呻窮清算家人 張栢芝 自爆被欺負18年

張栢芝 社交網爆seed

張栢芝 絕跡香港娛樂圈多年，轉返內地發展，工作都以遷就兩子時間行先，搵錢機會不復當年勇，但仍要為父母姊弟幾頭家擔憂，心力交瘁。向來冇在社交網開設正式帳戶的張栢芝，上月尾突然開戶瘋狂出po，突然貼出父親跟親友的合照，留言「多謝你畀我勇氣，唔該晒你勇哥(張父張仁勇，又名鬍鬚勇)」以為佢感激張父，點知下面留言爆seed「其實都忍咗好耐㗎啦，估唔到爆出嚟之後，所有身邊朋友都極度支持我……他們冇諗過我一直活喺一個咩世界入面……」之後又以英文留言「no one can stop me……no one can beat me even」，看來栢芝忍無可忍，要一鑊過爆發。

延伸閱讀：

王君馨姊妹團 激索苟芸慧勁搶鏡

北上發展 徐子珊靚樣再進化

自爆被欺負18年

栢芝又出一段舊日跟細佬張豪龍的合作片段，留言話：「佢(指細佬)一定係諗家姐畀人欺負十八年，自己乜都做唔到」，栢芝自爆被欺負十八年，正是佢入行之時。

撐住幾頭家的栢芝，不吐不快，最近post中又指自己冇錢請造型師及買靚衫，只能穿舊衫及請化妝師拍膊頭幫拖。大呻冇錢的栢芝，在香港住大埔康樂園獨立屋，加拿大和新加坡都有物業，突然呻窮似乎想一刀切，拒再無限量接濟家人。

直播領養貓貓

栢芝決心拒再做大水喉後，心情立即變輕鬆，連日在IG玩直播，透露突然想養貓，回港第一時間處理領養事宜，並一口氣領養三隻貓。日前栢芝出動到愛護動物協會辦理手續，領取其中一隻白色灰紋英國短毛貓後，立即將家中新成員帶去寵物店沖涼，之後再去買電腦，出巡大半天返回大埔寓所。

激短熱褲出巡

栢芝自爆專一，連家中電腦都是十多年、婚前買下，直至近日壞機，才去買新。呢日栢芝出發到銅鑼灣蘋果店買電腦，司機拎一袋自己孭一袋，滿載而歸。見到今年37歲、生咗兩個仔的張栢芝keep得唔錯，着住一條激短熱褲露腿出巡，都依然吸睛喎！

分享狂魔

栢芝除了養貓成癮，近日非常沉迷網絡世界，不但在家中、車上、街上，無時無刻玩直播，更貼相出po，在IG開設帳戶僅三星期，已吸納1.4萬粉絲，難怪日拍八條直播，勤力過網紅。栢芝所分享相片當中佔了一半是今年10歲Lucas(謝振軒)和7歲Quintus(謝振南)，兩子愈大愈靚仔，Lucas跟栢芝一樣愛上滑水而且滑得有水準，又晒兩子講普通話，大讚兩仔「大個仔，叻過自己」，刻意為兩子減產的栢芝，睇得出好努力keep住人氣。

全文完