蔡少芬

體感40度 蔡少芬 張晉 爆汗陪女

最新娛聞

廣告

暑假流流,小朋友開心,父母就最勞碌,日夜安排節目放電,識玩一定要去入主題樂園玩足成日!對老鼠樂園嘅鍾愛程度,相信蔡少芬、張晉同兩個囡囡湯圓 (張楚兒) 同包子 (張信兒) 喺娛樂圈都算係名列前茅,一個暑假去足三次!咁又係,上次入園係三母女化行妝拍內地真人騷《不可思議的媽媽》,雖然有人仔落袋,不過四面環繞都被鏡頭包圍、舉手投足都要攝入鏡頭及製造節目效果,點同一家四口素顏輕裝毫無顧忌玩一日咁輕鬆又盡興?

撰文:東方新地|圖片:新傳媒圖片庫、蔡少芬FB蔡少芬微博張晉微博

蔡少芬 投入過囡囡

港星帶埋仔女北上拍真人騷全家出動賺人仔既是潮流亦是現實大勢所趨。今年本港代表除咗冧莊《爸爸去哪兒6》的小春父子、《想想辦法吧!爸爸》的朱茵母女、仲有接棒Yumiko母女參演新一輯《不可思議的媽媽》的蔡少芬三母女。

上月中,節目就帶埋四個媽媽同兒女去主題樂園拍足成日;相隔唔夠一星期,蔡少芬又一家四口入住樂園酒店做咗一晚公主,不過玩極都未夠,為滿足兩個女,日前兩公婆又帶埋囡囡、約埋朋友,一行大大小小約十人殺入樂園再玩過。

入園已經N次,天時暑熱仲適逢暑假都要入去再逼過,呢啲咪真正忠粉囉!不過身為藝人兼常客都有好處,蔡少芬一行人去到樂園門口已經有樂園專人帶領,經特別入口入場,所有遊戲設施亦一概可以經特快通道即刻玩,彈弓狗、玩具兵團跳降傘、小小世界、小飛象同鐵甲奇俠飛行之旅,只要適合7歲楚兒同5歲信兒的遊戲設施一概玩齊。雖然唔使排長龍啫,始終係盛夏、三十多度高溫,體感閒閒地超過四十度。所以楚兒、信兒心口吊住風扇仔、一行人個個都行到身水身汗,不停見到蔡少芬要親自排隊買水、買雪糕同小食補充水份。結果最後兩粒鐘,爸爸張晉都頂唔順先行一步上車攤抖吓,拍戲捱得又打得嘅張晉都話:「湊女仲辛苦過拍戲!」真係可憐天下父母心。

