陳小春豪宅首次公開 Jasper間房隨時大過你屋企！
撰文：東方新地｜圖片：影片截圖、Instagram、微博
陳小春豪宅首次公開
日前，內地真人騷《妻子的浪漫旅行》嘅節目組到陳小春一家三口的豪宅進行拍攝，更首度深入Jasper嘅房間，由於呢家人嘅屋企實在太大，就連春哥囝囝嘅房都隨時大過一般人家庭個廳，睇到各位觀眾眼定定！
節目中，首先就拍出春哥呢家人嘅住所，一睇之下，其大廳之大真係令人只得羨慕兩字，再加一個無敵海景，真係不禁令人講句「同人唔同命」。
雖然一般有小朋友嘅家庭屋企每個角落都會放滿玩具，但望住春哥整個大廳都睇唔到Jasper啲玩具，原來應采兒會教囝囝，大廳係大家嘅，所以唔會俾佢隨便擺放玩具！
Jasper房間首度曝光
至於Jasper啲玩具文咗喺邊？唔係雜物房，而係放哂喺Jasper自己間房，應采兒亦隨即帶大家參觀Jasper嘅房間。
偌大嘅小朋友房就係放滿Jasper心愛嘅玩具，不過最令人注意嘅係，睇間房嘅Size就知大過普通家庭嘅客廳幾多倍！
就連窗台都係放滿大大嘅玩具，不過望落Jasper間房都好整齊！
除咗玩具，房中仲貼滿咗囝囝成長經歷嘅相片，認真溫馨！
另外，房中亦有書櫃，放滿Jasper會睇嘅故事書。不過，呢啲通通都已經唔係重點，皆因齋望間房，相信唔少人都好羨慕5歲嘅Jasper。
被爆趁老婆大肚講大話
睇完Jasper間房之後，輪到佢兩公婆嘅心底話時間。期間，應采兒就大爆老公喺自己懷孕時，講大話呃佢話去開會，實情卻係出海去玩，春哥就笑住回應：「我在海中央開會呀。」呢個答案就梗係惹嚟老婆打頭一下嘅後果啦！
其後，製作組就問春哥記唔記得幾時同老婆初吻，小春就話：「忘記了」，應采兒即追問：「你什麼也不記得，你記得什麼？」其後，春哥就深情對老婆話：「我記得妳是我老婆」相信呢個答案已令應采兒甜到入心兼唔記得啱啱講大話一事嚕！
陳小春寵妻之人
最近，內地真人騷《妻子的浪漫旅行》顧名思義係以「人妻」為主題，節目組就請到大家熟識嘅陳小春同應采兒做嘉賓。節目中，一向俾人有大男人感覺嘅陳小春喺老婆面前就變成一位寵妻之人，樣樣事都對應采兒百般遷就，名副其實係個愛妻號！
細春哥16年嘅應采兒一向性格外向、爽直，而且有主見，有見及此，做老公嘅春哥一直都盡可能唔同太太有任何沖突。
春哥就喺節目到講到：「其實結完婚之後，她要幹嘛就幹嘛，因為我不想跟她起衝突，因為衝突到最後輸的就是我，那既然是這樣子都無所謂了，反正你想去哪裡你開心就好了。」幾錫老婆！
陳小春禁應采兒過份性感
話雖如此，但原來春哥都有一樣嘢係對太太有所不滿，就係唔鐘意太太著得過份性感！
喺節目中，講到妻子衣著打扮嘅時候，內地男星郭曉東就講到明規定太太唔可以著超過膝頭以上嘅服裝，對於呢點，春哥似乎好同意指：「當然不行了，早就跟她說不要穿這種褲子。不要穿短褲﹑短裙﹑比基尼重要事情說三遍。」
應采兒一向身材弗爆，就算生咗Jasper都依然keep住個索爆身型，難怪身為男人兼老公嘅春哥勁唔想老婆被睇蝕啦！
不過，太太應采兒作為女性就梗係貪靚嘅，就算上節目都依然係著住超短熱褲上陣！
唔少網友反而覺得春哥呢種方式係「霸道總裁的愛情」，即對自己老婆嘅另一種寵愛，管得嚴只因看得重！唔知大家又認唔認同呢？
重遊第一次約會地方
節目中，二人仲重遊第一次約會嘅地方，原來佢哋並唔係去一啲高級餐廳到食，反而係去咗食牛腩嘅鋪頭。
應采兒就回憶起當年嘅過程，坦言：「我們就吃了一個大概十五分鐘的牛腩就走了，這是約會。約會其實不能拼桌，因為你根本不能夠聊天，然後我就覺得這個人很小器。」
不過，好彩應采兒係個明白事理嘅人，知道陳小春只係個不懂浪漫嘅男人：「他是不知道有甚麼好吃的，他的人生裡面只有茶餐廳跟火鍋店。」
言而，喺春哥心中，應采兒就係個「又八卦﹑又八婆﹑又話癆」嘅老婆，佢仲待登寫咗封自介信介紹太太，寫道：「她是個有一點吵的人，話很多會說中文﹑英文﹑粵語，反正你們要是覺得吵就放空自己。」事後佢補多句「最漂亮」補獲，十分搞笑！
《爸爸6》發宣傳短片
