李亞男

結婚3年 李亞男有喜!王祖藍:BB嘅高度似我定似阿媽?

最新娛聞

廣告

王祖藍及太太李亞男拍拖9年,結婚3年,二人一直恨追B,今日李亞男晒超聲波相報喜,宣布有喜,恭喜晒!

撰文:東方新地圖片:新傳媒圖片、李亞男IG

李亞男有喜 宣布陀B造人成功

李亞男在社交網上載超聲波照,並寫道:「今天是我們拍拖9周年紀念日😍很興奮感恩可以在這個特別的日子 宣布我和祖藍將迎接一個新生命嘅來臨💕so blessed to have a new life in our family❤Happy 9th anniversary !」見佢相中加上Love you、Wow及心心圖案,真係睇得出佢好開心呀!恭喜晒!

雖然有咗BB,但兩日前李亞男仍為其食譜書到電台宣傳,相中所見佢腹部微隆!

李亞男:有向LINDA同宋熙年取經

向來十分喜歡小朋友的李亞男則表示:「好開心終於做媽媽喇,第一時間知道嗰陣真係好驚喜,同埋有啲唔敢相信。因為我哋雖然係PLAN今年做爹哋媽咪,但冇諗過咁快就實現到,真係好感恩。其實仔定女我都冇所謂,因為我都會好鍾意。最緊要係BB嘅成長過程夠健康,同埋佢嘅成長夠開心快樂。」李亞男又謂已向AMAZING ESTHER一眾好姊妹分享喜悅:「我有向LINDA同宋熙年取經,問定佢哋有咩嘢唔食得,同埋可唔可以做運動,真係好多好多問題想問,始終自己冇經驗。」她又謂為了BB著想,已對十分喜歡的食物盡量SAY NO:「我食少咗好多甜品,同埋飲少咗好多咖啡呀,我以前可以一日飲幾杯架。雖然呢啲都只係好小嘅事,但已令我體會到做媽媽係需要付出好多嘅愛。」李亞男又承諾現階段會好好TAKE CARE自己,多點休息,果然為升呢媽咪做足準備。

 

王祖藍 :究意將來BB嘅高度係會似我定似阿媽呢?

結婚三年多的王祖藍和李亞男,今午13:14於社交網宣布有喜,是日更是二人拍拖九周年紀念日,選擇在如此特別的日子公布喜訊,真係好浪漫。對於結婚三年多終榮升爹哋,祖藍笑說:「首先好感恩啦,可以喺拍拖九周年紀念日去宣布呢件事,我哋拍拖嗰時係2009年,咁啱9年後有個小朋友,咁希望所有嘢都可以長長久久啦。亦都好感謝上帝,幫我哋安排晒所有嘢都喺計劃入面進行,之前應承過LEANNE搬出嚟二人世界之後,過兩年左右先有小朋友,依家真係實現到,真係好感恩。」

祖藍又笑謂其公司十分旺丁:「我哋先後有兩個員工有咗,依家計埋我老婆就三個人,咁如果想生B,入嚟我公司做啦!」祖藍更叮囑大家幫忙「睇住」老婆,盡顯「暖藍」本色:「做媽媽真係好辛苦架,佢為BB付出咗好多,又睇書啦,又改變自己飲食習慣啦,又好緊張去預備好多嘢啦,所以麻煩大家照顧吓佢啦。」祖藍亦又忘搞笑本色謂:「大家最近除咗睇法國定克羅地亞贏呢?我建議開多個盤,就係究意將來BB嘅高度係會似我定似阿媽呢?相信都幾啱用嚟打牙骹戰。」

王家有喜 👶🏻 #鳴謝同事發來的賀喜圖 #長輩很高興

A post shared by 王祖藍 (@wong_cho_lam) on

大肚食唔停

陀BB當然要好營養﹐李亞男似乎都好食得,見佢成日喺IG上載食物相,全部都係健康餐、生果及果汁!

So happy to bump into you dear !! @maglam_ 💕💕 happy lunch hour !

