煎糕

煎糕要完美 4個小秘訣包靚

生活

廣告

新年流流,親戚朋友上門拜年,唔煎番碟糕出嚟招呼人又點似樣?不過煎糕話易唔易,話難唔難,煎糕到黐哂底,搞到支離破碎,又唔好意頭;煎到「撻成一塊」又失禮人!究竟點先可以煎到一碟完美嘅蘿蔔糕或者年糕呢? 記住以下幾個小秘訣啦!

原文:Sunday Kiss 圖片來源:新傳媒圖片

煎糕要完美 4個小秘訣包靚

1. 厚切半寸

年糕最好雪過夜先,切糕嗰陣千祈唔好切得太薄,因為太薄會好易黐底,想反轉件糕又會好易爛,半寸就最perfect喇!

2. 熱鑊熱油

好多人以為想煎糕唔黐底,最緊要油夠多,其實係大錯特錯!想煎得靚,個鑊一定要燒得夠熱,再落少少油(如果用易潔鑊,更加唔需要太多油),等啲油均勻流遍鑊面之後,先直將啲糕擺落鑊。

 

3. 留意火力

年糕,落鑊之後要較大少少火,煎到兩邊都變哂金黃色就搞掂!而煎蘿蔔糕就要用中細火,先煎4-5分鐘,之後翻轉再煎多3分鐘左右,就差不多喇!

4. 唔好多手

煎糕一定要有耐性,唔需要成日反,煎完一邊,先煎另一邊,年糕成日反,好似黐埋一齊;蘿蔔糕成日反就好易散哂!

記住呢四個小秘訣,要煎一碟好食又見得人嘅糕,應該唔難啦!

 

關鍵詞
秘訣