陳秀珠

港姐出身 演得又talk得!重溫陳秀珠1/3世紀的星光

最新娛聞

廣告

剛播完嘅TVB劇集《BB來了》,除盧宛茵演巴辣奶奶搶鏡外,演超級緊張個女李佳芯,同親家奶奶盧宛茵撐到行嘅屋邨師奶陳秀珠亦同樣獲觀眾讚賞,快將60歲港姐出身嘅佢入行39年,入行從影超過三分一世紀,今期重溫佢少女時代同戲劇風采,正到拍晒枱。

撰文:東方新地 圖片:新傳媒圖片、陳秀珠微博

陳秀珠 演活絕世好媽

陳秀珠在《BB來了》飾演李佳芯媽咪,不斷催個女生B,自覺自己湊大十幾個BB,又聲稱讀咗陪月課程,對於湊B絕對綽綽有餘,點知畀女兒發覺原來媽咪都好唔專業,生咗都唔放心俾阿媽湊。

陳秀珠腰患復發,兼體力透支,雖然她極力死撐湊B,但仍被李佳芯發現。其實佢咁做都係為個女,想佢好好坐月!完美演繹出為人母的心情,為咗子女真係可以命都唔要!

陳秀珠 獨力扛起頭家

「唐秋」羅樂林當年爛賭加上整傷手不能工作,令陳秀珠多年來獨力扛起頭家,更視他如透明,唐秋遇溺月蟬亦無問候反而踩多兩腳,羅樂林本來仲忍氣吞聲,直到出院返屋企發現心愛嘅金魚歡歡、喜喜死咗,終於大發雷霆鬧陳秀珠多年來唔顧佢感受,再離家出走。而陳秀珠獨對家中空魚缸,終於醒起自己忽略老公多年,而月蟬勸女兒期間亦透露對唐秋的歉意,唐秋聽到不再嬲,兩夫婦和好。

79年選港姐入娛圈

79年任職航空公司顧客服務主任嘅陳秀珠,因為想見偶像繆騫人而參選香港小姐,泳裝環節盡顯其均勻身材,參選時只得21歲,雖三甲不入但簽約無綫後備受力捧。

港姐泳照晒乳溝

無綫每年都會為參選佳麗影宣傳硬照,呢張陳秀珠趴喺沙灘聽卡式錄音機睇書嘅相,露出三吋長乳溝,簡直美不勝收,加埋下巴粒銷魂癦,問你點頂?

80年《K-100》做記者

陳秀珠落選港姐後,無綫問佢有冇興趣做節目報告,Rebecca一口答應,自此出鏡率愈嚟愈多,80年獲派擔任節目《K-100》記者,口齒伶俐嘅佢極之稱職。

80年《體育世界》任主持

由於陳秀珠喺《K-100》做得出色,無綫再委派佢夥拍剛過檔無綫嘅林嘉華,擔任全新節目《體育世界》嘅主持,兩人表現淡定又自然備受讚賞。

82年影性感相畀飛84年周刊再晒波罅

82年4月陳秀珠突然替《明報》影咗一輯超性感低胸相,無綫高層極之不滿下將佢調離《體育世界》,陳秀珠從此專注拍劇,翌年更加入《歡樂今宵》。84年陳秀珠食髓知味,繼82年再次影性感相並登上八卦雜誌嘅封面,水著上陣再晒三吋波罅,不禁大讚誇啦啦,無綫高層呢次好似隻眼開隻眼閉。

81年處女劇《風雨晴》

陳秀珠處女劇集《風雨晴》係套青春溫情劇,仲要係女主角之一,合演者有石修、黃日華、湯鎮業、苗僑偉、景黛音、雪梨、陳玉蓮、張國強、李香琴、羅蘭等,陣容雖強勁但套劇冇乜noise。

84年《笑傲江湖》拍發哥

84年已成當家花旦嘅陳秀珠,喺金庸首部電視版《笑傲江湖》演日月教教主任我行獨女任盈盈成初代「魔教聖姑」,劇中秀麗嬌美、機智聰明、敢愛敢恨、溫柔長情,深愛由周潤發演嘅令孤沖,令人印象深刻。

86年「翁美玲接班人」

86年古裝劇《陸小鳳之鳳舞九天》原定由翁美玲演聖教聖女白晶晶,但85年佢突然開煤氣自殺,由陳秀珠頂替接演,劇中愛上萬梓良演嘅風趣瀟洒陸小鳳,陳秀珠自此被喻為「翁美玲接班人」令佢紅上加紅。

85年《鍾無艷》奸西宮

健力士「世界最長壽的綜藝節目」《歡樂今宵》81年開始推出長篇短劇,85年《鍾無艷》能忠能奸嘅陳秀珠,演九尾狐化身嘅西宮娘娘夏迎春,同奸國舅合謀謀朝篡位,多次誣害鄭裕玲演天龍星托世嘅東宮娘娘,奸到出汁。

83年孖華仔拍廣告

人紅自然多廣告,有眼鏡品牌搵嚟公仔箱大紅人劉德華同陳秀珠拍平面廣告,83、84年兩人couple式多次合作,戴上闊框眼鏡,精靈又醒目。

88年《誓不低頭》 港女始祖

在88年神劇《誓不低頭》本來係謝文武(鄭少秋飾)老婆,但對方被陷害入獄後,居然改嫁老公仇人岑波(郭鋒飾),原因之一係貪岑波有錢!

