戴耀明

戴耀明360秒人生課堂|譚俊彥暖心導賞古裝街 母子同場媽媽表現逗全場爆笑

最新娛聞

廣告

無綫綠葉王戴耀明在《360秒人生課堂》分享入行三十年辛酸,之前一直透露有個遺憾「未帶過阿媽參觀電視城」,原來節目組一早準備好驚喜,由神秘嘉賓帶小明阿媽參觀電視城的古裝街,節目壓軸更邀請母子同台,令觀眾意外發現83歲的戴媽媽幽默風趣不比兒子輸蝕!

360秒人生課堂| 譚俊彥暖心導賞、為戴耀明母子完夢

《360秒人生課堂》戴耀明演繹自己的人生高低起跌,但背後原來藏有一個又一個的感人故事﹗當中提及其83歲母親如何愛錫自己,但遺撼在無綫工作近卅年,一直因為怕麻煩而未有帶阿媽參觀自己工作的地方;於是節目組為他安排了一個驚喜,找來戴耀明的好友譚俊彥帶戴媽媽參觀電視城的古裝街:

360秒人生課堂 譚俊彥暖心導賞,帶戴耀明母親參觀古裝街,戴耀明即場示範驚喜反應。
譚俊彥暖心導賞,帶戴耀明母親參觀古裝街,戴耀明即場示範驚喜反應。(圖片來源:tvb.com)
戴耀明 360秒人生課堂 有視帝譚俊彥幫手影相,戴媽媽笑容滿臉,被問到兒子有何期望,她坦言希望可以看到兒子得獎。
有視帝譚俊彥幫手影相,戴媽媽笑容滿臉,被問到兒子有何期望,她坦言希望可以看到兒子得獎。(圖片來源:tvb.com)

暖心安排觀眾感驚喜:爭少少見到佘詩曼

由視帝進行導賞固然令人意外又驚喜,原來譚俊彥與戴耀明之所以「兄弟相稱」,是因為二人在譚初入無綫拍攝《天命》時早有交情,譚俊彥仲講到對劇本有不明白之處,都會向資深的戴耀明請教,聽得戴媽媽好開心又恩慰。觀眾對這個驚喜安排亦感到意外,但有網民就表示如果可以由「三好」佘詩曼負責導賞,可能畫面就更感人,因為早年戴耀明曾公開表示發誓娶佘詩曼為妻,痴戀的形像深入民心:

戴耀明 360秒人生課堂 佘詩曼 佘詩曼日前接受無綫娛樂新聞台訪問。
恰好早前佘詩曼接受無綫娛樂新聞台訪問,地點也是古裝街,二人緣慳一臉。(圖片來源:無綫娛樂新聞台)

相關文章:360秒人生課堂|戴耀明當年誓娶佘詩曼為妻 母親催婚望奉子成婚

360秒人生課堂 譚俊彥曾在專訪中說過,戴耀明是他在TVB「第一個朋友」,絕對不止同事咁簡單,2016年拍《天命》期間戴耀明在譚俊彥身邊做太監,二人收工時都順路一齊返屋企,譚媽媽都認得當今視帝曾經駕車載兒子收工回家,印象深刻。
譚俊彥曾在專訪中說過,戴耀明是他在TVB「第一個朋友」,絕對不止同事咁簡單,2016年拍《天命》期間戴耀明在譚俊彥身邊做太監,二人收工時都順路一齊返屋企,譚媽媽都認得當今視帝曾經駕車載兒子收工回家,印象深刻。(圖片來源:tvb.com)

戴耀明即場示範驚喜反應

有譚俊彥做嘉賓,認真面子十足,原來二人一早就在後台收看戴耀明的演講,說到動人之處戴媽媽都感動流淚,播放完參觀片段之後,「導賞員」譚俊彥將戴媽媽帶到小明身邊,母子團聚任務完成,戴耀明亦公開感謝好兄弟的送暖行動,場面感人!

360秒人生課堂 譚俊彥坦言視戴耀明為真心朋友,初入TVB乜都唔識,連TVB食飯地方,全靠戴耀明主動帶他食飯、又介紹監製,友誼深厚。
譚俊彥坦言視戴耀明為真心朋友,初入TVB乜都唔識,連TVB食飯地方,全靠戴耀明主動帶他食飯、又介紹監製,友誼深厚。(圖片來源:tvb.com)
戴耀明 360秒人生課堂
(圖片來源:tvb.com)

戴媽媽風趣帶動全場氣氛

其後戴媽媽接受訪問,被問到是否兒子所有演出都有觀看,她坦言唔係全部,尤其是演歹角的時候「做衰仔嗰陣、唔係好想睇」引發全場爆笑,戴媽媽表示見到阿仔做打劫阿婆、綁匪角色雖然唔想睇,但「扮衰嘢又真係好神似、好嘢就好笑」,更公開呼籲希望TVB可以安排正面角色給戴耀明,建議監製可以分派多點有拍拖、結婚戲份,嚇得小明以為阿媽有投訴。

