陳展鵬

《城寨英雄》後續|陳展鵬偷戀落選港姐 胡定欣怨上錯賊船

最強精選

廣告

陳展鵬 (煎Pang) 與胡定欣拍《城寨英雄》時撻着,人前人後sweet到爆,早被認定為一對。不過早前40歲煎Pang帶住下月27歲落選港姐單文柔摸黑上山頂,被當場斷正!為免被標籤成負心漢,煎Pang急撇清關係:「我從來冇同胡定欣拍拖」,一刀插入定欣心坎。頓覺癡心錯付的定欣,自責無帶眼識人,近日收工孤伶一人,只有助手陪食,顯得落寞非常﹗女人有車有樓有事業,感情屢遇挫折,好傷﹗

煎Pang甜爆冧定欣:「你想去邊我都陪你﹗」

上星期煎Pang定欣孖住出席影視展,訪問時當眾打情罵俏,定欣指恨拍旅遊節目,記者問想去邊?定欣心心眼望住展鵬問:「你想去邊?」煎Pang甜爆回話:「你想去邊我都陪你﹗」定欣登時被電到暈陀陀,笑到花枝招展。

陳展鵬 5

煎Pang、單文柔山頂密會斷正

不過在定欣出發吉隆坡拍廣告後,煎Pang就被被斷正與16年落選港姐單文柔密會,兩人摸黑上山頂歎外賣!當記者上前影相時,煎Pang表現驚慌,左掩右遮,反而女方較為鎮定,碌大眼望向鏡頭。方寸大亂的煎Pang開車速逃,倒車時更撞向後面的採訪車。事後煎Pang聲稱定欣只是同事,二人從來冇拍過拖,同時亦打死唔肯認新女單文柔:「佢係我stylist,嗰日佢幫我揀啲衫褲登台,要好多謝佢免費幫我。(點解上山頂傾?) 幫襯開嘅餐廳冇位,又冇地方泊車所以喺車傾囉。」

陳展鵬

胡定欣愁爆食tea

定欣和煎Pang早已是外界認定的一對,但突然傳出煎Pang竟然有個女友單文柔,難怪定欣咁傷心。唔使開工的日子,好姊妹又個個忙拍劇,定欣就與助手去鯉景灣食tea,不過見到佢一臉落寞,全程冇笑容,睇嚟心情相當差。

陳展鵬

煎Pang一拖二同場

今年一月時,無綫拉隊參加公益金百萬行,出爐視帝視后煎Pang、定欣領隊參與,當時已經和單文柔拍拖的煎Pang做戲做全套,全程同定欣孖公仔,不時舉機跟定欣自拍,定欣冧爆挨實。單文柔等代表港姐出席,一男兩女來個大合照,真係一家親。

陳展鵬

之後農曆年初四,煎Pang和定欣結伴到無綫高層樂易玲屋企拜年,當時一眾港姐包括單文柔亦在場。當港姐們不時搵視后定欣集郵,惟獨單文柔一直在屋外露天花園跟其他人自拍及聊天,煎Pang安排兩女同場,兩頭瞞認真膽大包天!

陳展鵬

「胡說八道會」好姊妹力撐 胡杏兒好嬲!

可憐的定欣上錯賊船,幸好有「胡說八道會」一班好姊妹全力支持,據知杏兒睇到煎Pang單新聞後好嬲,即時撇低老公去開解定欣。當初定欣煎Pang互有好感,定欣亦體諒對方比較慢熱,工作又真係好忙,所以唔介意慢慢發展。點知煎Pang原來暗地裏媾緊個落選港姐,定欣怨自己蠢上錯賊船,杏兒見狀都戥佢唔抵,同班姊妹喺背後鬧爆賤男!

陳展鵬

圖片來源:東方新地