陳自強

金牌經理人陳自強:只跌過一次眼鏡

最新娛聞

廣告

有「金牌經理人」之稱的經理人陳自強 (Willie),昨晚在睡夢中離世,享年76歲。Willie一生與娛樂圈結下不解之緣,在8、90年代擔任多位巨星的經理人,一手捧紅多位天王天后,包括成龍、鄭裕玲、張學友、張曼玉、鍾楚紅、王祖賢及關之琳等。Willie早年曾接受本刊專訪,大談眾巨星背後不為人知的故事,以及唯一一次跌眼鏡睇漏眼的經歷,現在讓我們一起回顧Willie不平凡的一生。

陳自強 —金牌經理人

陳自強 (Willie) 最初係做成龍的經理人,但點解後來會簽咗咁多藝人?Willie表示:「85年張曼玉啱啱約滿TVB,出嚟拍戲,拍成龍嘅《警察故事》,佢同我講:『我都想喺呢行發展,你可唔可以take care埋我?』嗰時(張)學友又係搵緊經理人,我又簽埋,之後其他藝人好似雪球咁滾嚟。」

陳自強爆女星們爭寵

八十年代,Willie旗下藝人鄭裕玲曾創下一日內同時趕九組戲紀錄,而被稱為「鄭九組」。Willie稱:「嗰時電影好蓬勃,嗰時我五個女(鄭裕玲、張曼玉、關之琳、王祖賢、鍾楚紅)、學友同(梁)家輝,冇一個一年內會接少過十部戲。當然有咁多個女喺手上,有好多會呷醋,真係有人問:『點解老竇你咁偏心?點解得獎、賣座嗰啲好戲,你梗係搵佢唔搵我?我有邊度唔好?我又勤力過佢,又靚過佢。』我同佢講我今日推薦咗你拍三部戲,三部人哋都話我諗諗先覆,做呢行係咁,一定要有耐性,你冇耐性就想登天?」

陳自強 曾被黑社會恐嚇

傳聞當年黑社會染指電影圈,Willie有冇俾人恐嚇過呢?佢表示:「嗰時有人想搵A女拍戲,但佢一日已經三組戲,我話冇期,對方話:『邊個嘅戲?我去度!』我再話呢部分劇本唔係好啱,對方話:『我改!改到你個女鍾意為止。』我話等我返去同個女傾吓先,對方好大聲話:『原來你係messenger?你唔可以做主,咁你做咩經理人啫?你話要傾,你去傾,總之我下個星期就開戲。』講完成份劇本掉喺地下,嗰度係酒店大堂,好多人睇住。」

咁最後點收科?Willie就話:「我下晝三點幾走去片場搵A女,佢一見到我都知唔慌好嘢,喊住話:『老竇,我四日未瞓過啦!』我同佢講你諗住啲錢一路飄向你,依家後生,辛苦少少啦!嗰時為咗令到佢唔喊、為咗令佢肯,差唔多咩大話都要講。」

陳自強爆學友頹廢史

咁Willie係點樣決定簽一個藝人,又點幫佢發展?Willie道「:簽每一個藝人,我都問佢入呢行嘅目的係咩,學友好大個family,佢同我講:『好簡單,我想買一棟樓俾我爹哋媽咪住啫!』我同佢講你要聽話、乜都要做,佢話OK,我再同佢講你錄隻唱片,到發行要六個月,再要等分錢,你點等到俾首期,嗰時學友拍緊一部戲片酬四至五萬,我第一部同佢簽嘅戲五十萬,係足夠俾佢俾到首期買樓。」

 

「但學友好痛苦,嗰個時期嘅學友係好唔鍾意拍戲,嗰時啲戲帶少少鹹濕,佢去做,但日日唔開心,日日拍完篤波,開始飲酒,嗰段時間佢差唔多晚晚都醉,送佢去台灣表演,五點鐘飛機,佢四點半先「pair」吓「pair」吓去到機場,我日日俾佢啲影迷、歌迷係咁鬧,鬧我將佢偶像變成咁。直至拍到《旺角卡門》烏蠅,佢對電影先開竅,我係幫佢完成咗願望,但係佢嘅代價都唔少。」

陳自強:只跌過一次眼鏡

鄭:有冇試過有藝人搵你簽,但你冇簽?陳:有一個,但我唔會開名,我都係問嗰個問題,你嘅願望係乜嘢,佢話:「一年之內想搵二千萬。」嗰時新人一部戲十幾萬片酬已經好好,我點計條數都計唔到二千萬出嚟,就say no,呢個真係大跌眼鏡,佢不但show到俾我睇佢一年搵超過二千萬,仲變咗紅星。

 

Willie旗下粒粒皆星,有冇邊個藝人最容易湊?Willie透露:「鄭九組(鄭裕玲)係好容易湊嘅一個,佢好專業,亦係唯一冇叫我做老竇嘅一個,佢打親電話俾我,問我:『邊個部戲仲有幾多日拍完?邊個部戲尾期收咗未?』佢問到我,我答到佢,佢覺得我已經做到一個經理人要做嘅嘢。」

 

咁有冇邊個藝人要特別照顧多啲?Willie大爆:「初初簽Maggie(張曼玉)同學友,Maggie要我做個開支表俾佢,同佢講你今個月買咗幾錢衫,我提議你下個月就要慳番啲,學友又係袋咗啲錢唔知去咗邊,又係要做埋數俾佢。」而最嗲的藝人原來係紅姑!Willie:「紅姑『老竇、老竇』好親切咁叫我,成日同我講『我煮鴨你食,你嚟我屋企。』」

全文完

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!