《城寨》「福壽金」林偉 原來係李嘉欣同學!

無綫劇《城寨英雄》播出前,大家都只見到一眾大隻男如陳展鵬、袁偉豪及伍允龍等又晒肌又打到飛起,估唔到出街後竟然會有咁多配角突圍而出!好似李嘉、林穎彤及魏惠文等知名度較低的演員,都因為在劇中演得出色而人氣急升!其實另一配角、劇中飾演毒梟福壽金的型佬林偉一樣有唔少觀眾支持,今集佢除了一貫的大癲大喪,仲會神打上身變爆肌男,勁有睇頭!而且唔講你唔知,林偉那些年仲同大美人李嘉欣做過同學!

延伸閱讀︰

《城寨》刁蘭抽水 牙佬動L

重口味!《城寨》陳芷尤跳舞露毛趕客

劇情講到花曼(王君馨飾) 終於搵到福壽金(林偉飾) 收藏毒品的貨倉,然後將所有毒品偷走,佢同馮春美(吳家樂飾) 仲打算將偷貨一事嫁禍予柯萬長(張國強飾) ,等佢哋兩幫人內訌。

 

花曼將毒品收藏在泰婆(元秋飾) 的店中,福壽金發現毒品後同泰婆大打出手!點知福壽金竟然神打上身,口噏噏一餐之後威力大增,泰婆一時不敵!

 

幸好牙佬(袁偉豪飾)及拳佬(陳展鵬飾) 及時趕到,替泰婆解圍,但原來福壽金仲有絕技,食完啲唔知咩藥後忽然爆肌,青筋暴現,十足十變形俠醫!

 

爆完肌之後福壽金變到神神化化,威力無比之餘仲好似完全唔怕痛,打極都打唔低!其後龍城虎(伍允龍飾) 出現幫忙,牙佬拳佬先終於搞掂佢!

 

受傷的福壽金誤以為柯萬長偷走毒品,於是捉走其女兒柯德莉(劉佩玥),要脅對方交還貨物。點知情節忽然變膠,福壽金食食吓嘢無啦啦哽親,吞完啖飯都冇用!

 

柯德莉話晒喺外國讀書,學過急救,於是眾人將佢鬆綁,然後佢就幫福壽金做哽塞處理,最後終於無事!

 

生於1961年的林偉今年54歲,加入娛樂圈逾30年,少輕時身材高大健碩,除了模特兒外,仲拍過唔少三級片。佢近年回巢無綫後多演奸角,不時演黑社會大佬或者匪徒一類的角色。原來林偉同《城寨》另一演員魏惠文(飾演鑫鑫父親) 一樣,畢業於演藝學院戲劇系,在模特兒公司當學員時更加係大美人李嘉欣的同期同學!

回巢後參演唔少劇集,好似《EU超時任務》的賀展祥、《神槍狙擊》的江志毅及《使徒行者》的猜Fing等,雖然戲份唔算多,不過演出入型入格,都成功令觀眾留下印象。雖然林偉已經年過半百,但樣貌身材都keep得好好,絕對係大台買少見少的中年型佬!

「福壽金」在劇中大奸大惡,不過林偉私下同一班演員關係好融洽!其中一張相仲見到「夏滿」李嘉同「鑫鑫」林穎彤傾得好開心!

林偉在劇中就神打好厲害,原來現實中都唔係泛泛之輩!因為林偉練泰拳多年,除了係一名演員,仲係一位泰拳助教!真係打得又睇得!

 

據知林偉未入行前,曾經係一名喺尖沙嘴寫字樓返工的白領人士,一次佢着住西裝搭地鐵時被星探發掘,自此成為模特兒。有時西裝唔係話靚仔着就一定型,更要身形及佬味搭夠,小編個人覺得林偉着西裝確係一絕!

全文完