林峯陪新女 主題公園掟公仔
撰文：東方新地｜圖片：新傳媒圖片庫、林峯IG
林峯 疑似「相睇」
林峯同吳千語拍拖逾五年，林峯曾經連講七次「好愛」千語BB，但最近兩人鬧分手，千語BB更有傳轉投國政協施子清長孫施伯雄懷抱，日前林峯亦被爆疑似「相睇」，與父母一家三口遊海洋公園時，有一對男女以及一名年約廿多歲、貌似吳千語的長腿美女同行，期間林峯戴住口罩，全程包到實，同新女一齊去掟公仔，仲一掟就掟中咗個Peppa Pig公仔送畀女方，令新女冧爆。
一盒魚蛋兩份食
林峯新女有指係內地model張馨月(Carina)，雖然林峯同佢同行時表現避忌，但兩人都有share食一盒魚蛋，又一齊去海洋劇場睇海豚，之後又到海洋館睇水母，問到林峯係咪有新戀情？佢話：「唔係，全部係親戚嚟！」之後就搭的士同女方分頭閃人。隨後林峯經理人表示：「感情事唔回應喇，希望畀啲空間佢。」而千語BB就話：「依家工作對我嚟講好緊要，真係冇乜時間，總之工作為主！」
林峯 被批拍散拖
早前本刊搵來兩大玄學家區仲德同楊天命為林峯批命，區仲德指林峯生肖屬羊，命局五行欠火，名弱感情難以控制，45歲前姻緣難求穩定，待至46歲後，2025年蛇年，此後五載方能覓得真愛。而楊天命則指林峯逢2字尾都旺桃花，要到22、23年先有真姻緣，呢幾年地下情，有拖拍但未係真姻緣。連月來林峯忙於拍攝內地劇，拍完《獨步天下》，今個月又接拍了一部內地時裝劇，劇集在港取景。據知情者透露：「成大半年留喺內地開工，難得返香港，啲朋友輪住約阿峯飯局，又或者返屋企打邊爐同開P，趁機同朋友敍吓舊。」
林峯甩千語 約朋友去「滾」
日前，林峯同一女性友人，在西環超市上糧，兩人一邊揀嘢，一邊有說有笑，情變並未影響林峯心情。女性友人推住手推車掃貨，更加同林峯一邊研究買乜好，兩人揀嘢有商有量，最後買到成車飲品和乾糧。林峯雖然屋企有米，但他亦唔係翹埋手等人服侍的少爺仔，買完嘢，自己就秤住大袋飲品離開超市。
七人車任用
買完嘢，林峯同女性友人行去攞車，工人姐姐即幫女性友人攞嘢上七人車放好，之後直駛回林峯西半山嘉林閣寓所。
未過林父一關
五年前，林峯同只得19歲的吳千語，合拍電影《男人如衣服》撻著，林峯更加愛得全程投入，曾公開七講「好愛……好愛BB」愛的宣言，對女友呵護備至，不過拍拖不久，吳千語公主病性格好快現形，經常要林峯陪出埠玩兼豪買名牌，也因此一直得唔到林父歡心。據知情者透露：「同阿峯啱啱拍拖，千語已經好似膏藥咁黐實男友，阿峯好錫佢，乜都就晒女友，成日會陪佢出埠玩，千語好追名牌，阿峯就狂買嘢氹佢，嗰時阿峯啲朋友，都唔太鍾意千語啲公主病性格，依家佢哋分手，大家都替阿峯開心，覺得一啲都唔可惜！」觀乎林峯事業再起飛，感情事應該先放一邊，等對的人出現再出擊吧！
延伸閱讀：
《周遊東京》周奕瑋 7大優點完勝杜如風
將來還有什麼演唱會值得留意？
有不少歌手宣布舉辦演唱會，小編為你整合了2023香港演唱會+搶飛攻略一覽，包含各演唱會優先購票日期、公開售票日期、門票價錢、座位表等，想搶飛粉絲必定要留意！