99年《刑事偵緝檔案IV》做宣萱表姨

睇翻深夜重播嘅99年《刑事偵緝檔案IV》,陳秀珠演宣萱表姨,個樣廿年如一日都冇點變過。

劇中佢仲係殷寶莉(程可為飾)嘅私家看護。

95年《刑事偵緝檔案II》檔案八:寸草心

其實95年嘅《刑事偵緝檔案II》陳秀珠有份演其中一單案件,講舞女楊曉菁Betty(陳秀珠飾)為了籌錢替女兒治病,殺死嫖客胡兆宗,但不巧被曾志佳(歐紹偉飾)撞見。曾志佳讓屬下莫日飛(羅維飾)幫她做時間證人,但條件是她必須幫他再殺另外一個人曾百年(張英才飾)。當楊曉菁給曾百年下毒後,卻再次被人撞見。楊曉菁知道這次一定跑不掉,為了女兒的將來,於是她決定自殺,然後佈置成被曾志佳殺人滅口的局,以此來換取一筆保險金,給她女兒將來用。

劇中陳秀珠飾演嘅舞小姐Betty亦係位「非常媽媽」,生下女嬰冬冬,表面上對女嬰漠不關心,高婕(郭可盈飾)不值,常代湊女。

01年《酒是故鄉醇》馬德鐘媽媽

02年《戇夫成龍》宣萱媽媽

04年《一屋兩家三姓人》宣萱阿姨

由表姨、媽媽再到做番阿姨,宣萱同陳秀珠經常合作,兩個人至今都係keep得勁好!

13年《心路GPS》演陳展鵬媽媽

13年《愛我請留言》演黃翠如媽媽

陳秀珠喺《愛我請留言》係茹初見(黃翠如飾)嘅媽咪,劇入面叫「mamayu」,同《BB來了》一樣又係幫人湊細路!劇中珠姐幫黃浩然湊囡囡悠悠豬(楊鎧凝飾演),佢喺呢套劇同樣演得好到位!

15年電影《紀念日》做方力申阿媽

16年《警犬巴打》鍾嘉欣媽媽

1999年陳秀珠 甘願做未婚媽媽

陳秀珠喺《BB來了》飾演李佳芯媽媽,為個女同外孫女,不惜同李佳芯奶奶盧宛茵撐到行,又犧牲自己嘅睡眠時間幫阿女手湊B,現實中,陳秀珠都係一位慈母!1998年陳秀珠拍劇時發現懷孕,當年佢已40歲,屬高齡產婦,翌年8月她在美國誕下男嬰,取名陳迪加,但她一直不肯公開BB爸爸的身份,同年接受報章訪問時,坦言一向好恨有個孩子,但就無想過結婚,因爲感到無此需要,甘願身兼父職撫養兒子。

本刊記者早年見珠姐帶住囝囝迪加到九龍城買外賣返屋企食,鮮有露面嘅迪加生得眉清目秀,同媽咪成個餅印咁。珠姐沿路同阿仔傾偈話:「我想剪頭髮。」阿仔趷高腳摸一摸媽咪嘅頭髮話:「我鍾意你長頭髮多啲!」珠姐笑一笑,搣一搣佢面珠話:「好啦,唔剪啦!」之後母子就拖住手行番屋企,場面溫馨滿瀉。

珠姐曾在訪問中說,每個女人都會去到一個階段,有生BB想法,當時佢就正處於呢個階段,雖然做一個單親媽媽令佢有好大壓力,但好彩得到屋企人同好朋友嘅支持,至於外間嘅反應,佢話佢控制唔到:「最初以為人哋一定會用另一種眼光嚟睇我,不過依家日子一過,我發覺其他人對我嘅眼光比想像中好,大家都好包容,好OK,令我覺得自己就同一般嘅媽咪冇乜分別。」

講到囝囝用咗「鹹蛋超人」個名,珠姐話只係巧合:「因為佢喺加州出世,我又鍾意個『迪』字,所以咪叫『迪加』,我覺得幾好聽呀!好彩我個仔好鍾意超人,佢啲同學都叫佢做『超人迪加』,佢鬼咁鍾意!哈哈!」珠姐又指自己不乏追求者,但佢想等囝囝再大啲先算:「話晒我As一個Single Mother,要更加錫個仔多啲,因為佢已經比其他人少咗一Part,如果我去拍拖而忽略咗佢,咁個細路點算呀?」迪加今年已經19歲大,相信珠姐可以放心晒啦。

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!