【跳躍生命線】配角搶戲 與監製方駿釗高收視前作如出一轍

撰文：東方新地｜圖片：新傳媒、Instagram、劇集截圖

《跳躍生命線》雄姐殉職

《跳躍生命線》收視屢創高峰，為近年少有的高質本土作品，劇中各人物鮮明突出，其中張彥博飾演的雄姐係全劇最受歡迎人物之一，與何廣沛、郭子豪經常以三兄弟姿態示人，雄姐性格溫柔體貼、單純天真，令觀眾留下深刻印象！

可惜雄姐呢個角色喺早前一集，因接報到唐樓單位出勤時，房間地板突然坍塌，雄姐最後墮樓受重傷，並送上救護車趕往醫院搶救。何廣沛一邊用盡全力為好友兼同袍雄姐做心肺復甦，一邊大叫：「雄姐醒啊！」，睇到觀眾心都酸埋。

可惜最後雄姐宣告死亡，原本以為搶救一輪後會有個醫生走出嚟搖頭話：「對唔住，我哋盡咗力。」，不過今次無綫似乎有別於一向做法，捨棄舊有模式，反而以新聞報導手法報導雄姐殉職。

一幕幕回憶重現觀眾眼前

與此同時，劇集更安排雄姐的暗戀對象River(李靖筠飾) 含淚彈結他，一幕幕回憶重現觀眾眼前，讓觀眾從入學堂開始到出班一同回顧雄姐點滴，賺人熱淚！

最後連劇名及片尾曲都由平時的彩色轉成黑白，再配合雄姐講出：「咁多位兄弟，我落更先啦，Good Day！」，成個效果極為煽情，同時亦為雄姐呢個角色嘅一生畫上完美句號。

《跳躍生命線》出色配角們：

雄姐殉職令人心酸，其實《跳躍生命線》播出以來都有不少出色配角令人讚賞，好似現實中都係夫婦的陳榮峻、吳香倫飾演的明叔、明嬸，為一對樂天知命、恩愛非常的老夫婦，可惜世事無常，兩人在劇中先後離世。

監製方駿釗高收視套路

監製方駿釗在是次《跳躍生命線》中，以救護行業作牽引，以多位角色交織出有人情味、令觀眾有共鳴的故事，如同其上兩部作品《一屋老友記》和《降魔的》的套路。《一》及《降》兩部劇播出時，亦有唔少主角以外的角色引起迴響，大家仲記唔記得？

2016年《一屋老友記》

兩年前《一屋老友記》由TVB福將歐陽震華主演，講述寶家四兄弟姊妹一同回到祖屋居住，並遇上鬼魂夫妻的故事。劇集以親情為主題，又會帶出主角各自面對的困難，與現實社會相當貼近，成功引起觀眾共鳴！

細寶－張彥博飾

張彥博在《一屋老友記》飾演廢青細寶，讀完大學後乜都唔願做，寧願搞下音樂唔正正經經打工。張彥博憑細寶呢個角色成功入屋，如今飾演「雄姐」又有高水準演出，一定愈來愈多演出機會！

三寶－張頴康飾

除了細寶張彥博，入行多年的張頴康亦憑三寶一角廣受觀眾認同，之後於《TVB馬來西亞星光薈萃頒獎典禮2016》勇奪飛躍進步男藝員獎，成功彈起！

白樺、依蘭－胡楓、羅蘭飾

《一屋老友記》中白樺、依蘭呢對鬼魂夫婦，仿佛係為修哥及羅蘭姐度身訂造，兩位老人家的演出時而鬼馬時而令人感動，出色！

2017年《降魔的》

《降魔的》可謂去年大台最出色劇集！馬國明飾演的士司機兼見習驅魔人，不過降魔伏妖情節似乎未係最重點，反而係一眾配角帶出草根階層的貼地故事，意外地令人有共鳴！大家記唔記得「龍貓」同「些粉」？

龍貓－何遠東飾

何遠東飾演的龍貓為家人努力工作，可惜因意外慘死，死後見到自己的家人與朋友，得知朋友們善待自己的妻兒，而且對自己滿懷思念，內心十分感動。更有一幕龍貓熱淚盈眶地表達心聲：「我這輩子沒甚麼成就，可大家都還記得我，聊起我，都是歡笑和開心的事，那麼最起碼我也是一個不錯的胖子

何遠東將呢個好好先生的角色演繹得非常好，角色是一個平凡的人，但性格行為卻深深地刻劃在親人朋友的心中。有時候金錢、成就未必最重要，只要有一班感情深厚的朋友知己已經足夠。

些粉－趙永洪飾

趙永洪飾演的些粉，本來係一個好賭好色之徒，「草根的士佬」演得入木三分。後來些粉因為要去捉精靈，間接令龍貓遇上意外慘死。當醫生宣布龍貓正式死亡時，內疚，恨天不公的心情充斥全身，真情流露痛哭，更不停打自己。

趙永洪在呢場戲演技大爆發，由一開始見到龍貓死亡的呆滯，由呆滯到怨恨自己的無能，怨恨天的不公，最後再到傷心與怨悔集合，淚腺爆發；一層又一層地剖析內心的情感，自然不造作的喊技令人動容。

力哥力嫂－金剛小儀

金剛小儀在片中客串的力哥力嫂，其實係主角馬明的父母，在多年前葬身於大火中。但由於兩人並不知道自己已死，一直不斷重複過著昔日生活，但其實鬼魂一直都是陪伴在馬季身邊，守護著兒子。

金剛小儀在《降魔的》收起過往的搞笑形象，雖然出場的時間不多，但已經深受市民的喜愛，愛護兒子的演技更是大獲好評。