釣中億萬千金 袁偉豪為張寶兒禁慾

36歲袁偉豪與25歲張寶兒情定於非洲坦桑尼亞，拍外景日對夜對早已互有好感，對住性格爽朗平易近人、又懂得欣賞自己的張寶兒，袁偉豪立即把舊愛拋諸腦後！

血氣方剛要學忍

袁偉豪回復單身半年就遇到Bowie，喺非洲日對夜對，據知男方自覺同Bowie好啱channel，大家對愛情嘅睇法好一致，嗰時佢只係知Bowie喺外國讀完書返嚟，完全唔知佢係富家女。後來畀傳媒踢爆戀情起埋底，先知佢爸爸來頭咁勁。不過Bowie係虔誠基督徒，婚前要守貞，袁偉豪唔係信徒又血氣方剛，為咗長遠發展，看來袁偉豪點都要忍吓！

手握門匙上樓

事實上袁偉豪和Bowie各有各忙，拍拖時間少之又少，早前袁偉豪仍未返港，張寶兒駕駛其四驅車前往男友位於清水灣半島的寓所，上樓後逗留唔夠半個鐘就返回自己位於將軍澳的寓所。其後Bowie透過電話回應，表示因男友不在港，佢會上門為對方收信、執屋與撻車等。呢個女友真抵諗！

女家接受戀情

熱戀初期當然想日見夜見，拍拖五個月來，由地下情到浮面，袁偉豪與張寶兒都抱住順其自然的心態，當初被踢爆戀情後男方竟一口承認，反而女方只保守回答「仍在了解中！」到現在連男友家鎖匙都穩握手中，張寶兒可以正式被封「新豪嫂」，二人感情如坐火箭發展迅速。

張寶兒：佢亦令我好放心

拍拖唔夠半年，袁偉豪與張寶兒雖然打得火熱，但二人未有同居想法。本刊記者問張寶兒同袁偉豪拍咗拖5個月，係一個點樣嘅男友？她說：「佢好錫我，好細心有責任心，我好信佢，佢亦令我好放心。我哋都做呢行，信任好重要。(你係基督徒，係咪堅守拒絕婚前性行為呢項戒條？)我覺得信仰係好個人嘅嘢，基督係我嘅神，我有自己底線，清楚自己做緊咩，亦會為自己所做嘅嘢負責任，唔會亂嚟。(帶咗男友返屋企見家長未？)未呀！等有機會先。」問到會否考慮與男友同居， 佢笑言：「我哋已經住得好近啦！」

自小與家人感情要好的張寶兒，與袁偉豪拍拖收得好密，就連最親的妹妹張寶欣及父母都不知情。至上月被揭戀情後，參選今屆港姐奪友誼小姐的張寶欣被傳媒追問，自爆睇新聞才知道家姐與袁偉豪撻著，期待家姐帶袁偉豪回家見家長：「家姐好少主動講感情事，我睇報道八卦去問佢，我見到媽咪睇到都笑。（媽咪好滿意袁偉豪？）媽咪都好驚喜，佢對我哋揀對象唔會太嚴謹，一向都唔會干預我哋兩姊妹擇偶，有上進心嘅男仔就OK。」可見張寶兒雖然家境富裕但父母思想開放，一點都不專制。

全力呵護 望開花結果

難得再拍拖未受公司阻撓，袁偉豪全力以赴保護這段剛萌芽的感情，對於被冠以「港姐殺手」之名，袁偉豪笑指多謝大家睇得起，他說：「『港姐殺手』又好， 『大媽殺手』都好，我覺得都係緣份，自己呢個年紀都想穩定，有時感情事很難講要選擇一個咩人當自己嘅伴侶，我冇乜機會認識到外界嘅朋友，見得最多的都係同行，多番考慮之下亦覺得應該坦誠啲去面對。」佢更直言喜歡女友是個好甜和好好心地的女仔。

36歲的袁偉豪近年已坐穩一線，劇接劇又拍旅遊節目人氣高企，其形象亦由以前的花弗男變成暖男，今次遇上細11年的張寶兒，對方清純有活力，心動都好正常，若然繼續甜蜜發展下去，開花結果亦唔奇。張寶兒家族經營成衣生意，在國內設有廠房與辦公室，身為長女的她遲早要繼承父業，袁偉豪亦可以諗諗做個乘龍快婿，轉行從商都唔錯。

娶老婆會發達

真愛誠可貴，若果真愛仲要係身家豐厚嘅太子女，當然就更完美！起碼婚後不憂吃又不憂喝，打拼起事業上嚟無後顧之憂已經係最大優勢！好似以下幾男星就係好例子：

吳家樂

黎諾懿

蕭正楠

林文龍

全文完