被問到是否希望兒子攞獎、攞視帝,戴媽媽開心回應「唔好咁強求」、「唔求佢做電影皇帝,佢咁醜樣」,總之是但一個獎都可以「女配角、女主角都無問題,最緊要做好本份」,兩母子在台上互相倜侃,場面既爆笑又溫馨:

戴耀明 360秒人生課堂 戴媽媽精神奕奕,與阿bob對答風趣,幽默程度不輸兒子。
戴媽媽精神奕奕,與阿Bob對答風趣,幽默程度不輸兒子。(圖片來源:tvb.com)

《360秒人生課堂》|戴耀明為盡孝道放棄北上發展

戴耀明在《360秒人生課堂》提及與母親的關係,入行多年除了未曾帶過媽媽入電視城,更為照顧家中八十多歲的母親放棄不少北上發展機會,由於是家中獨子,父親十多年前逝世,所以獨力負起照顧母親的責任。

《360秒人生課堂》|戴耀明
戴耀明在《360秒人生課堂》提及與年邁母親的關係。(圖片來源:360秒人生課堂@TVB)

相關文章:戴耀明誓要抹走茄哩啡之名 被母催婚背後藏感人故事

戴耀明19歲投身娛樂圈:一定要有副業

想當年,戴耀明19歲就投身娛樂圈,一做就做咗十幾年。「讀書已經好鍾意做話劇,希望大個後可以投身呢行。其實入行經過都幾戇居,有日,我阿媽睇電視嗰時見到亞視請演員,咁啱當時畢業,未搵到嘢做咪試下,咁就入咗行。後來喺亞視做咗1年,發現冇咩人睇,覺得無綫好似好啲,就去無綫考訓練班囉!」加入TVB後,戴耀明先至發現TVB新人輩出,比起亞視更難「有人睇到」。

「當時過嚟TVB冇諗過呢點,不過既然選擇咗,可能係命中註定嘅呢!我唔知道乜嘢叫做運氣,但可能係我唔夠進取。我比較被動,人際關係比較輸蝕。」身為獨生子,即使對星途樂天知命,但要對家人有所承擔。

360秒人生課堂 戴耀明 93年投考無綫電視第6期藝員進修班,同學包括蔡子健、伍文生和傅明憲等。
93年投考無綫電視第6期藝員進修班,同學包括蔡子健、伍文生和傅明憲等。(圖片來源:無綫電視截圖)
360秒人生課堂 戴耀明 在無綫工作廿八年,非常襟撈,今年新劇《新四十二章》亦有他的身影。
在無綫工作廿八年,非常襟撈,今年新劇《新四十二章》亦有他的身影。(圖片來源:tvb.com)

家人支持 戴耀明甘心留喺TVB

「其實屋企人好支持我做呢行,又冇嫌棄我喺娛樂圈唔湯唔水,搵唔到大錢。其實人一世物一世,做到自己鍾意嘅嘢,又唔係搵唔到食,OK啦!做演員都有萬零2萬蚊底薪,加埋爆show分佣,收入都算穩定。

「試過有年爆show搵多咗十幾萬,但都有試過唔爆show冇乜錢,唯有少啲出街囉!坦白講,我呢個年紀已經好難喺出面搵份工。反而keep住做呢行,幫到我搞啲小生意,因為啲人認得我,傾起生意上嚟都易啲。做呢行一定要有副業,以前都有搞過酒吧同埋運輸。除非TVB炒我,如果唔係我都唔會放棄。」甘心留喺TVB做綠葉,只可以話佢真係好鍾意呢份工!

360秒人生課堂 戴耀明 於網友認為其光頭形象酷似日本動漫《一拳超人》主角埼玉,故令他獲得 PlayStation 及 FHProductionHK 邀請,以一拳超人造型擔任電視與手機遊戲代言人。
網友認為其光頭形象酷似日本動漫《一拳超人》主角埼玉,故令他獲得 PlayStation 及 FHProductionHK 邀請,以一拳超人造型擔任電視與手機遊戲代言人。(圖片來源:戴耀明@facebook)

戴耀明:我係戇居

「可能係我個樣生得戇居居,所以普通一句對白,由我個口講出嚟,就變得好騎呢。其實我都覺得自己演喜劇係容易啲被接受,扮市井我冇問題,如果要我演醫生、律師,似乎冇咩說服力。」

360秒人生課堂 《潛行狙擊》入面嘅磨碌,戲分唔算多,但係就因為個髮型似阿Bert而被網民惡搞。連戴耀明都受寵若驚咁話:「點解佢哋會惡搞配角?」網民嘅喜好咁易被你估到咩!
《潛行狙擊》入面嘅磨碌,戲分唔算多,但係就因為個髮型似阿Bert而被網民惡搞。連戴耀明都受寵若驚咁話:「點解佢哋會惡搞配角?」網民嘅喜好咁易被你估到咩!(圖片來源:新傳媒資料室)

