《鐵探》蔣祖曼自爆角色隱藏秘密身份 漂染26次狂甩頭髮！

撰文：東方新地｜圖片：劇照、微博、電視截圖

蔣祖曼首演黑幫阿嫂

近日，首次於《鐵探》出場嘅蔣祖曼以一頭Sharp醒淡紫色短髮出場，單係造型都已經夠吸引觀眾眼球！Joman喺劇中首次挑戰演黑幫阿嫂一角，同時亦係谷永正（梁競徽飾） 前度女友，三人之間嘅感情線令人期待！

Joman入行至今超過十年，曾參演過大量獨立電影拍攝，而且皆獲得外界一致好評及讚賞。對於今次於《鐵》有機會飾演黑社會大佬嘅女人，Joman亦坦言自己如願以償，皆因自劇集《警界線》後，多以著制服角色出現。

漂染26次狂甩頭髮

今次Joman為咗可以更快投入角色，開拍前更特登到油尖旺實地觀察。除此，Joman為配合角色造型，不惜真髮漂染，為咗個淡紫色髮型前前後後原來足足深咗26次！

而且，Joman亦透露頭髮先係今次拍劇真正嘅最大挑戰，皆因為咗角色除漂染頭髮，仲特登曬黑自己，對於一個愛靚嘅女仔嚟講真係幾大犠牲！

不過，唔講大家可能未必留意，由於漂染頭髮始終會因洗頭而漸漸甩色，故連Joman都笑指唔知大家有冇留意到佢每次出場嘅髮色都有所不同喎！佢亦透露自己已經開始留返長啲頭髮，可惜因漂染太傷頭髮導致經常甩同斷頭髮，故留嚟留去啲頭髮都係咁短！

另一方面，Joman喺劇中不時會被黑社會大佬江正龍（楊潮凱飾）當眾掌摑及侮辱，然而原來陸蔚喬呢個角色嘅背景係比被打更可憐！皆因據Joman所講，陸蔚喬細個已經係妓女，父母亦俾人殺死，身世可憐，所以為生存先會逼不得意啞忍一切！

自爆角色隱藏秘密身份

與此同時，唔少觀眾邊追劇邊猜測Joman嘅角色並唔係咁簡單，認為佢有秘密身份。對此，Joman直言劇中身份的確唔簡單，除咗係越南軍官嘅養女之餘，亦唔係大家想像中咁軟弱！不過，佢堅拒唔會劇透，想知嘅大家惟有繼續煲落去啦～