挑戰麥明詩揈水髮 大台姐仔桃紅色泳衣搶鏡
撰文：東方新地｜圖片：新傳媒、IGlovecandice.c、louisa_mak
麥明詩三點式超吸睛
麥明詩早前去蘇梅島旅行，喺沙灘做完瑜珈，返到泳池繼續游，仲想做出水芙蓉玩揈水髮，但似乎唔太成功，無咩美感！不過唔緊要，因為重點唔係佢揈水髮揈成點，大家目光都集中喺佢心口度！麥明詩三點式上陣騷出長長事業線，心口脹卜卜，上圍隨住揈頭髮擺動，認真賣大包！
麥明詩揈水髮失敗，之後仲喺網上向網民求教，第二次終於成功啦！
趙希洛旅行騷身材
同樣都係香港小姐出身，07年落選港姐趙希洛最近都去咗旅行，當然亦不忘喺網上晒靚相，相中見到佢著上桃紅色泳衣，盡騷弗爆身材之餘，仲非常搶眼！其中一張相仲係躺在泳池邊，性感迷人！
挑戰揈水髮成功
之後仲有片睇，見到趙希洛同麥明詩一樣挑戰揈水髮，仲成功一take搞掂 (當然唔知有無NG好多次啦)，夠晒仙氣！
07年參加港姐 08年讀藝訓班
趙希洛在2007年以原名「趙嘉迪」參選香港小姐，雖然五強止步，但佢喺落選後加入無綫藝員訓練班，翌年，她於藝訓班畢業，八年來在無綫多飾演閒角，又因為經常被派演癲婆、殺人犯等角色，所以被網友封為無綫「御用癲婆」。
富家女趙希洛 爸爸經營石油生意
因為人氣急升，趙希洛火速被起底，原來她家底雄厚、學歷又高，爸爸喺澳洲經營石油生意，其母係前資深藝員梁小玲，Candice於英國大學讀法商科，讀到碩士一年級，但當年為返港選港姐而放棄學業。由於父母擅於投資地產物業，雖然舉家移居澳洲，但卻在香港買樓和買舖收租，至今物業市值全部翻兩番，加上供愛女趙希洛自住的半山梅道豪宅，三個物業市值合共約一億五千萬元。
趙希洛雖然有米，但她在大台默默由低做起，拍劇也很努力投入角色，一啲都唔錫身，她在《八卦神探》中表現突岀，成功獲得觀眾注目，之後不少演岀都被網民定，之後在《 乘勝狙擊 》則飾演千面女郎蘇麗芬，壇長做「文雀」，造型千變萬化，更不時大晒身材益觀眾！
在《 乘勝狙擊 》其中一集，講述趙希洛及徐榮等人被捉，期間她被歹徒扯爛衫，露出黑色內衣，大騷事業線！但要提到她最出色的演出，不得不說起她在無綫劇集《實習天使》中客串精神病人，所展露的演技讓網民拜服，甚至封她為「無線御用癲婆」。
生活貼地
家底豐厚，不過趙希洛並不嬌生慣養，代步的寶馬亦只是三十多萬的平實款式，早前本刊拍得她收工竟然唔係去行名店或者約人high tea，而係揸車去九龍城街市買餸，唔怕污糟在街市穿梭買完牛肉又去魚檔揀魚，攞住幾袋餸再揸車返家，生活相當貼地。
