林子善

感激伯樂周星馳、黃子華、王晶⋯ 林子善:TVB真係幫咗我好多!

藝人專訪

廣告

林子善跟大多數港人一樣,不計較辛勞,只求有工開:「入TVB之後慢慢多嘢做,好多人踩TVB,但TVB真係幫咗我好多,同埋成班人一齊去做好一件事,個氣氛真係好好!好多人問我做咩成日喺TVB飯堂食飯,我感覺係喺TVB飯堂食飯就係代表有工開。」

林子善:周星馳笑點低

講到大家認識林子善係因為《喜劇之王》,問佢細個其實想做乜?佢話:「我想做舞蹈員,想做郭富城身邊嗰啲舞蹈員,我好細個已經喺舞蹈團跳Jazz,我爆炸力好勁,細個有個名叫『屯門Michael Jackson』,後尾大個咗好多郭富城嘅舞蹈員叫我唔好入行,話好難撈,嗰時田雞叫周生 (周星馳) 簽我,不斷有嘢拍,所以無去做舞蹈員。」

林子善 99年林子善在電影《喜劇之王》做「洪爺」。
99年林子善在電影《喜劇之王》做「洪爺」。

問到周星馳對佢影響係咪最深遠?林子善表示:「最深遠就唔係,但佢係將我帶入娛樂圈嘅人,好感激佢。好多人唔明白佢係點嘅人,我跟咗佢五年,佢其實係唔係好鍾意出聲嘅人,但只要你開到佢道門,佢就好多嘢講,譬如講漫畫、功夫,佢好鍾意,佢好鍾意漫畫,足球小將、打鬥嗰啲,同埋佢個人係好忍唔到笑,佢笑點低到極,佢係好好玩、好鍾意整蠱人嘅人,同埋係好尊師重道嘅人,拍《功夫》,劉鎮偉導演嚟探班,周生即刻叫我過去,話:『叫師公!呢個係師公,你對佢要好有禮貌,唔好亂噏嘢!』佢對秋姐 (元秋)、華哥 (元華),都係好尊重。」

林子善 《喜劇之王》劇照。
《喜劇之王》劇照。

兩年零收入

拍完《喜劇之王》,係咪深信自己一路都會係做演員?林子善答:「唔係,拍完,田雞同我簽咗五年拍三套嘅合約,但周生嘅戲差唔多兩、三年先一套,根本嗰五年田雞畀我嘅糧係蝕,係佢自己畀出嚟。」幾年過去,有無諗自己係咪適合做演員,經濟上又支唔支持到?「之前搵錢易,唔識理財,屋企人話買車、買樓我都會出錢,到五年約完咗,一開始都仲有七萬零蚊摵吓,摵吓摵吓無晒!慘嘞,兩年零收入,嗰時一無錢就擺個銀包出嚟,阿媽同我以前個女朋友見我銀包無錢,會擺一、二百蚊落去,磨咗兩年,無嘢做,嗰時女朋友叫我出去social吓,但我連social嘅錢都無。」

林子善續說:「我嗰時諗住離開呢行,真係搵工,明明打電話去話請,見到我問我係咪電視台偷拍節目,我話唔係,佢話『我請你唔起!』見咗五、六份都唔請,有朋友介紹我去一間賣Hip-Hop衫嘅舖頭賣衫,$15個鐘,其實對比好大,我好細個拍一組戲都二、三千蚊,你食過糖啫,但人人都係咁啦,一出糧三千幾蚊人工,嗰時女朋友有隻錶想買,二千幾蚊,我買咗畀佢,點知佢鬧到我飛起,一路喊一路鬧,我好深刻,導致依家有錢嘅時候好好儲住,因為我唔知日後嘅生活係點。直到有次曾志偉生日,有人叫我去,佢見到我問:『你依家仲係咪星仔㗎?』我答唔係,佢話:『我仲以為你係,簽埋你吖!』嗰時我個心離一離,一個影視界裡面嘅王者話簽我,簽咗幾年,後來佢公司轉型無做。」

林子善 08年林子善做曾志偉《鐵甲無敵獎門人》嘉賓。
08年林子善做曾志偉《鐵甲無敵獎門人》嘉賓。

黃子華教做戲

後來點入TVB?「一個好重要嘅人出現,就係我師傅黃子華,嗰時TVB拍《奸人堅》,想搵一個下把位,子華點名叫我入去拍。」問佢做咗啲咩,令子華搵佢?「出奇地,我只係見過佢一次,佢拍《一蚊雞保鏢》,我探小龍陳國坤班,有個人伸個頭出嚟話:『喂,洪爺嚟咗呀?』嗰度好黑,我認唔到佢,應佢:『邊位呀?』佢話:『黃子華!』我即刻:『子華哥,咁黑認你唔到。』佢好禮貌、好nice話:『你慢慢傾!』就係咁咋,十年後,佢無啦啦就搵我拍《奸人堅》,呢個係一個緣份,我好感激佢。」

