群星齊撐！薛家燕化身Captain Nancy首開紅館個唱！

薛家燕首開紅館個唱慶祝入行60周年

家燕姐唔止之前同網民玩埋一份，今次仲認真以「Captain Nancy」為主題，於今年12月初舉行首個紅館個唱，慶祝入行60周年。見到海報同宣傳照片中嘅家燕姐換上威風凜凜嘅英雄服裝，當然少不了谷一谷，慷慨大騷事業線啊！

原來家燕姐都唔係第一次入紙紅館，今次碰巧申請到入行六十周年嘅最後一個月嘅檔期，本來都擔心年中嗰排兒子又要結婚，會分身不暇，但喺阿女鼓勵之下決定開今次個唱，真係雙喜臨門啦～

鄭丹瑞做演唱會創意總監 群星齊撐

今次家燕姐主要係想分享60年嘅過程同埋一啲集體回憶，邀得鄭丹瑞做演唱會創意總監，仲透露會有強大嘅嘉賓陣容！唔少得嘅當然有一班好姊妹七公主，仲有四哥謝賢，而其他天皇巨星就未有公佈住！

「十字步2.0｣

記者會上，家燕姐更帶領其他幕後人員齊齊大跳招牌舞蹈「十字步」！佢隨即仲話舞蹈將由幫唔少天皇巨星排舞嘅Sunny Wong編舞，加入手部動作，升級為「十字步2.0」！想睇就要留意家燕姐嚟緊嘅MV喇！

鬼馬嘅家燕姐仲貼心「解釋」咗十字步嘅來源，又喺Instagram同大家互動～

好友站台 感動收「鑽石咪」

記招當日，七公主中嘅陳寶珠、馮素波、王愛明都有為家燕姐站台，又分享相識數十載點滴，最後仲送上鑽石咪俾家燕姐，場面感人。

雖然未能出席，但家燕姐嘅圈中好友及後輩包括成龍、謝賢、譚詠麟、許冠傑、青山、胡楓、張智霖都有送上祝福片段。

主題曲MV 陣容強大

嚟緊演唱會主題曲《Captain Nancy》嘅微電影MV會喺8月17日公開，日前就公佈咗MV預告，見到Captain Nancy女俠上身，出動拯救人民。今次MV拍攝由錢國偉操刀，仲邀得鄭丹瑞、林敏聰、田啟文、邵音音、唐文龍、吳業坤、胡琳、姜麗文客串演出，而王梓軒及C君亦有參與歌曲創作。

睇到預告都知今次除咗大打人情牌，仲係高成本製作！今次演唱會真係不容忽視啊！

網民點睇？

唔少網民都有留意Captain Nancy今次開演唱會，反應就未見好好，但有人就留言話只係因為今次演唱會嘅年齡層對象並唔係一眾網民啦！

現年68歲嘅「Captain Nancy」家燕姐，其實真係好潮，仲有玩開IG添！睇返啲相，仲可以發現家燕姐用Apps嘅技能愈嚟愈好，除咗加吓字加吓圖框，最緊要係美肌吖嘛！！

當然唔少得晚裝照，但就家燕姐就收埋咗條事業線，真係好可惜啊！！！

Captain Nancy真係好玩得㗎，仲hashtag過自己做「登基燕」添！