王子 鄧麗欣 方力申

鄧麗欣甜笑認愛王子 小方掩面網民祝福

最新娛聞

廣告

鄧麗欣(Stephy)認愛啦!現年34歲嘅Stephy同拍拖十載嘅方力申都分咗手兩年有多,期間唔少傳聞話復合有望,又傳跟同性密友關係密切,就連Stephy自己亦多次透露自己有追求者,但今次真係公開認愛前台灣男團Lollipop棒棒堂成員邱勝翊(王子)啦!見Stephy笑得咁甜,小編都好為佢開心啊!不過就唔知舊愛小方依家係咩心情呢?

撰文:東方新地 | 圖片:王子邱勝翊Facebook方力申IG限時動態、東方新地

應采兒撮合二人

Stephy同王子同屬金牌大風,縱使識咗好耐,不過多年嚟工作上都從未有交雜,咁究竟佢哋係點發展㗎?!原來,係經由應采兒就媒人約飯局,佢哋就認識並開始熟絡,咁就撮合咗呢對情侶啦!雖則呢場姊弟戀就相差咗六年,但Stephy都有信心話依家都2018年,大家接受能力都好高,仲叫大家畀啲空間佢哋咁話。

鄧麗欣願低調保護戀情

其實更早之前,Stephy已經被指喺4月與王子同遊蘇梅島,不過睇嚟當時佢哋都想護苗,所以嗰時就雙雙否認嘅~不過,認愛之後,Stephy就表示,希望低調處理感情事,因為根據佢嘅過往經驗,感情係兩個人嘅事,但因為身為藝人所以就變得好透明,而低調都只係想保護戀情。好啦,但小編都係想恭喜Stephy事業愛情兩得意,因為佢之前獲邀出席《第16屆紐約亞洲電影節》,成為首位獲得「亞洲新秀獎」嘅香港藝人,仲用英文致詞被網民大讚有進步添!

王子左右為難

另一邊廂,喺台灣嘅王子都於同日下午喺社交平台貼文,表示自己左右為難,叫大家愛屋及烏,似係間接認愛喎!睇嚟佢就怕自己啲粉絲嬲嬲豬,會連累Stephy被攻擊喇!不過,其實粉絲都係留言祝福居多,王子又唔使太擔心嘅~

小方掩面:「別提了!」

至於前度小方(方力申),日前赴廣西工作時,就喺於IG開限時動態,同粉絲互動一下,點知竟然有粉絲問佢有冇女朋友!小方就更加以手掩面,大大隻字同粉絲講「別提了!」,同甜笑認笑嘅Stephy都有啲對比喎⋯⋯

其實小方Stephy分手之後一直都係再見亦是朋友嘅,之前一齊出席活動,小方仲係台上主動提出同舊愛Stephy握手,嚇到Stephy一面錯愕但都有大方合照。不過小編就隔住個Mon都覺得尷尬喇⋯⋯

雖然小方就話「別提了」咁啦,但其實喺佢嘅另一個限時動態入面,當小方同大家介紹緊自己睇世界盃有咩宵夜食嘅時候,就無啦啦有個神秘女子一不小心攝咗入鏡,嚇到小方要連忙澄清,大呼:「佢唔係我女友我講多次⋯⋯」

 

雖然Stephy小方呢對情侶當年真係好深入民心,不過話咁快都過咗兩年幾,依家見到Stephy笑得咁甜咁開心,小編都好真心祝福Stephy王子呢一對!唔知小方又會幾時先會同大家提下佢嘅女朋友呢?

方力申與女友Maple Yip感情發展迅速?

方力申日前在出席活動時,公開回應自己與邪教性侵受害者Maple Yip的緋聞,不但大方承認戀情,更提及雙方家長⋯⋯詳情請看

方力申女友Maple Yip為何加入了邪教?

Maple Yip曾經在2022年3月現身南韓一個反邪教組織舉行記招,當中她提到於2011年時自己還是高中生,因感覺生活空虛,在銅鑼灣被攝理教教徒⋯⋯詳情請看