林作遇勁敵 麥明詩 藥房太子新歡曝光
廣告
自「十優港姐」 麥明詩 （Louisa）參選以來，是非源源不絕，就連與男友大律師林作的新聞也被炒作。近日有指林作夜蒲應酬不斷，加上口花花向索女「抄牌」攞電話斷正，即時引起女友不滿，更被眨為朋友，出現分手危機。雖然兩人仍然糾纏中，不過原來Louisa身邊一直有位型男陪伴咗佢好多年，呢位型男據知叫Thomas Chong，係Louisa在劍橋大學的同學，而且係藥房太子爺，睇嚟林作今次遇到勁敵啦！
圖片來源：Instagram、新傳媒圖片庫
糾纏不清
Louisa初選港姐時已被爆與大律師林作拍拖三年，不過每次被問到戀情，兩人都冇承認又冇否認。今年六月，林作被爆趁Louisa去深圳拍劇時，在街頭向低胸靚女抄牌，Louisa當堂嬲到震，即刻喊爆話分手；不過今年中秋節Louisa又被影到同林作家人食團圓飯，明顯兩人仲糾纏中。
藥房太子 靚仔荀盤
麥明詩同林作關係夠晒錯綜複雜。近日Louisa同林作就少咗交流，不過就喺佢身邊成日見到一個高大成猛的身影，究竟係邊個嚟？佢叫Thomas Chong，家族經營藥房，而且係Louisa劍橋的同屆同學。雖然兩人唔同科，但就friend過打band，每逄大時大節都一齊過。Louisa今個月的生日party、聖誕正日都一齊過，就連Louisa處女作《失戀日》首映都有去撐場，之後管接管送。佢哋有幾close？唔使講啦！
會考19分入劍橋
在今年五月播出的《星星探親團》中，Louisa帶觀眾重遊母校劍橋大學，其實當時Thomas已經亮過相！Louisa在鏡頭前大讚對方係「社交界萬能拍檔」。另外Louisa又在節目中分享Thomas當年會考19分，未算十分出色，但就憑面試極佳的表現獲劍橋取錄，認真威水！
麥明詩：佢好靚仔
被問到有關Thomas的事，Louisa大方稱讚對方好靚仔、好nice，仲話同對方關係好好㖭。相反一問到同林作對上一次見面係幾時，Louisa即刻落閘話林作生日會自己都冇去，費事尷尬喎。
全文完
