，係女人都有嘅，唔係咁特別啫!」，只怪外國與華人社會的開放程度不一。
有人指「 樣貌持續進化 」，質疑Kelly整容，她反指：「網上面流傳咗一批相，就係我最樣衰嗰陣時影嘅，嗰陣又唔識化妝啦、又肥肥地，大家就focus喺嗰幾張相度！
她又自爆自己16歲時，曾有147磅，「其實我平時唔係成日都做運動，我呢排開始多咗做運動。16歲，嗰陣日日返學係咁食朱古力，肥到一個點，連我爹哋都叫我減肥。」
有能力自給自足
問到揀男朋友的要求，Kelly話：「我自己賺錢能力都高嘅，我唔需要佢好有錢，起碼要同我一樣，因為我自己都好strong，我想個男朋友都係同我一樣咁strong、咁獨立，先至會令我覺得佢好吸引！咩國籍都得，高過都好嘅，我想佢孝順!」，大家知道要點做啦！
續說：「都鍾意好善良、心地好，唔好太多機心。因為呢行已經夠複雜，所以我想搵一個簡單嘅。圈中嘅男仔好似同我想要嘅嘢有少少出入，喺圈中搵個 好簡單嘅男仔好難，我會好擔心，因為我鍾意男朋友好專 一，如果係行內人，身邊太多靚嘅人、太多誘惑，所以如果同一個男藝人拍拖，我覺得會幾辛苦。」，Kelly都會擔心圈中誘惑太多！
至於會否好難先追到Kelly，她則表示：「其實我自己都可以提供畀自己好優質嘅生活，譬如我買新車，又畀人講係人哋買畀我，我覺得我唔需要囉!架車我都要供㗎!我覺得點解一個女仔搵到錢而買到自己鍾意買嘅嘢要畀人話，我都好辛苦搵錢、儲錢，點解會畀人講唔係我嘅努力而得到！」，大概不少女生亦曾經遇上追個情況及出現這種想法！
然而，Kelly表明不接受有家室男士追求，「一路都有男仔想識我，但有老婆嘅男士追求就梗係唔得啦，我都唔會有興趣囉!同埋我鍾意自然啲，唔鍾意人哋介紹，會好尷尬。我都唔強求或者唔急。」，相信Kelly好快會遇到命中注定的一位！
延伸閱讀：
張曦雯演《跳躍生命線》人氣急升
無綫台慶劇《跳躍生命線》已經大結局，不過唔少人議論紛紛，其中只係第三次拍劇的張曦雯，本來樣貌身材已經超班、演技進步不少，而且角色討好而備受關注。大結局中張曦雯遇交通意外受重傷，幸好最後冇事！大團圓結局！
2012年華姐冠軍
1990年出世的張曦雯今年28歲，樣子標緻、笑容甜美，不單上圍豐滿，身高175cm的張曦雯更擁有一雙修長美腿，完美！2012年參選「國際中華小姐」，張曦雯以半冷門姿態成為勇奪冠軍，同年更代表香港出戰「2012年世界小姐競選」，係繼1988年李嘉欣和2000年郭羨妮後，第三位參賽的佳麗。
高貴氣質太「離地」
卸下華姐冠軍后冠後，張曦雯便與無綫簽約，更因操得一口流利英語而獲委任明珠台《港生活·港享受》及翡翠台《東張西望》時段內的《Pearl Tonight》主持，開始為人認識。舉手投足散發高貴氣質，加上被指靚樣太「離地」，張曦雯漸漸與女神劃上等號！
原來家庭背景僅只「一般般」？
不過近日有本地媒體爆料，外表十足ABC又離地的張曦雯，家庭背景僅只「一般般」，有指佢小學四年級先移民美國，父母都屬草根階層，移民前居住喺黃大仙下邨公屋。張父任職技工，張母則幫人做Facial，與親友合資經營美容舖，收入只係一般。
爆料者仲話，張曦雯本來叫「詠欣」，直至兩歲先搵相士指點，改做「曦雯」；「而家父母憑女貴，都證明當初個相士好靈啦！」
《律政強人》嶄露頭角
去到2016年，張曦雯終於迎來第一次拍劇，在《律政強人》中飾演潘希文(Libby)，與一眾前輩如方中信、廖啟智及李佳芯等合作，雖然戲份唔太多亦未見太突出，不過仍獲得觀眾留意，特別係讚佢外形好適合做律師！
《7日羅曼史》演最強小三
另外於港韓合作拍攝的短劇《7日羅曼史》中，張曦雯飾演黃翠如的大學同學兼多年老友，不過竟然搭上好姊妹嘅男友陳智燊！而且喺劇中嘅衣著打扮夠晒進擊，首先以開窿低胸晚裝岀場，又喺翠如BB面前同陳智燊扮唔識，個帶少許奸詐的笑容真係好嫵媚！
主演劇集排住隊出街
《跳躍生命線》其實只係張曦雯成當家小花的第一步，嚟緊仲有《金宵大廈》、《白色強人》、《解決師》，以及重頭劇《飛虎之雷霆極戰》，令人期待！
《3日2夜》大解放
除了演出劇集，真正令張曦雯深入民心一定係2016年底《3日2夜》！大家都知呢個節目專出女神，而大家亦志不在觀看旅遊資訊，梗係睇索女啦！張曦雯喺節目中大解放，盡情展現噴血身材，無得輸呀！
直播打機爆粗
有着華姐冠軍的美貌與氣質、外國回流英文一流，張曦雯雖然個人背景及美貌都被指離地，但原來都有非常麻甩的一面！佢就試過直播自己玩喪屍遊戲《Resident Evil 7》，高峰期有逾2千人收看！
真性情女神
大家唔好以為女神打機只係「做樣」，唔少網民都讚佢玩得有板有眼，技術到家，最重要係流露真性情！見到素顏戴眼鏡的張曦雯打機時非常肉緊，表情多多，時而大笑時而扁嘴，玩得興起時仲狂爆英文粗口！佢玩得high之餘，網民睇得更high！
廚藝滿分 入得廚房出得廳堂
最近張曦雯上《美女廚房》，除了有人人讚的滿分廚藝外，仲勁識冧掂評判，放電、飛吻、撒嬌通通齊，唔使講嘢啦，10分！
將來還有什麼演唱會值得留意？
有不少歌手宣布舉辦演唱會，小編為你整合了2023香港演唱會+搶飛攻略一覽，包含各演唱會優先購票日期、公開售票日期、門票價錢、座位表等，想搶飛粉絲必定要留意！
