挑戰做歌王衰咗 胡杏兒轉戰舞台劇
廣告
近期主力北上賺人仔嘅胡杏兒，早前參加歌唱比賽《跨界歌王》，曾經唱過〈Someone like you〉、〈愛如潮水〉、〈叉燒包〉等唔同風格嘅歌，可惜最後都係討唔到評判同觀眾嘅歡心，14個人爭12個位都搞唔掂，包尾出局，反而同樣來自香港嘅王祖藍勇奪亞軍！做唔成歌王，杏兒又有新嘗試，下月去上海演出舞台劇《我和春天有個約會》。呢套劇咁經典，杏兒小心又俾人挑剔呀！
延伸閱讀：
《城寨》悲情預告 龍成虎求婚後慘死
《城寨》結局 刁蘭將會死？
下月14至18日晌上海東方藝術中心上演嘅舞台劇《我和春天有個約會》，演員班底全部來自香港，除咗杏兒，仲有邵美琪、江美儀、梁琤同謝天華等。杏兒飾演主角姚小蝶，同飾演沈家豪嘅天華係一對。姚小蝶呢個角色，曾經由鄧萃雯及劉雅麗做過，當時勁受中港觀眾歡迎，今次杏兒翻做，壓力一定唔細！
首次做舞台劇嘅杏兒，之前從未接受過專業訓練，雖然同法拉一樣係首齣舞台劇，但未必可以去到法拉嘅水平。據知杏兒今次收200萬做5場，雖然舞台劇主要觀眾對象會係內地人，但為咗演出可以原汁原味，對白會以廣東話代替普通話，咁杏兒就可以專心演出唔使驚講港普出醜啦！
全文完
