原島大地

22歲原島大地宣佈結婚!估吓佢拍過幾次拖?

藝人專訪

廣告

曾出演《忘不了》、22歲的中日混血童星原島大地昨日(5月24日)凌晨在微博公布將展開人生新一頁,將同年的日本女友結婚。消息一出即得到不少網友祝賀、亦有不少網友搵出兩年前佢宣傳電影《某日某月》的訪問,原來青靚白淨的原島大地雖然係香港、廣州、日本、澳洲四個地方居住過,反而戀愛史就唔多!

撰文:東方新地|圖片:新傳媒圖片庫、原島大地微博

原島大地22歲日本女友曝光

身在東京的大地,未因疫情影響好心情,在5月24日微博上公布和22歲女友結婚:「我結婚啦👩‍❤️‍👨老婆是22歲的日本女孩HaRuNa(晴奈)謝謝大家一路以來的関心🙇🏻‍♂️愿大家平安健康! ​​​​」,並公佈女友肖像。有香港網友則指女友樣貌似香港女星林穎彤。

原島大地

原島大地
在彩虹橋前和女友晴奈合照的大地。

原島大地 戲如人生:再次戀愛

昔日《忘不了》童星原島大地15年後重返香港影壇,在電影《某日某月》第一次擔大旗、第一次有感情線、第一次在大銀幕裡和湯怡談一場遙距戀愛,說到愛情,原島大地面紅紅,說做人希望低調一點,不過還是不小心透露了透露廿歲仔之前只拍過一次拖:「唔係香港女仔,都唔係澳洲鬼妹,係日本人,puppy love,簡簡單單好pure,不過已經分咗手囉!」

原島大地
上學和拍戲以外,原島最喜歡打籃球,也是學校籃球隊中堅份子:「所以我返日本就唔想接job,最享受做個普通學生,做自己鍾意嘅嘢!」

靚仔又會打籃球,煲日劇煲得多,以為原島大地返學日常一定係打波有女高中生打氣團、平日不停收告白信、情人節打開locker肯定係被表白朱古力塞爆⋯⋯其實不然。

原島大地
17年原島高中畢業,話雖最感慨要和高中同學各散東西,實情約埋最好朋友齊齊升上大學主修埋同一科國際關係。

「咁多年,收過一次朱古力咁大把,仲要係全班男仔人人有份嗰隻⋯⋯告白信都收過一次,不過諗過考慮過,大家性格唔啱,都係拒絕咗佢。好多人睇日劇同漫畫睇得多,以為球場邊有好多愛情故事、球員成日同球隊manager係一對,我喺學校籃球隊、個manager都真係女仔,不過佢好專業喎。同埋練波次次放學都係匿埋喺體育館,根本就冇女學生做觀眾⋯⋯哈哈!」

原島大地

原島大地
自爆廿歲仔僅僅拍過一次拖,又謙虛話好少收女仔情信和情人節朱古力,原島微博私相簿卻不少被女同學包圍相,擺明受異性歡迎。

原島大地續說:「所以我話我鍾意拍戲,今次拍《某日某月》真係好次拍咗第二次拖,不過呢次唔係好似上次咁單純,知道兩個人鍾意都未必可以喺埋一齊,原來現實會將兩個人拉遠、原來身邊會有人反對、原來就算再鍾意但係又不得不離開個感覺係咁,個心真係可以好痛!細個拍戲我根本唔知咩係演戲,去到片場就係玩、對白都係媽咪幫我背、教我唸,今次係我第一次喺戲中有感情線,第一次自己學識投入角色,去理解如果同鍾意嘅人分開感覺係點,感覺唔似係拍咗場戲,而係過咗一段人生、多咗一次心痛經歷。」

原島大地
新作《某日某月》將於月底上畫,和年紀相差十歲的湯怡演一對:「佢真係好友善、好可愛,基本上次次對住佢都會搞到笑場,同佢拍戲真係好開心!」

最愛日本運動女孩

港女、鬼妹定日本妹,在澳洲、香港、廣州還有日本都生活過的原島大地則說,因為同聲同氣,還是最喜歡日本女孩:「我唔使佢好靚,最好係似我一樣好平凡、又好平淡,頭髮唔好太長又唔好太短、性格唔好太外向又唔好太內向,仲有一樣好緊要,做運動一定會加分。」

原島大地
15年前的《忘不了》捧到張柏芝做影后,亦令原島大地成為當年最炙手可熱童星,不過令人心都赤的一場保良局外喊戲,原島自爆係被媽媽搣到喊。
原島大地
乖巧如原島大地,自言也曾經反叛過、曳過、試過激親媽咪:「細個喺片場囉,當正係遊樂場一樣,周圍走周圍擒,搞到媽咪成日要周圍捉我返去,片場啲工作人員就一個二個怕咗我,怕我跌親!」咁就係最曳最反叛?!咁好嘅仔去邊度搵?

雖然成家立室言之尚早,不過聽原島說偶像是家庭事業都成功的劉德華、還有錫兩個女錫到燶的NBA球星Stephen Curry,就知道有朝一日,暖男原島一定也是個好老公、好爸爸!

原島大地