網民呻睇唔明茶餐廳手寫餐牌 揭潦草字跡有原因！

撰文：東方新地｜圖片：網上討論區

網民呻睇唔明茶餐廳手寫餐牌

最近，有巴打喺討論區以「其實有無人睇得明個餐牌叫飯」為題發貼文，指自己留意咗間餐廳個餐牌好耐，仲特登影咗手寫餐牌上載到討論區同網民一齊玩競猜遊戲！

睇啲字，的確唔俾啲腦力都可能理解唔到係啲咩字…相信唔少食客都要睇一睇、諗一諗！

有網友就耐心同大家拆解每個餐係寫梗啲咩。

有網友就笑稱負責寫餐牌嘅伙記係咪好憎個老細！

揭潦草字跡有原因

雖然唔少人都可能第一眼望個餐牌都未必會睇得明啲字，不過事後該茶餐廳負責人就表示寫餐牌嘅係一位已退休、正領取生果金的熟客伯伯，由於伯伯以前曾做過食肆樓面，故安排佢負責寫餐牌「過吓細藝」，因手震而寫得比較潦草。

延伸閱讀：

教你5個鮮為人知茶餐廳術語！

1. 「攬住夏惠姨」

攬住夏惠姨咁過癮？原來「攬住」即係蛋治，好明顯係因為兩者讀音相近，連聲調都完全一樣，都幾易明啦！

夏惠姨等於西多士？

不過點解「夏惠姨」等於西多士啊？夏惠姨關西多士咩事啊？平時食西多士用緊要就係淋糖膠或者糖漿，不時喺《學是學非》亮相的搞鬼中文阿Sir就解釋，因為夏惠姨曾經同已故藝人林蛟叔有段情，所以「淋膠」（林蛟同音）代表西多士，就等於夏惠姨啦。

2. 「肥妹咪嘔住」

呢個又點解啊？「肥妹」原來即係朱古力，原因係飲得多朱古力就實會變「肥妹」。

「咪嘔住」即係腿牛治，原因係牛治嘅諧音係「嘔住」，哦⋯⋯ 真係學到嘢啦！

3. 數字之謎

另外，茶餐廳講效率，所以伙記落單都要快，所以茶餐廳術語中仲有一大堆數字。究竟「29」、「206」、「306」又係點解呢？

「2」咁簡單相信大家都一定知係熱啦，「9」嘅英文係Nine，咁29即係熱奶啦，206即係熱檸樂，而306即係檸檬可樂加薑。

4.「敗家仔」

茶餐廳術語好多時都係同時代掛鉤，「敗家仔」呢個隱世術語你又估唔估到係咩呢？畀5秒時間你諗！

好，開估，敗家仔即係阿華田，原因係以前嗰個年代，要有田有地先有資本敗家，所以華田嘅暗號就係敗家仔！

5.「制水」

最後一個「制水」你又估唔估到係咩呢？！原來因為以前香港成日制水，所以當年將其中一道菜改名做「制水」。

呢個打大佬術語「制水」諗唔到啦呱！答案係 乾炒牛河，因為係乾炒，唔使用水都煮到！

學咗以上幾個茶餐廳術語，下次去茶餐廳就可以講暗號啦！