黃子華

黃子華含淚感激當年劉青雲仗義相助 大讚兄弟「有大俠風範」

最新娛聞

廣告

黃子華是次棟篤笑《金盆𠺘口》嘅尾聲時段,都會同大家分享吓被貴人幫助嘅故事,趁機會公開多謝呢啲朋友!繼後台重遇同曾甘共苦嘅好兄弟林祖輝激動爆喊後,重感情嘅子華神喺22號晚又再次淚灑紅館,今次就係回想起當年出道無耐,影帝劉青雲一次義氣相助,子華更一度哽咽至講唔落去!

撰文:東方新地 | 圖片:電影截圖、新傳媒資料庫、《旋風腿》截圖

當年黃子華初出道 青雲貼心義氣相助

事緣早年黃子華嘅棟篤笑騷都仲未係好賺到錢嗰陣,某次表演完,雖然未到尾場,但子華有啲朋友睇完演出就興高采烈咁叫子華去慶功,子華雖然心想平時都係尾場先慶功,不過朋友叫到人多開心嘛,就話好啦!

於是子華與當時包括劉青雲等一行20幾人去食飯慶功,其實入面就得三、四個人係識嘅,但仲要食高級日本料理喎!子華話嗰陣一場棟篤笑唔係賺到好多錢,仲笑言:「都唔知啲日本人點解咁勁,發明樣樣嘢食都係咁貴嘅。」

子華激讚青雲「有大俠風範」

不過主人家子華無奈都要埋單㗎啦,話晒廿幾個人,都幾甘㗎嘛!正當佢諗住找數嘅時候,個收銀員竟然同佢話「啊邊個」幫你俾咗喇。子華講到呢度已經開始哽咽都講唔到落去,飲咗啖水,先笑番咁自嘲話,大家睇下佢個人幾睇重錢喎!

「啊邊個」其實係劉青雲!青雲嗰時同子華講:「我知道呢度好多人同你唔熟,我幫你搞掂喇!」子華忍唔住個感動樣,諗番都話一個人好哋哋點解會幫人埋單呢,但子華話最觸動到佢嘅唔係因為劉青雲俾錢,「而係因為佢(青雲)知道呢餐飯對呢個人(子華)嚟講係一個數目。」

最後,子華仲讚多句話青雲「有大俠風範,好嘢!」,全場拍手,掌聲雷動!劉青雲真係好型啊!

拍戲結緣 識於微時

其實黃子華與劉青雲早年已因拍電影合作而認識, 青雲有份主演喺1993年嘅由子華編劇嘅電影《人生得意衰盡歡》,電影票房慘不忍睹,但二人就結為好友,日後都有再合演其他電影,包括《終生大事》、《播種情人》、《呆佬拜壽》等。

「做人公關做得唔好… 」

劉青雲同郭藹明結婚嗰陣,黃子華仲做埋佢兄弟添!而黃子華每次嘅棟篤笑,劉青雲都會到場支持。喺2013年嘅棟篤笑《洗燥》入面嘅短片《旋風腿》,更邀得劉青雲客串,片中青雲一句對白更成為網絡經典:「做人公關做得唔好,食屎㗎啦。」

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!