自己玩 VS 開工玩

做真人騷同一家四口自己玩當然唔同玩法,唔使就住鏡頭,蔡少芬睇巡遊時忘我開心大笑、又負責揸機影細路。

其實上月頭《不可思議的媽媽》四個媽媽拉大隊入樂園拍攝及分頭完成任務,三母女參與巡遊時蔡少芬化行妝交足戲。

爸爸投降

一年去N次難得興致依然高昂,蔡少芬同兩個女及同行友人由上午玩到傍晚六點至捨得走,爸爸張晉就早兩個鐘投降上車休息等出車。

狂補水

蔡少芬睇實兩個女之餘,亦好照顧同行友人一家,次次都係佢負責買嘢飲買小食幫大家補充水份同體力。

輪住攝

張晉陪玩時蔡少芬負責攝影、相反蔡少芬陪玩時又輪到張晉揸機,完美演繹分工合作的重要性。

楚兒同信兒著住同款藍色上衣由爸爸帶住一齊入場玩小小世界,拍戲幾忙幾博都好,識得抽空陪女絕對係好爸爸。

玩完鐵甲奇俠飛行之旅歎完冷氣又再暴曬於烈日下,兩公婆帶埋帽同黑超,一樣熱到皺晒眉。

媽媽陪玩降落傘後、爸爸再頂上陪玩彈弓狗,為咗幫兩個女放電,兩公婆輪流上陣保持體力都係權宜之計。

玩到太陽落山,臨走最後一站係小飛象飛船,睇得出蔡少芬塊面曬到紅、人亦開始露倦容笑唔出。

蔡少芬三母女 真人騷晒溫情

繼第一季嘅內地真人騷《不可思議的媽媽》彈起咗Yumiko個得意囡囡梁浸浸之後,新一季又到喇,今次港媽代表係蔡少芬,由佢帶住7歲嘅大女楚兒同5歲細女信兒接受不同挑戰!蔡少芬 (Ada) 平時落手落腳湊女,相信上真人騷都難佢唔到,應該唔會好似Yumiko對梁浸浸咁冇晒符。Ada仲每集都悉心為兩個囡囡打扮姊妹裝,由髮型到衣著都襯埋一樣。

其實Ada唔使上真人騷,都證明佢絕對係一位不可思議的媽媽,日前細女幼稚園畢業,Ada幫囡囡打扮成公主一樣,著住天鵝裙加皇冠,一定成為全場焦點!

Ada仲親手整咗啲小食返學校,順道慶祝父親節,一整就幾十人份量,由以前嘅地獄廚神,因為兩個女變成今日嘅廚神,仲唔係不可思議?

Ada因為喺《甄環傳》做皇后娘娘喺內地人氣高企,能夠請到佢已經唔係易仲要湊住兩個女,相信有關方面用足誠意同金錢!

蔡少芬兩個囡囡首次喺電視上曝光,睇吓佢哋今次要接受乜嘢挑戰?

Ada為兩個囡囡悉心打扮,不但衣著到一式一樣,連辮子髮型都係姊妹裝!

Ada和張晉的5歲細女張信兒近日幼稚園畢業,兩公婆齊齊送信兒去幼兒園,更特別為女兒打扮成公主返學,真係有心思!前一晚,Ada仲趁囡囡瞓咗覺,就趕工親製翌日學校party嘅食物!

唔止係廿四孝媽媽,之前Ada為咗細女學校的七十年代主題,仲為囡囡特製衣著,好似變魔術一樣,話變就變,果真係不可思議的媽媽!

早前為細女楚兒慶祝5歲生日,為囡囡化身仙子,當然又係出自Ada之手啦!

為配合主題,兩公婆仲喺囡囡生日會上,大扮獨角獸,認真有童真!

張晉44歲生日

早前,張晉44歲生日,過生日除咗有老婆蔡少芬陪伴之外,仲有一班好友一齊出席生日飯局,當日壽星仔上載咗一張大合照,大家笑得幾開心。

蔡少芬肉緊錫錫

蔡少芬趁住520嘅日子,喺個人社交網上載兩張相,並留言:「昨天是你的生日,親愛的@张晋max能陪著你過生日,真的太棒了!感恩。。。!愛要大喊出來!520。。。。。。。。 ​​​​」認真甜蜜!

蔡少芬 張晉 結婚十周年

08年,Ada同張晉結束愛情長跑,更生下兩位女兒張楚兒﹑張信兒,1月12日係佢哋結婚十周年,佢哋為咗紀念呢個大日子,佢哋著番當年嘅婚紗同禮服同兩個囡囡影全家福,二人更留言道:「十年前的今天,我娶了你,這十年裡有風、有雨、有彩虹,還有俩搗亂的。十年前的婚纱和禮服,今天還能穿,讓我們保持身材,繼續風雨同路,看看下一個十年還能不能穿。」

十年後,著番十年前嘅婚紗同禮服,Ada更加好似食咗防腐劑咁,冇乜走樣,真係注顏有術!Ada更公開答謝老公嘅愛:「感謝天父,時間過得太急速了!十年有喜有憂有趣有怒一切一切都是滿滿的愛!如沒有主的恩典,這個家不可能如此繽紛!往後每一日,我們也會繼續堅愛,也謝謝極品張晉max,愛你啊!」so sweet!

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!