杜如風帶團被插搵笨 萬四蚊坐廉航行程趕到甩轆
廣告
旅遊節目主持人杜如風拍咗一系列乜乜攻略旅遊節目後，即有旅行社搵上門叫佢帶團，仲聲稱以親民價$13,888遊九州四日，之不過畀皮幾嘢要人坐廉航仲要早機去早機返，三日內玩晒成個九州係咩玩法？
撰文：東方新地
圖片：縱橫遊
杜如風帶團 坐廉航早機返
杜如風最近落力宣傳嚟緊復活節將會親自帶團到九州玩四日三夜，未計附加費齋團費盛惠萬四蚊，有得食有得玩仲有明星睇皮幾嘢似乎幾合理，不過有網民望真啲就發覺唔多對路囉！首先畀皮幾嘢要人坐廉航HK Express，除時delay嘥你半日都夠慘，仲要寫明11點45分飛機返港，即係朝早9點就要仆到機場，四日行程變相得番三日，好蝕抵啫！
趕頭趕命
餘下三日行程又點樣走？首先day 1直飛熊本行街觀光，夜晚就要坐2粒鐘JR到福崗，搭完機仲要捱長途車，攰到爆！第二日又坐2粒鐘車去由布院睇貓頭鷹兼去參觀神社，第三日又再返熊本睇海豚，第四日晨咁早就撇，行程平平無奇唔在講，趕到甩轆至攞命，玩得咁辛苦為乜？
除時甩底
重點係sell杜小姐帶團，但行程表列明「若杜如風小姐因個人身體狀況或其他不能預見因素導致未能隨團，客人不能藉此退出，敬請見諒」及「杜如風小姐每日隨團之時間，以當日安排為準」，換言之如果杜如風no show冇得追究，每日隨團亮相幾耐佢話事，就算見得十分鐘你都吹佢唔脹，各位團友又點睇先？
延伸閱讀：流感肆虐 黃浩然囝囝都中招
關鍵詞
杜如風