A post shared by 李亞男Leanne (@therivergirl) on

Enjoying my backyard💕

A post shared by 李亞男Leanne (@therivergirl) on

李亞男:婚姻就是各有犧牲

李亞男早前接受本刊專訪,大談婚姻之道。

從拍拖到結婚,王祖藍固然爬得快,而他和李亞男這一對也讓不少人跌眼鏡。不過恩愛之餘,去年底還是傳出祖藍太忙、亞男太依賴,於是亞男因為驚恐症入院,亦疑似患上抑鬱:「驚恐症係真嘅,不過抑鬱係假嘅,係結婚冇耐我因為腸胃有事入咗院,當時祖藍喺內地拍緊電視劇《哪吒》,實在請唔到假返唔到嚟陪我,我就真係覺得好down。外界話佢為咗事業忽略我,我想話其實係佢為咗我犧牲咗好多至真。嗰次以後,佢真係除咗綜藝節目再唔會接內地電視劇、永遠出trip都一定唔會超過三個月。我覺得婚姻就係要互相珍惜互相犧牲,佢講得出做得到,所以我本來想去日本九個月考個藍帶章,依家都暫時放低咗呢個目標,冇可能淨係佢一個為咗呢段婚姻努力。」

14年台慶夜,王祖藍失驚無神跪地求婚,翌年情人節, 兩人在迪士尼酒店大宴親朋,正式結為夫妻。

李亞男 爹哋鼓勵19歲選美

33歲的李亞男在上海出世,9歲舉家移民加拿大溫哥華,她說自己小時候被外公外婆湊大,長大則學校、教會、屋企三點連線,從來不出門、從來沒有自己的社交圈,21歲認識祖藍之前,也只交過一個男朋友:「其實拍得兩個散拖,咩都冇做過,我都唔知算唔算正式一段感情。」

愛在祖藍未紅時

一坐下來,其實李亞男一直高呼,要幫她澄清一下和祖藍拍拖的時間線:「好多人以為佢開始紅我至同佢一齊,其實05年我哋對大家有feel嗰陣,佢仲係兒童節目主持、仲未幫《東方之珠》郭晉安代唱、仲未演《同事三分親》個樓華。」李亞男和王祖藍的初邂逅,就是在藝人之家。「當時大家對大家都冇感覺,淨係覺得佢細細粒幾得意。識佢以前,我鍾意嘅明星都係王力宏、黎明嗰啲⋯⋯」簡單嚟講,即是一概白馬王子型,並且高度一定要在李亞男之上,那些年,有排都未輪到王祖藍。

藍媽媽 推波助瀾

當時李亞男沒有考慮過王祖藍,連王祖藍後來也對李亞男承認,選美冠軍是自己能力與想像範圍之外,兩個人的關係開始起了微妙變化,多得祖藍媽媽推波助瀾。「我記得有一次藝人之家燒嘢食,祖藍媽媽第一 眼見到我就讚我靚,跟住燒完隻雞翼又講『李小姐你好靚!』、燒完條腸又講『李小姐你好有氣質』,成晚讚完我十次八次之後,夜晚又返去同祖藍講。祖藍都話嗰晚開始留意我,然後有一次發現我個手袋隨身袋住本聖經,至真正刮目相看,覺得呢個女仔唔同其他選美出身嘅人,都幾虔誠唔係淨係追逐名利。」

一對一教學

也就是那一晚以後,王祖藍開始給李亞男教廣東話。話說多才多藝的祖藍一直在藝人之家教演技、教 唱歌亦教語言,不過人人都是大班教授,唯獨李亞男一個可以特別享受一對一教學:「嗰陣時冇諗太多,依家諗番,係喎?得我一個嘅?又好似係有小小追嘅成分。跟住係佢約我去主題樂園玩,大家喺Space Moutain入面坐過山車,驚驚吓就拖咗手仔⋯⋯不過嗰次之後我哋冇即刻一齊,反而係去咗問牧師意見。」

