穿羊水唔幫手？嫌B女喊好嘈？《東張》主持梁麗翹狂呻家傭

撰文：東方新地、｜ 圖片：梁麗翹Facebook

梁麗翹 長文呻家傭⋯

Nicole喺社交網甫出長文，佢話早喺囡囡未出世時，已經請咗個履歷啱晒心水嘅家傭，咁早請目的希望對方可以早啲適應，盡快融入佢哋家庭，點知一見真人就出事，呢位菲傭姐姐唔識煮飯、唔做家務，最後仲要Nicole老公煮埋畀佢食，最大問題仲係對方原來唔識照顧BB，好似唔識洗奶樽、唔睇洗衣液說明等等！

不過最過分係Nicole半夜穿羊水入醫院，兩公婆跌跌撞撞趕住「走佬」，見菲傭姐姐房間嘅燈開住，但係竟然完全冇出房幫忙，問都唔問，Nicole大嗌失望⋯

而令Nicole最終決定唔再請呢位家傭嘅係佢第一晚出院，BB跟家傭同房，當時BB喊，Nicole抱咗BB出去餵奶之後，對方問佢：「可否閂咗道門？」似乎覺得BB喊嘈親佢，話失望就假嘅⋯

但凡事有正反兩面，Nicole話家中成員都有彈性工作時間，可以互相配合；婆婆好掛住個孫，會經常到她家探B幫手；而中點姨姨服務多年，做事快捷妥當，也願意騰出多點時間過來清潔，而Nicole會抽更多時間親自湊B，見證BB成長，未常唔係一件好事！

她又說如要生下一胎，睇怕到時要再請家傭，希望下次會遇到個好的⋯

有米男友 兩次求婚

梁麗翹係2011年港姐選美奪得「國際親善小姐」和「旅遊大使」，之後多做主持工作，去年她在微博宣布男友求婚，更大晒梨形婚戒，談到求婚過程，梁麗翹說：「當然係好溫馨、好甜蜜，佢分別喺上海同香港同我求婚，畀驚喜我，準備咗好多花，其實佢喺香港求婚時，我已經應承咗，不過佢本身Plan咗喺上海求，所以我好着數，有人向我兩次求婚！」

去年二月結婚

梁麗翹去年二月在美國同圈外男友結婚，其後返港復工，她在九龍站的一間酒店補擺喜酒同親友分享喜悅，下午時份與好姊妹莊思敏、莊思明、莊思華、彭慧中、劉晨芝及謝文欣在總統套房拍照！

梁麗翹造人秘訣計日子同做運動

梁麗翹其實自懷孕後身體經常不適，容易作嘔又易攰，幸得體貼老公照顧，所以辛苦但值得！Nicole向母親及友人公布喜訊，大家都戥她高興：「當時我未知BB係仔定女，老公就知道，佢安排我切完蛋糕就用顏色宣布，好有心思！」Nicole仲話預產期係明年五月，暫時希望順產，除非醫生建議開刀。

梁媽媽聞囡囡懷孕 開心狂笑

Nicole在IG貼咗條片，佢原來用神秘方式向媽媽宣布喜訊，原來梁麗翹送咗件印住「GrandMa is my name.Spoiling is my game」嘅衫仔畀媽咪，梁媽媽好開心咁拎住笑話咁細件，要減肥至穿得下，當時佢仲未明囡囡嘅意思⋯⋯

望BB超聲波相 開懷笑

Nicole見阿媽仲未明，就引導問佢唔明件衫係咩意思，梁媽媽當堂俾佢拋窒，就話：「字面我知點，咁有乜嘢深層意義？」於是Nicole拎張超聲波相俾佢睇，梁媽媽O晒嘴，之後好驚訝問咗多次：「吓？真㗎？真㗎？」之後一直拎住張超聲波相甜笑。就嚟做婆婆，梗係開心啦！