江若琳

江若琳剖白事業高低潮:走光好小事

星惜天下

廣告

江若琳與蕭潤邦由十年朋友變戀人,並將於年尾結婚,兩人在事業上都經歷過各種高低起跌,在訪問中他們就互相分享自己如何過渡事業低潮。

撰文:東方新地|圖片:新傳媒圖片庫、江若琳IG

江若琳 由細到大似白紙

30歲江若琳入行近11年,問佢覺得自己發展點?佢話:「我覺得OK,幾滿意,可能大家眼中覺得好坎坷,成日都起起跌跌,但我又覺得都算幾好,同埋我覺得個天要我經歷咁多嘢,可能係因為我由細到大太似一張白紙,唔知呢個世途係點,如果唔係我呢十年間遇到咁多嘢,我唔會咁快去成 長、咁知足。我依家係好知足、好隨遇而安,如果我嘅路一路順暢,我可能有更好嘅發展,但我唔會開心,因為唔係我覺得好快樂嘅生活模式。」

講到同前經理人公司嘅合約官司,江若琳表示:「仲未了結,都keep住處理緊。因為我係處於被告嘅狀態,我係好被動嘅一方,互交緊啲文件,你都知司法程序好漫長。都使咗幾多錢嘅,無辦法啦,佢要嚟嘅,仲可以頂咪繼續頂落去,依家我仲可以有呢個魄力去頂得住,可能佢成為我嘅動力㖭,要處理呢件事,咪努力啲做嘢。」蕭潤邦補充:「但冇影響佢繼續行嘅路或者我哋要結婚、生仔。」江若琳續說:「工作一路都好正常,好多謝客戶朋友一路畀好多工作機會我,可以繼續做我鍾意做嘅嘢。」

開到佢本身係咪睇得開嘅人?江若琳苦笑謂:「唔係呀,係訓練出嚟,我絕對唔係睇得開嘅人,所以我曾經有段時間病得好緊要,突然間啲衝擊湧埋嚟,我擋都擋唔切。我未遇到佢(蕭潤邦)或者未經歷咁多嘢之前,我係唔開心,原來我係好強迫去話畀自己聽我 係好堅強、好硬淨,可以頂得住所有嘅風浪,但我其實係好脆弱、好冇安全感嘅人。」

拒絕妥協

江若琳直言:「有律師團隊問過我,點解我遇到咁多嘢都唔放棄,我話就係因為我遇到咁多唔公平嘅嘢,我更加唔想放棄,因為我要證明畀所有睇錯我嘅人,話畀佢哋聽,你哋曾經睇錯我,如果我默默咁離開,咪即係對咁唔公平嘅世界妥協囉。我係比較硬頸嘅,都幾戇居。」

江若琳又剖白過去面對負面新聞時嘅感受:「每一次嘅新聞都係封面、大大鑊,完全瞓唔到,每日等天光等啲報紙、雜誌出,最慘畀人屈,出到嚟又唔喊得,因為公司會叫唔好喊、唔好講錯嘢,每日都好似驚弓之鳥,依家點解咁開心,因為我鍾意講乜就講乜。」

講到有次記者喺塊鏡影到佢走光,上晒即時新聞,原來對江若琳嚟講只係好小事:「我畀人影咗走光係唔開心,但對於我嚟講已經係好小事,因為佢未至於破壞我嘅人格或者聲譽,我係好有原則同底線嘅人,我試過有啲封面一張相都冇、生安白造,畀人監生砌生豬肉,我試過問個記者點解咁寫,佢話因為個故事好睇, 純粹為賣書。」

蕭潤邦 望生意發展快過加租

蕭潤邦離開咗娛樂圈後,同期出道嘅周柏豪、陳柏宇都發展理想,問佢有咩感覺?佢話:「最緊要搵到自己開心嘅路,我覺得飲食好適合我,同埋千祈唔好比較,因為你永遠唔會見到人哋嘅努力,好似我依家有員工問『點解佢成日唔做嘢,你升佢?』我覺得唔需要去監管人做得好定唔好,最緊要做好自己,人生一定有好多機會。」

講到點解做飲食?蕭潤邦答:「我阿爸以前做廠,所以我一路都想做生意,做完歌手嗰段時間,我去咗上海,做模特兒工作,我以為自己好高,但去到上海casting,發現我係最瘦最矮嗰個,我就諗咁落去都係死路一條,開始留意有冇乜嘢可以帶返香港做,我住嘅地方樓下賣緊生煎包,我每日落去食,我問自己點解咁鍾意食,原來香港冇咁嘅形式賣生煎包,嗰時冇乜錢,喺旺角搵咗個一百呎嘅地方做立食,所以我成日都講,上海畀咗兩樣嘢我,一個係生煎包,一個就係佢。」

問佢事業有咩展望?蕭潤邦表示:「其實每個做飲食或者零售嘅人,得同一個方向,就係掙扎,除非買咗個舖,否則發展、生意永遠主宰喺個租金度,如果墨守成規做三、五年,佢一加租,間舖就執得嘞,所以我希望我嘅發展快過加租,就可以避過租金嘅災難。」

睇翻江若琳初出道07年曾推出寫真集《Paradise Of Colour》。

當時的江若琳20歲未滿,真係又pure又true!

打本畀江若琳開麵店

最近忙於為自己新麵店開幕的江若琳早前透露未婚夫「生煎包王子」蕭潤邦畀店內員工試食後,突然就開店試業,搞到佢好緊張,但好開心嘅係試業短短幾小時,已經有好多人排隊幫襯,佢都呼籲大家有甚麼意見都可以去麵店嘅社交平台話畀佢知。講到未婚夫日前同佢拍短片宣傳時,疑似下體「激凸」,Elanne笑話「大家唔好再講⋯其實佢乜都冇,佢在平時都係咁唔要面!」

江若琳同與蕭潤邦Oscar將於年底結婚,身為「生煎包王子」嘅Oscar好愛錫江若琳,早前打本畀未婚妻喺深水埗開生煎皇后麵館,江若琳做埋生招牌,二人連日親身睇裝修及打點開張事宜。

Oscar「激凸」

老闆娘Elanne喺社交平台上載短片宣傳新店,Oscar都有幫手,不過著住白色波褲的佢忽然用手擋住下體,原來不小心「激凸」,Elanne望見爆笑話:「喂吖,好核突吖你!」

事後Oscar留言「屈」未婚妻,「本來我想介紹麵館嘅事宜,但她卻被其他東西吸引著, 思緒凌亂!正經啲啦!」Elanne亦回覆:「佢真係黐㗎」、「佢諗太多,根本無人睇到」。