林子善 07年《奸人堅》劇照。
07年《奸人堅》劇照。

林子善憶述:「佢無特別教我演戲,佢只係教過我一次,一次有場戲講子華接我出監、要我喊,以前我拍咁多嘢,從來都無要我喊,當我好頭痕,子華哥行埋嚟:『你放鬆啲,劇本寫咗幾多,你投入咗,自然就做到。就等如依家全世界得唯一一個親人,接你出監,佢對你好好嘅,你攞嗰個感覺出嚟就得嘞!』埋位,我喊到口水鼻涕成身都係,佢同我講:『傻仔,你咪喊到囉!』我成日喺佢身邊,學點做人,佢好好,對掃地阿嬸好有禮貌,對臨時演員又會打招呼、傾偈,無高低之分。佢帶咗我入TVB,之後到威哥艾威,威哥有份拍《奸人堅》,覺得我幾搞笑,介紹監製畀我識,同監製講,『呢條𡃁仔得㗎,我同佢可以做兩兄弟,一個斯文、一個火爆,對比會好大!』就係咁拍咗《兩妻時代》,之後自然有監製用,好多機會走咗出嚟。」

林子善 《奸人堅》劇照。
《奸人堅》劇照。

王晶有求必應

問林子善入TVB之後,生活有無改善到?同依家經理人王晶又係幾時結緣?佢話:「入TVB最大改善就係喺街啲人見到我,唔會再嗌我『呢個咪拍戲個粉腸!』會叫我個角色名,同內地、馬來西亞會有好多外快騷。TVB嘅生活好開心,好多長輩都仲喺度,好多好勁嘅一線藝人耐唔中都會返嚟拍。兩年前簽晶哥 (王晶),係因為我識到幫晶哥做嘢嘅一個人,亦係伍允龍嘅經理人,佢對我好好,同呢行嘅人食飯又會叫埋我,有次我同佢講:『我有時有啲嘢接,你可唔可以幫我?』佢話:『唔得,我屬於晶哥公司,咁唔啱規矩。』」

林子善 林子善曾與伍允龍同樣簽約在王晶旗下。
林子善曾與伍允龍同樣簽約在王晶旗下。

林子善續言:「無幾耐,佢同我講:『不如我叫晶哥簽埋你!』今年入房見晶哥,晶哥話:『我簽咗你兩年,一套嘢你都未拍過,你結咗婚唔使搵錢咩?我安排啲嘢你拍啦!」佢又係好好,成日都嘻嘻哈哈,佢仲係黃大仙嚟,有求必應,有藝人同佢講想坐咩車、住咩酒店,佢budget 畀到都會畀。所以我身邊全部都係菩薩,一路係咁幫我。」

林子善

林子善直言娛圈生涯起落大:「我考健身牌、做健美評判、搞冰室生意,都係未雨綢謀。」

林子善 林子善在大坑開餐廳「龍鳳冰室」。
林子善在大坑開餐廳「龍鳳冰室」。

林子善17歲憑《喜劇之王》入行,至今已二十年:「有句說話我覺得好適合形容周星馳同王晶,就係『獅子唔會對狗吠』,佢兩個做自己嘅嘢,無論人哋話佢哋乜嘢,一律唔會回應,因為唔需要。」

林子善 《喜劇之王》劇照。
《喜劇之王》劇照。

同場加映:林子善戰士身形 戰士的毅力

林子善經常在其IG展示操肌成果,佢話唔係要晒命,而係希望話畀大家知操肌要有恒心,鼓勵大家要為自己的健康而做運動!早前佢拍《果欄中的江湖大嫂》期間,喺IG話:「要有熱愛運動嘅你麻煩唔好再Inbox我了,因為近排開緊TVB嘅電視劇10分忙碌,總之我一有時間就會拍片解答問題」。

林子善

林子善 林子善經常晒肌,仲教網友操肌嘅方法!
林子善經常晒肌,仲教網友操肌嘅方法!

子善又話:「 老實講我真係唔覺得自己大隻……最多可以話正常而較矮因為係我身邊真係太多大隻佬……仲要好多係比賽級冠軍人馬成日影晒肌相係有一個目的 發放多啲正能量比身邊朋友希望佢哋多做運動身體健康… 」之不過,有網友留言對子善彈三彈四,話佢操得大仔都冇用,弊在生得矮!

林子善

林子善 林子善話唔係要晒命,而係想鼓勵大家多做運動!
林子善話唔係要晒命,而係想鼓勵大家多做運動!

即刻去片:林子善《星星負皮卷》

對於有網友話係「矮仔」,子善喺本刊嘅節目《星星負皮卷》中回應唔止冇嬲,仲自嘲出名「矮」㖭!聽吓佢點講!

撰文:東方新地圖片來源:新傳媒圖片庫、林子善IG