大家一直非常關注《爸爸去哪兒6》中，上季陳小春兒子 Jasper 會喺新一季以咩形式回歸節目，日前終於揭開謎底，《爸爸去哪兒》嘅官方微博分享由 Jasper 和爸爸陳小春嘅預告片，換言之 Jasper今次將會敲定為固定嘉賓！
宣傳片中陳小春父子齊齊喺外太空玩耍，指出身為男孩子的他們都必有一個英雄夢。
陳小春廣東話讀白觸動網民
不過。喺囝囝Jasper面前就覺得自己係個普通人，因為真正的英雄是小朋友，春哥仲要喺宣傳短片中以廣東話講出讀白，令唔少香港粉絲指該段話有共鳴及非常感人！
陳小春講到：「你總說爸爸是個英雄，其實爸爸只是一個普通人，或者真正的英雄是世界上的小朋友，謝謝你讓我知道，能夠拯救世界的不是超能力，而是溫柔同善意，真正的勇敢不是搏殺是守護，真正的強大不是驍勇是溫柔，我願意陪你拾起所有失落的星星，撐起你明日的英雄夢。」
睇完宣傳短片後，唔少粉絲都表示非常都期待睇到軟萌嘅Jasper出現！
陳小春 被人仔打動
四歲之前一直將兒子收收埋埋，上年陳小春應采兒首度讓兒子Jasper萌樣曝光，參演內地親子真人騷《爸爸去哪兒5》，有指兩人被高達2500萬人仔酬勞打動！小小年紀的Jasper暖男形象極速俘虜大批觀眾心，成為新一代熱爆明星仔，拍攝尾聲觀眾都紛紛表示唔捨得，不過眼見兒子辛苦捱足三個月，應采兒已落閘表示拍完最後一集《爸爸5》，會讓兒子休息專心學業，點知言猶在耳，今季《爸爸6》開錄，小春又再帶著兒子Jasper加入真人騷，雖然有唔少觀眾大表驚喜，不過亦有反對聲音，不少網民留言質疑話：「唔係話過唔再做咩！」
首位藝人冧莊
一度有傳周杰倫會帶同兒子上陣參與《爸爸去哪兒6》，但最終周董冇影，一班爸爸陣容更是歷年最弱一次，湖南衞視為加強吸引力，開出天價引小春父子檔回歸助陣，更成首位藝人可以冧莊再拍。
差點暈倒
拍攝第二站，去到青藏高原東南部海拔3,753公尺的稻城拍攝，位處高海拔隨時會有高山反應，大人都未必捱得住，何況是5歲的Jasper。應采兒就在社交網晒出小春同Jasper吸氧氣照片，還留言：「爸爸去哪兒第六季第二站稻城順利結束，海拔比較高、小孩子適應力比較強！」點知引發網民激烈反應，紛紛留言鬧爆兩公婆為賺錢要兒子受苦，紛紛替Jasper的安危擔心。應采兒為平息民憤火速將照片刪除。
派父母幫手
據知情者透露：「丁丁已經叫埋父母過去幫手，不過始終天氣早晚溫差大，加上拍攝時間長，大人都未必頂得順，其實Jasper好多時都唔係咁舒服，成日要爸爸小春抱住行，唔似得上一季咁活潑！」拍一季就賺一間豪宅，酬勞的確好吸引，不過，依家先去到第二站已經咁辛苦，真怕5歲Jasper會捱壞身體，到時真係多多錢都補唔番！
氹外公外婆
Jasper性格可愛又識氹人，拍攝期間就同外公外婆扮打麻雀，逗得兩老眉開眼笑。
捱唔住扭抱
青藏高原空氣稀薄，平日活潑蹦蹦跳的Jasper亦攰到不時要小春抱住行，看來行程相當辛苦！
賭王仔都拍
今季《爸爸去哪兒6》除了有陳小春父子回歸，還有楊爍帶著兒子，包貝爾帶著兒餃子，此外仲有賭王兒子何猷君(黑衣)， 成為實習爸爸頂替范丞丞亮相節目。
留港開工
應采兒在港趕拍電影《掃毒2》未能同行照顧兒子，就安排父母同行幫手湊孫，可見她亦擔心兒子去到高原會捱不住。
上季拍到喊
小春子在《爸爸5》首曝光，贏盡民心人人讚可愛，不過，拍攝初期Jasper就試過辛苦到扭計狂喊，又經常攰到喺車度瞓著，拍攝對當時僅得4歲的Jasper來說明顯好吃力！
不過自《爸爸去哪兒5》播出後，Jasper即成為風頭躉，俘虜眾多少女心！除了他的懵呆樣子讓人感覺十分治癒，小小春在節目裡亦表現出他的可愛性格，成功吸納不同年齡層的粉絲！
話過唔再拍
拍完《爸爸5》，小春夫婦再安排兒子拍攝《爸爸5》賀年特別版，當時應采兒就在IG留言表示：「真的是最後一次。」
將來還有什麼演唱會值得留意？
有不少歌手宣布舉辦演唱會，小編為你整合了2023香港演唱會+搶飛攻略一覽，包含各演唱會優先購票日期、公開售票日期、門票價錢、座位表等，想搶飛粉絲必定要留意！
