張繼聰賣口乖高調放閃 三重高招冧謝安琪
撰文：Sunday Kiss | 圖片：張繼聰@IG
張繼聰賣口乖高調放閃 三重高招冧謝安琪
張繼聰同謝安琪日前出發去旅行，張繼聰就喺IG貼出兩張單人相。第一張係張繼聰係餐廳望住外面嘅相，但焦點唔知點解對咗喺杯咖啡度，張繼聰就留言話「好嘅攝影師可以捕捉倒一個人嘅俊朗。」完全唔介意老婆冇將焦點擺喺佢度，仲要讚謝安琪係好攝影師，此為冧老婆招式一。
自己老婆自己撐
連好友阿Sa都取笑話「佢好似係影緊杯咖啡。」張繼聰抵死回覆「有啲人係就算喺後面都突出。」一方面讚自己，一方面為謝安琪攝影技術護航，自己老婆自己撐，此為冧老婆招式二。
讚老婆又讚自己
隨後，阿聰又po咗第二張相，只見老婆謝安琪好享受咁伏喺泳池邊。張繼聰留言話「好嘅模特兒係會顯得個攝影師勁咗，不過留意番，我係有影功嘅。」大讚老婆點影都靚，係好模特兒之餘，都不忘暗讚自己有攝影技術，此為冧老婆招式三。
短短幾句全部都離不開稱讚謝安琪，真係閃死人喇！老婆實冧死，各位老公學下嘢喇！
大家都知張生張太喺社交網站好活躍，一係放閃一係打情罵俏，真係好鬼sweet～
張繼聰教路「佛系接老婆」 轉頭即激嬲謝安琪
日前，廿四孝老公張繼聰深夜渣車接老婆kay收工，就喺阿聰無聊係車等老婆嘅時候，佢又突發奇想，發文教路「佛系接老婆」方法。阿聰上載了一張自拍照，並留言：「《佛系接老婆》唔好問仲要等幾耐， 自己唔好望錶 ，儘量保持發呆，唔好急，如果緣份到了，老婆就會自然出現…」
誰知轉頭就畀老婆發現，阿Kay仲留言話：「明明收到message話＂Take Your Time”，轉頭又發啲咁既post既」阿聰今次九秒九激嬲老婆。不少男網友看後感同身受，有網友留言：「個個都接老婆，唔通個個都想接老婆咩」，呢句話被張繼聰評為「十萬個激嬲老婆的理由」。
亦有網友被張繼聰呢個舉動惹笑，紛紛留言「緣份到了⋯張太坐在旁」、「佛系呢家嘢，邊個夠你嚟呀，地藏王」、「最高境界，敵不動我不動，敵動我都不動」
張繼聰屈謝安琪偷拍
即使兩人同住一屋簷下，但兩夫婦依然不時放閃放到上網。早前，阿聰分享咗一張望海背影照上網，相中佢一身運動裝束，佢嗰雙最引以為傲的麒麟臂大得誇張！佢留言話：「認真嘅男人可能真係好吸引，吸引咗一位女仕情不自禁咁偷拍我。」
點知kay九秒九留言話：「叫人幫你揸機影相，轉頭又屈人嘅。」認真谷氣。隨後，阿聰係留言區留言話：「唔係所有男人都面子當飯嘅」，暗讚自己有幽默感、有趣味。