對住陳法拉好易投入

戴耀明被網民惡搞嘅起源,嚟自《巾幗梟雄之義海豪情》,佢飾演日軍向山少佐,同陳法拉重有幕床戲,呢場戲影像化咗唔少巴打嘅final fantasy,亦令佢做咗毒男嘅代表。「晴晴(陳法拉)獻身畀我嗰場戲,其實我冇掂過佢㗎!但係法拉真係好專業,雖然大家冇同時入鏡,但係拍我嘅戲分嗰時,法拉都照樣做番成場戲畀我,照樣除衫,帶我入戲。」

記者問:「咁當時你個腦諗緊咩呀?」佢答:「全程投入㗎喇!對住法拉好容易投入㗎嘛!」真係聞者葡萄,見者噴血。不過《巾》劇監製李添勝當年曾經公開點名讚賞戴耀明。

「聽到我好感動,佢係我伯樂,關照咗我十幾年。有時我出show唔夠數,添哥都會救我,佢可以講得上係我嘅再生父母。」當年黎耀祥都係多得李添勝關照,憑住《巾幗梟雄》一鋪翻身,但戴耀明就唔敢將自己同黎耀祥相提並論。

「我想像唔到自己可以擔起1套劇。唔係對自己冇信心,但做咗十幾年,大概都知道乜嘢人可以帶得起成套劇。我自問只可以喺主角側跟錦上添花,只要觀眾留意到我,我已經好滿足。初入行嗰幾年,都會對人氣有憧憬,依家做咗十幾年,都睇化喇!」你咁講法即係話黎耀祥唔靚仔啫!

360秒人生課堂 戴耀明
(圖片來源:新傳媒資料室)

戴耀明做秋生短命都制

入行廿幾年,好多人叫唔出佢嘅真名外,甚至連片尾字幕都打錯佢個姓做叫「載」耀明。

「依家行出街都有人會叫我大茄㗎!初初未習慣都會有啲唔開心,但做咗十幾年,情緒上冇咩事喇!我只會覺得呢啲人冇禮貌。反而最慘嘅係當年喺訓練班出嚟,試過要扮牛頭馬面,笠住個面具拍古裝,角色完全見唔到個樣。又試過坐喺藝員休息室,保安以為我係臨時演員,仲諗住趕我走。最辛酸嘅係,我哋做配角會同時間騎住幾套劇,最多試過兩個月騎4套劇。凌晨4點拍完一組戲,另外一套劇又開晨早6點。多劇拍雖然係辛苦,不過一定會爆show,一睇銀行簿仔就開心番。」但係佢並唔係為咗爆show就咩角色都肯演。

「如果要我除褲露屎忽、打格仔露J嗰啲,我一定唔會接,就算露完可以上封面我都唔制。但係如果係梁家輝嘅《情人》,嗰啲又唔同。人一定會計數,有等價交換。我年紀唔細,如果畀5千蚊我拍兩組鹹戲,就梗係唔制啦!除非真係冇飯開㗎啫!我最大嘅宏願係做到黃秋生,佢每個角色都好搶。做到佢咁樣,我真係短幾年命都制。」黃秋生已經係影帝級,戴耀明要學佢,首先要掃番幾個獎先。不過佢似乎對《萬千星輝頒獎典禮》有啲意見。

「『飛躍進步』獎其實都係頒畀主角級嗰啲,最好有個『綠葉』獎!」講完呢句,佢就哈哈大笑。相信,佢都知道呢個建議係妙想天開。

後記:而我不知戴耀明是誰?

入行近卅年,拍過嘅劇絕對比好多1線小生重要多,戴耀明亦不止一次接受採訪,其中一個訪問在多年前進行,記者帶咗戴耀明落旺角影相。影影下,人群開始聚集起嚟,後來重有自遊行主動要求逐一同佢合照。戴耀明忽然變成旅遊景點,可惜喺班自遊行入面,冇人講得出戴耀明個名。對於一個演員嚟講,冇知名度會唔會係最大嘅遺憾呢?

360秒人生課堂 當年的訪問花絮,戴耀明忽然變成旅遊景點,可惜喺班自遊行入面,冇人講得出戴耀明個名。對於1個演員嚟講,冇知名度會唔會係最大嘅遺憾呢?
當年的訪問花絮,戴耀明忽然變成旅遊景點,可惜喺班自遊行入面,冇人講得出戴耀明個名。對於一個演員嚟講,冇知名度會唔會係最大嘅遺憾呢?(圖片來源:新傳媒資料室)
360秒人生課堂 戴耀明 大茄有樣好,冇包袱做咩都得,就算被網民做萬能key都有一百樣可能發生。
大茄有樣好,冇包袱做咩都得,就算被網民做萬能key都有一百樣可能發生。(圖片來源:新傳媒資料室)

譚俊彥與戴耀明是怎樣相識?

譚俊彥坦言視戴耀明為好兄弟,而當初加入TVB人生路不熟全靠對方⋯⋯詳情請看

戴耀明媽媽有什麼盼望?

戴耀明媽媽對是次參觀電視城的安排感到貼心,亦坦言希望兒子能得償所願⋯⋯詳情請看

圖片來源:360秒人生課堂@TVB, 新傳媒資料室