李彩華

李彩華拍拖三年 結婚冇共識 哽咽認分手

最新娛聞

廣告

34歲李彩華同「新五虎」何遠恆拍拖三年,感情穩定多次傳出婚訊,當大家都以為阿Rain快好事近,但原來兩人已秘密分手一個月,剛過去的情人節和農曆新年,阿Rain都是孤單度過。本周一(2月26日)晚上,阿Rain單拖飛LA工作,由助手陪同在櫃位check-in,雖然帶住黑超仍難掩憔悴,本刊記者向她求證同男友何遠恆分手一事,阿Rain哽咽承認同男友已經再冇聯絡:「係分咗手,但detail嘢唔想講,唔想互相傷害!」

撰文:東方新地
圖片:新傳媒圖片庫

李彩華 缺乏安全感

李彩華同當年的「新五虎」何遠恆15年經朋友介紹認識,不經不覺已經拍拖三年,戀情由低調到近年大方認愛,更多次傳出好事近,還以為阿Rain好快做何太,想不到原來兩人於今年一月已經分手。據阿Rain好友透露,阿Rain思想傳統,每次拍拖都認真投入,都想同對方有將來一齊組織家庭,可惜兩個前度王傲山及潘啟翀都唔係咁諗,當年同阿Rain拍拖,一個瞞住女友外邊偷食,另一個又做疊馬仔欠下巨債,向阿Rain借千萬還債,令她對愛情缺乏安全感。

想趁早生B

因何遠恆熱烈追求攻陷芳心,加上男方比阿Rain年長十年,理應相當成熟,但拍拖三年,對方卻未有為二人將來計劃,感情一直原地踏步:「阿Rain思想傳統,同BoBo(何遠恆暱稱)都拍咗拖三年啦,加上自己過咗三十歲,都想快啲結婚,趁後生早啲生小朋友,佢本身好鍾意小朋友,其實男友媽咪都有催佢哋結婚,想快啲抱孫,但BoBo四十幾歲人 仲好似大細路咁,完全冇planning,阿Rain試過幾次喺傳媒面前,講話想一兩年內結婚,但BoBo都仲係毫無表示,阿Rain點會唔心淡,佢覺得好冇安全感!既然睇唔到大家有將來,唔想再拖落去,咪提出分手!其實分手件事,對阿Rain都好傷,佢啲好姊妹同Rain媽都輪住陪佢,怕佢唔開心!」

過億富婆

自從2011年主演內地劇《回家的誘惑》爆紅,Rain已經是手持過億物業的富婆,現在不用靠男人,但阿Rain唔會因此女權至上,反而好遷就男友。據知情者透露:「阿Rain喺內地劇接劇好忙,BoBo喺上海搞裝修生意亦冇時停,兩個經常分隔兩地,見面時間少好難維繫,但阿Rain對男友好體貼,為咗爭取時間見面,有時喺內地拍劇,BoBo專登飛去探佢,阿Rain拍完劇就算幾攰,都一定會陪男友食飯行吓街,好珍惜呢段感情。」相反何遠恆反而唔識體諒女友。據知情者透露:「阿Rain好孝順,唔會只掛住拍拖,乜都要預埋阿爸阿媽,好似去旅行咁,佢好多時都帶埋爸爸媽媽一齊去,仲會諗邊啲地方啱佢哋玩,但BoBo就成日想二人世界,兩個因為咁嗌交,出到去旅行,又只顧陪阿Rain,唔識細心照顧埋老人家!」思想愈來愈多分歧,難怪李彩華要忍痛分手!

阿Rain:同佢冇聯絡!

記:本刊記者 李:李彩華

記:係咪同男友分咗手?
李:係!其實都分咗一段時間。但唔想刻意去講,分開咗咪分開咗!

記:係咪有第三者?
李:絕對唔係!大家係和平分手!

記:之前仲傳你哋會結婚?點解會分開?
李:同一個人一齊,當然會好珍惜,但時間耐咗,發現都係唔work,大家性格唔夾,都冇辦法。

記:係咪佢冇計劃將來?
李:唔想detail咁去講嘞!唔想互相傷害大家!畀啲空間我哋!我依家以事業為重!

記:同佢仲有冇聯絡?
李:冇聯絡嘞!但都想大家可以再見亦是朋友!

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!