陸永

陸永嫌錢腥拒做星爸 高人批兩女入行必紅

最新娛聞

廣告

一出道就拍住麥玲玲唱〈風生水起〉、太太不幸流產就搵嚟吳佩孚作法超渡,陸永近年入埋屋真正撈得風生水起,亦都更加篤信風水命理。據知情人士透露,一過完年陸永請奇門遁甲傳人雲文子上門睇風水,大師更批陸永一對女兒Hannah和Sim Sim有天份又有觀眾緣、入行做童星紅硬,女兒奴陸永大有機會印印腳等一對寶貝女養,不過佢竟然耍手擰頭拒做星爸!

撰文:東方新地|圖片:新傳媒圖片庫、陸永IG

陸永兩囡囡 廣告活動爭崩頭

6年前閃婚做老竇,農夫成員陸永從此修心養性擔起頭家,其實老婆同兩個女腳頭都好,婚後農夫事業亦都愈來愈順風順水,近年入埋TVB拍劇主持節目,成為Do姐鄭裕玲shopping鐵腳,節目年年添食成為電視台收視保證。據悉陸永除了有才華、轉數快又肯捱肯做外,亦篤信風水命理連自己都學埋一份。

日前陸永再請好友兼奇門遁甲傳人雲文子上門睇風水,雲文子除了指點風水擺位助陸永事業更上一層樓外,亦贈言其一對女兒有表演天份、觀眾緣極佳,極適合從事藝術及幕前工作,甚至命中注定少年得志,早入行大有機會成為當紅童星。其實兩個囡囡Hannah同Sim Sim一個有表演慾、另一個就信心爆棚,陸永嫂Rainah平時分享女兒唱歌跳舞鬼馬日常,不但吸引大班粉絲關注讚爆,亦早有廣告商及品牌活動叩門邀請演出和出席,亦有監製睇中邀拍劇拍電影。

好友爆料:「陸永幫兩個女推過好多job,我哋成日笑佢嫌錢腥,佢就話寧願自己辛苦啲,唔想兩個女咁早體驗做嘢辛苦。」事實上陸永亦曾在訪問中透露,平時與兩個女兒爭取相處時間,多數都愛玩角色扮演。有運行、有天份、再有專業爸爸平時操練,捧紅兩個寶貝、印印腳做星爸不是夢,不過講到讓女兒入行,陸永就表態投反對票!

陸永:最怕佢哋太有表演慾!

就雲文子批一對寶貝女有機會大紅大紫成童星,陸永日前接受本刊電話訪問時就表示堅決反對女兒入行。

記者:過完年請咗雲文子上門睇風水?

陸永:冇錯!我係鍾意研究呢啲嘢,又真係想乜都試吓,雲文子係我朋友,佢又係奇門遁甲唔同其他,所以請佢上嚟講吓啲風水布陣。

記者:係唔係好信風水命理?

陸永:係信,亦都鍾意研究,不過呢啲嘢唔係絕對同你消災幫你發達,係可以畀你有個預防,程度上可以提升或者減弱咁解。

記者:有冇聽過師傅講兩個女做童星會大紅?

陸永:小朋友紅又點啫?畀你紅到十二歲好未?跟住落去又點呢?況且少年得志都唔係咩好事,我寧願佢哋好好享受童年,唔好毀壞人生。

記者:兩個女係唔係好有表演慾?

陸永:佢哋係好有表演慾,我就係怕佢哋太有表演慾至真。不過有表演慾唔代表真係叻到可以出嚟表演!嗱,陳禛嗰啲就真係叻喇、真係要唱到去紅館喇,但我兩個女唔係吖嘛!

記者:支唔支持佢哋入行?

陸永:佢哋大個以後仲鍾意表演、有志入行我絕對支持,不過呢個年紀肯定唔會係我帶佢哋入行,尤其係因為我做呢行㖭!生得幾得意幾趣致都好,做嘢就係做嘢,你估下下都可以享受工作咩?成村人等你收工,成日畀人問候老母㗎!

記者:係唔係好多廣告商同活動邀請兩個女出場?

陸永:唔可以話冇,但我盡量都唔會畀佢哋去,入行需要技術㗎!除非睇吓咩身份出場、係唔係同我一齊開工啦!

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!