談同洪永城復合 唐詩詠：到發生先知道有冇可能！

撰文：東方新地

唐詩詠談同洪永城復合

洪永城在頒獎禮前瞓身力撐，仲話買重唐詩詠，唐笑說：「其實我都多謝咗佢，係感動嘅,嘻嘻⋯⋯(有冇可能復合?)呢樣嘢要去到發生先知道有冇可能。」 講到會否急於結婚、生BB？唐輕鬆笑說：「我諗女仔都會有呢個諗法，但係未必會急或者唔急，我諗遇到嗰個人嘅時候就會去諗，如果當身邊冇呢個人就唔會諗，同埋依家女仔好多嘢遲少少做都冇所謂，就算係生BB都好，所以呢一刻未必有諗，但唔知道過多兩個月會唔會諗，始終都係女仔嘛。其實一向拍拖都希望搵到一個可以係一生一世嘅人，可能最 好嘅人要慢慢了解同認識，因為依家認識自己多咗，知道自己需要乜嘢，可能了解嘅過程要長少少。」

回歸單身

睇番單身嘅唐詩詠，喺舊年5月同洪永城同時喺IG宣佈分手，對於分手原因，一方面有傳兩人喺婚期上冇共識，亦有傳女方同洗米華愛將拍拖而分手，當時洪永城一力承擔所有問題，又話有一個被稱為「不能錯過的女友」嘅女友，令佢承受唔少壓力，但呢個都係佢嘅福氣，仲直言希望會保護詩詠，因為仍然愛佢！不過去到舊年11月洪永城出席公開活動，就話雖然未有對象，但ready好準備投入新戀情。但上周有傳媒影到洪永城喺西貢嘅屋企出發去北角會合詩詠，之後佢哋再各自揸自己架車去太古坊食飯，點知二人發現傳媒後，詩詠直接揸車走人，得番洪永城自己食，不少網友猜測佢哋復合！

唐詩詠：只係簡單嘅聚會

不過早前唐詩詠就喺電視城錄影，當講到係咪同洪永城復合，佢笑住話：「多謝大家關心，都係好簡單嘅聚會，嗰陣仲有其他嘅朋友喺度，我哋唔係仇人，所以都可以見面，大家唔使諗咁多。」詩詠仲話明白大家見到佢哋約合係會敏感啲，所以專登分開去，只因唔想有太多不必要嘅揣測！當被問到有冇機會復合？詩詠就話：「隨緣喇，隨緣喇！」那邊廂洪永城接受傳媒訪問都同樣否認復合：「唔係，朋友聚會，想食飯啫！」

洪永城：同詩詠唔可能復合

那邊廂，洪永城早前喺網上為唐詩詠爭視后打氣、兩人又被影到單獨食飯，唔少網民都希望佢哋復合！洪永城接受訪問時稱單獨食飯唔代表復合，更指自己經常同經理人單獨食飯，所以根本唔算甚麼。之後被問到有無可能同詩詠復合，洪永城坦承應該係唔可能，兩人現時係好朋友、好同事！

唐詩詠被封為「最佳女朋友」、「不能錯過的女友」

唐詩詠被外界形容為「最佳女朋友」、「不能錯過的女友」，原因係佢入行以來戀聞不多，初出道拍港台劇集《Y2K》跟余文樂撻着，但呢段戀情很快結束，之後詩詠同崔建邦拍咗9年拖，兩人屢次分手又復合；崔建邦身邊有第三者或陷入低潮時，詩詠都係不離不棄。最後崔建邦承認有新歡，二人九年情才結束！

提到台慶當晚，大會摷番一張《四葉草》嘅相出嚟，詩詠未有因此感到欷歔：「冇呀，我覺得大家都幾好吖，冇乜點變吖！哈哈！始終呢個係成長，我去街，啲人成日會同我講「細細個就睇我」講緊就係《四葉草》，對大家嚟講好深刻嘅印象，我能夠陪住某啲人成長，係一件好事嚟！」

性感無尺度

唔少女士都希望身形纖瘦，唐詩詠就得天獨厚，食極唔肥：「我其實由細到大食極都唔肥嘅，再加上骨瘦啩，我覺得瘦同肥都冇所謂，最緊要身體健康。 我其實係好食得，但我唔知啲嘢去咗邊。可能腸胃吸收唔係幾好，所以我都有做番啲運動。」其實靚冇得懶，詩詠不用工作的時間，會做Gym、跑步、打羽毛球，而去年就因為有套劇而去學咗游水，她說：「依家希望有多啲muscle，令到(身形)感覺冇咁薄。」早前唐詩詠喺ig上載幾張做gym嘅相，相中嘅佢著住sport bra，真係好fit！

之後佢又上載玩戰繩(Battling Ropes)嘅短片，仲留言：「Success doesn’t start in the gym.It starts in your mind.」見佢着住sport bra拎住兩條繩起勢咁揈，深長嘅事業線同條繩一樣，波濤胸湧，起伏不定，睇到網民鼻血直流，個個都讚佢keep爆！

早前有傳TVB出「限奶令」，禁女藝人太性感，唐說：「冇人同我講，一直以嚟喺我身上都冇發生過呢啲事，所以對我嚟講都冇乜影響。」講到性感的尺度，她笑說：「冇㗎，最緊要靚！」唐詩詠升呢做視后有排忙，新年後會開新劇，現在忙睇劇本同準備工作。 而新劇她會同馬明、Ali(李佳芯)合作：「係一個醫生題材嘅劇集，會有好多唔同嘅case，同埋絕大部分嘅事都會發生喺醫院入面，會比較少講私生活，屋企戲會少啲。」