冷靜期 三年零四十日

李亞男說,祖藍在遇到自己以前情路上有過不少波折,並不敢貿然開始新感情,而自己則是經驗太少,不敢自己做決定:「尤其係身邊有朋友提醒我, 我一個女仔嚟到陌生地方,第一個喺身邊出現嘅任何男性都有機會被我依賴,我都怕對祖藍嘅係感動唔係感情,最後傷害咗佢。所以牧師叫我哋畀自己四十日冷靜期先,四十日之後我哋兩個喺電話分手,大家都講到喊⋯⋯其實咩都未做過、完全未開始過, 咁都一齊喊,諗番轉頭都覺得好cute。」

身高差距

那一年不敢開始的原因,李亞男承認,其中一個顧忌的正是身高差距,兩人衡量過利害關係,始終還是怕惹人話柄。「真心嗰句,如果唔使顧及人眼光,我哋應該會更早一齊。其實自己幸福就得,又唔係犯法,事實證明,之後真係公開戀情,(身高差)都唔係寫咗好耐啫!」

一起傳教重燃愛火

冷靜期一過就是三年,兩人因為一起到美加佈道會傳教而愛火重燃,一回港、李亞男收到第一封Email就是王祖藍徹夜趕工寫成的歌詞《墮入凡間的天使》,然後正式拍拖:「分開嗰三年,我哋真係放低咗,我甚至有睇吓身邊有冇其他人適合⋯⋯我 嗰陣時都以為係,我嘅世界可以好大,甚至喺身邊搵吓有冇其他人可以發展,不過慢慢都係發現冇人比祖藍更適合我。」

我哋價值觀一致、好多嘢都一凹一凸,佢快我慢,佢複雜我簡單, 我鍾意飲紅酒佢鍾意飲朱古力奶。我自細慣咗畀人照顧,而佢係阿哥,爸爸早走十幾歲就要孭起頭家,對住屋企好有責任感,我細個好想要哥哥,佢會教我會幫我揸fit,唔好睇外形,佢內心好強大,從來唔會驚青。仲有佢好有才華,喺藝人之家教得好好,事實上係可以做教授嘅人,畢業咁多年好多嘢依家都仲可以拋書包,同埋我最敬佩佢,係咁叻都可以好謙虛,會放低自己學新嘢,又會聽我意見 ……」講到老公,就讚到冇停口!

李亞男讚祖藍好謙虛肯聽人意見,我問亞男,做了老闆以後、結婚以後,王祖藍是不是還肯聽老婆意見?李亞男弱弱答道:「佢追我時係聽晒我所有意見,結咗婚後,我嘅意見真係唔多,佢都知我放心畀佢安排晒所有嘢⋯⋯」

被岳父母誤會無禮貌

從被高攀,到如今成為成功男人王祖藍背後的賢內助,李亞男說,眼前的小個子其實沒有變:「人係會成長,我都做唔到以前嘅我,佢表面上變咗,但係本質係一樣,我知佢好多嘢做又做老闆,無時無刻都好多嘢諗好多嘢度,最開頭連我爹哋媽咪都誤會佢無禮貌、點解成日講電話⋯⋯作為佢身邊嘅人,知道佢同一時間處理緊幾多嘢,可以做嘅就係返到屋企時畀佢盡情放空、畀佢落台嘅時候可以做番自己,當佢忽略咗身邊嘅嘢時,提一提醒佢,幫佢去留意見唔到嘅嘢。」

順道一提,李亞男說王祖藍個子雖小,喜歡的東西卻都偏大:「所以佢揀咗我做老婆,又喺大埔買咗依家呢個三千幾呎嘅屋企,喺出邊做嘢辛苦,佢真係好需要一個屬於自己嘅地方好好放鬆。」

記得當時跟剛剛因為代唱冒起頭來的王祖藍第一次做訪問,他就說過要買 大屋、要給媽媽最好的生活,十年而已超額完成,這就是為甚麼個子小小的他,為甚麼身影總是很高大。

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!